ភ្នំពេញ៖ សិក្ខាសាលាយុវជនស្តីពីកីឡា ស្នេហា និងការអប់រំរបស់យុវជនសតវត្សទី ២១ នឹងប្រព្រឹត្តទៅនៅថ្ងៃទី ១៨ ខែកញ្ញា ឆ្នាំ ២០១៦ ខាងមុខនេះ នៅសាកលវិទ្យាល័យបញ្ញាសាស្រ្តកម្ពុជា (សាខាវិមានឯករាជ្យ) ចាប់ពីម៉ោង ៧ ព្រឹក ដល់ ១២ ថ្ងៃត្រង់។
សិក្ខាសាលារៀបចំឡើងក្នុងគោលបំណងពង្រឹងសមត្ថភាពយុវជនឲ្យមានទំនុកចិត្តលើខ្លួនឯង ស្គាល់ខ្លួនឯងកាន់តែច្បាស់ក្នុងការសម្រេចចិត្តផ្សេងៗ ព្រមទាំងនៅក្នុងសេចក្តីស្នេហា និងការសិក្សាជាដើម។
សិក្ខាសាលាយុវជននេះ នឹងមានការចូលរួមចែករំលែកបទពិសោធន៍ពីវាគ្មិនជំនាញជាច្រើនរូប មានដូចជាលោក ហឿន សំនៀង នាយករងខុទ្ទកាល័យលោកទេសរដ្ឋមន្ត្រី ស៊ុន ចាន់ថុល, លោក កុលផេង វឌ្ឍនា អ្នកនិពន្ធ, កញ្ញា នាង សុវ៉ាតនា ឌីជេវិទ្យុក្នុងកម្មវិធីដោះស្រាយវិបត្តិស្នេហា, កញ្ញា សារ៉ា សុខេមា នាយកកម្មវិធី Teach For Cambodia និងកីឡាករបាល់ទាត់ជម្រើសជាតិកម្ពុជា។
កម្មវិធីរៀបចំដោយក្រុមយុវជនស្ម័គ្រចិត្តដើម្បីការអភិវឌ្ឍសង្គម ដែលជាបណ្តាញយុវជនស្ម័គ្រចិត្តបានប្រមូលផ្តុំគ្នាជាក្រុមនិស្សិតដែលមកពីសាកលវិទ្យាល័យផ្សេងៗចាប់បង្កើតឡើងនៅឆ្នាំ ២០១៤ ។ ព័ត៌មានបន្ថែម ០១៦ ៧៨ ១៩ ៦៧ / ០៩៦ ៩៤ ៩៩ ០០៩៕