ភ្នំពេញ៖ ឯកអគ្គរដ្ឋទូត អាមេរិកប្រចាំប្រទេសកម្ពុជា លោក William Heidt បានសរសេរនៅលើទំព័រហ្វេសប៊ុក របស់លោកថា ជនជាតិអាមេរិកចំនួន ៦៩ នាក់ ដែលជាសមាជិកថ្មីនៃក្រុមទី ១០ អ្នកស្ម័គ្រចិត្តរបស់ទីភ្នាក់ងារ Peace Corp នៅកម្ពុជានឹងធ្វើពិធីស្បថបំពេញការងារនៅកម្ពុជា។
យោងតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជា ដែលចេញផ្សាយកាលពីថ្ងៃទី ១៤ ខែ កញ្ញា ឆ្នាំ២០១៦ម្សិលមិញ ស្ថានទូតសហរដ្ឋអាមេរិក នឹងរៀបចំពិធីស្បថដល់ក្រុមទីភ្នាក់ងារ Peace Corp នៅថ្ងៃសុក្រទី១៦កញ្ញានេះ។
ការរៀបចំពិធីស្បថរបស់ទីភ្នាក់ងារ Peace Corp នេះ នឹងធ្វើទ្បើងនៅសណ្ឋាគារ Himawari ព្រឹកថ្ងៃទី ១៦ ខែកញ្ញា ឆ្នាំ២០១៦ ស្អែកនេះ វេលាម៉ោង ៨ : ៣០នាទីព្រឹក។
សូមជំរាបថា ទីភ្នាក់ងារ Peace Corp បានបង្កើតទ្បើងនៅក្នុងឆ្នាំ ១៩៦១ ដោយប្រធានាធិបតីសហរដ្ឋអាមេរិក លោក John F.Kennedy។ ការបង្កើតទីភ្នាក់ងារនេះក្នុងគោលបំណងដើម្បីជំរុញសន្តិភាព និងមិត្តភាពក្នុងពិភពលោក។ បន្ថែមពីនេះទៀតនោះគឹដើម្បីកសាងសមត្ថភាពរបស់មនុស្ស ស្រី នៅក្នុងប្រទេសដែលមានការពាក់ព័ន្ធ និងលើកកម្ពស់ការយល់គ្នា រវាងសហរដ្ឋអាមេរិកនិងប្រទេសដទៃ៕
