ភ្នំពេញ៖ លោក សម រង្ស៊ី ប្រធានគណបក្សប្រឆាំងធំជាងគេនៅកម្ពុជា បានសរសេរនៅលើទំព័រហ្វេសប៊ុករបស់លោក នៅថ្ងៃទី១៤ កញ្ញា នេះ ដោយរិះគន់ពីអសមត្ថភាពរបស់រដ្ឋាភិបាល និងថៅកែរោងចក្រនានា ដែលមិនអាចតម្លើងប្រាក់ខែសមរម្យដល់កម្មករបាននោះ។
ការរិះគន់របស់មេដឹកនាំបក្សប្រឆាំងកំពុងរស់នៅនិរទេសខ្លួននៅក្រៅប្រទេស ធ្វើឡើងស្របពេលសហជីព កំពុងជួបប្រជុំចរចាជាមួយ សមាគមរោងចក្រ និងតំណាងក្រសួងការងារនៅថ្ងៃនេះដែរ។
លោក សម រង្ស៊ី បានសរសេររៀបរាបដូចនេះថា៖«ក្នុងការចរចាទាមទារតម្លើងប្រាក់ខែអប្បបរមាពី ១៤០ ដុល្លារទៅ ១៨០ ដុល្លារ របស់បងប្អូនក្មួយៗកម្មករ មិនត្រូវជឿការត្អូញត្អែរ ឬការគម្រាមកំហែងរបស់ថៅ កែទេ។ ថៅកែទាំងនោះ តែងតែត្អូញត្អែរថា គេរកស៊ីមិនសូវចំណេញទេ ហើយអាចរកស៊ីខាតផង បើគេតម្លើងប្រាក់ខែឲ្យកម្មករតាមសំណើរបស់កម្មករនោះ»។
លោក សម រង្ស៊ី បញ្ជាក់ថា ការត្អូញត្អែររបស់ថៅកែរោងចក្រនេះ គឺជាលេសរបស់ថៅកែរោងចក្រ ដែលទាញផលចំណេញពីកម្មករ យកទៅសូកប៉ាន់មន្ត្រីមួយចំនួន ហើយនៅពេលផលប្រយោជន៍កម្មករកាន់តែខ្ពស់ ថៅកែរោងចក្រក៏ប្រើវិធីបិទរោងចក្រ ហើយបើកថ្មីវិញ។
លោកបានសរសេរបញ្ជាក់ដូចនេះថា៖«ជួនកាល គេប្រើល្បិចបិទរោងចក្ររបស់គេ តែគេទៅបើករោងចក្រថ្មីមួយនៅក្បែររោងចក្រចាស់ ដោយគ្រាន់តែប្តូរឈ្មោះរោងចក្រតែប៉ុណ្ណោះ ព្រោះជំពាក់ប្រាក់ខែកម្មករដែលគេរត់ចោល។ បំណងរបស់គេមួយទៀត គឺបំបាត់អតីតភាពរបស់កម្មករចាស់ ដើម្បីជ្រើសរើសកម្មករថ្មី ដែលគេឲ្យប្រាក់ខែតិចជាងកម្មករចាស់»។
ទោះជាយ៉ាងណា លោក សុខ ឥសាន្ត អ្នកនាំពាក្យបក្សកាន់អំណាចបានហៅការអះអាងរបស់លោកសម រង្ស៊ី ថា និយាយគ្មានការពិត ។ លោក សុខ ឥសាន្ត អះអាងថា រដ្ឋាភិបាល បានខិតខំយ៉ាងខ្លាំង ដើម្បីឱ្យកម្មករ បានប្រាក់ខែសមរម្យដោយបានតម្លើងពីមួយឆ្នាំទៅមួយឆ្នាំ។ លោក សុខ ឥសាន្ត ៖«លោក សម រង្ស៊ី ជាមេបក្សប្រឆាំង។ អីចឹង! មេបក្សប្រឆាំងគ្មានការទទួលខុសត្រូវទេ ។ បញ្ហាគាត់និយាយរឿងប្រាក់ខែកម្មករ គឺមិនមែនគាត់ទើបនិយាយទេ។ គាត់និយាយតាំងពីគាត់បង្កើត គណបក្សជាតិខ្មែរតាំងពីឆ្នាំ ១៩៩៥ មកម្លេះ ។ អញ្ចឹង!ធាតុពិតគាត់ធ្វើមិនបាន។ គាត់គ្រាន់ តែថាដើម្បីបោកប្រាស់កម្មករនិយោជិតរបស់យើង ឱ្យយល់ច្រឡំតែប៉ុណ្ណោះទេ។ យើងដឹងហើយថា កម្មករយើងមិននៅហ្នឹងថ្កល់ ប្រាក់បៀបវត្សនេះទេ គឺចេះតែឡើងបន្តបន្ទាប់»។
លោកបញ្ជាក់ថា គ្មានការសូកប៉ាន់អ្វីដូចលោក សម រង្ស៊ី លើកឡើងនោះទេ។
នៅថ្ងៃនេះ ក្រុមសហជីព សមាគមរោងចក្រ និងក្រសួងការងារ ជួបប្រជុំគ្នាត្រូវគេរំពឹងថា នឹងលើកឡើង ពីសំណើរបស់សហជីព សុំដំឡើងប្រាក់ខែកម្មករ ចំនួន ១៧៩ ដុល្លារអាមេរិក ខណៈកម្មករបានទទួលប្រាក់ខែបាន ១៤០ដុល្លារ នាពេលបច្ចុប្បន្ន៕
