ភ្នំពេញ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានអនុញ្ញាតិ ឲ្យសាសនិកខ្មែរឥស្លាមទាំងអស់អាចទទូរក្រម៉ា និងពាក់មួកកន្តឹបថតរូបចុះឈ្មោះបោះឆ្នោត ដែលជាផ្នែកមួយ គោរពទៅតាមទំនៀមទំលាប់ សាសនា ឥស្លាម។
នេះបើយោងតាមសេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោត ចុះកាលពីថ្ងៃទី ១២ ខែកញ្ញា។
សេចក្តីជូនដំណឹងដដែលបានបញ្ជាក់ថា គណៈកម្មាធិការជាតិរៀបចំការបោះឆ្នោត ជូនដំណឹងដល់មន្ត្រីរៀបចំការចុះឈ្មោះបោះឆ្នោត រាជធានី ខេត្ត ទាំងអស់ស្តីពីការអនុញ្ញាតិអោយ សាសនិក ឥស្លាមនារី ទទូរក្រម៉ា និងបុរសអាចពាក់ កន្តឹប ពេលថតរូបចុះឈ្មោះបោះឆ្នោត។
អ្នកនាំពាក្យ គ.ជ.ប លោក ហង្ស ពុទ្ធា បានបញ្ជាក់បន្ថែមថា គណៈកម្មាធិការជាតិរៀបចំការបោះឆ្នោត បានអនុញ្ញាតិឲ្យសាសនិកជនខ្មែរឥស្លាមទទូរក្រម៉ា និងពាក់មួកកន្តឹបថតរូបចុះឈ្មោះបោះឆ្នោត តែមិនអាចឲ្យពាក់បិទមុខជិតឃើញត្រឹមប្រឡង់ភ្នែកនោះទេ។
លោក ហង្ស ពុទ្ធា៖«ពាក់កន្តឹប បិទបាំងបន្តិចបន្តួចបាន ប៉ុន្តែបិទបាំងទុកតែប្រឡងភ្នែកគឺ មិនអាចទទួលយកបាន។ តាមពិតក្នុងន័យសម្របសម្រួល ធ្វើយ៉ាងណាបង្ហាញអត្តសញ្ញាណឲ្យបានច្បាស់ សំគាល់បានអត្តសញ្ញណគឺ គ.ជ.ប ទទួលយកបានហើយ ប៉ុន្តែដោយឡែកប្រសិនបើជាការបិទបាំងបែបណាមួយដែលធ្វើឲ្យប៉ះពាល់អត្តសញ្ញាណ របស់បុគ្គល ក៏ គ.ជ.ប មិនអនុញ្ញាតិបានទេ »។
ជុំវិញបញ្ហានេះ ប្រធានចលនាខ្មែរឥស្លាម មកពីគណបក្សសង្គ្រោះជាតិ លោក អ៊ីសា អូស្មាន បានអបអរសាទរ។ លោកបន្តថា ក្នុងរយៈពេលជាង ១០ ថ្ងៃនេះ តាមការប៉ានប្រមាណ មានប្រជាពលរដ្ឋខ្មែរឥស្លាមនៅក្នុងចំណោមប្រមាណ ៣ទៅ៤សែននាក់ បានទៅចុះឈ្មោះបោះឆ្នោតបានប្រមាណ ១០ ភាគរយ។
លោក អ៊ីសា អូស្មាន៖«ឥឡូវលឺដំណឹងអញ្ចឹងវាជារឿងមួយប្រសើរមែនតែនដែល ខ្ញុំសប្បាយចិត្ត ហើយសាសនិកឥស្លាមនៅស្រុកខ្មែរទាំងគាំទ្រ ទទួលយកដោយសប្បាយបំផុតហើយ សង្កេតមើលបានប្រហែលជា១០ ទៅ ២០ ភាគរយប៉ុណ្ណឹង»។
បើតាមអគ្គលេខាធិការ គ.ជ.ប លោក ទេព នីថា ថ្លែងនៅក្នុងសាលសន្និសីទ គ.ជ.ប ក្នុងកិច្ចប្រជុំផ្សព្វផ្សាយស្តីពី លទ្ធផលបណ្តោះអាសន្ននៃការចុះឈ្មោះបោះឆ្នោត កាលពីម្សិលមិញបញ្ជាក់ថា ចាប់តាំងពីថ្ងៃដំណើរការនៃការចុះឈ្មោះបោះឆ្នោត ចាប់ពីថ្ងៃទី០១ ខែកញ្ញា ឆ្នាំ២០១៦ រហូតមកដល់ថ្ងៃទី១៣ ខែកញ្ញា មានប្រជាពលរដ្ឋជិត ២ លាននាក់ បានមកចុះឈ្មោះបោះឆ្នោត និង ប្រជាពលរដ្ឋប្រមាណ ៨ លាននាក់ទៀត មិនទាន់នាំគ្នាមកចុះឈ្មោះបោះឆ្នោត៕
