ភ្នំពេញ៖ នៅរយៈពេល ៨ខែ ក្នុងឆ្នាំ២០១៦នេះ ការនាំអង្ករចេញរបស់កម្ពុជាបាន ៣២ ម៉ឺនតោន ធ្លាក់ចុះ ៦ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៥។ នេះបើតាមរបាយការណ៍របស់លេខាធិការដ្ឋាន ច្រកចេញចូលតែមួយសម្រាប់បំពេញបែបបទនាំចេញអង្ករ។
របាយការណ៍ដដែលបានបញ្ជាក់ថា ចាប់ពីខែមករា ដល់ខែសីហា ឆ្នាំ២០១៦ កម្ពុជានាំចេញអង្ករបានជាង ៣២ ម៉ឺនតោន ធ្លាក់ចុះ ៦.៤ភាគរយ បើធៀបនឹងរយៈពេលដូចគ្នាកាលពីឆ្នាំ២០១៥ ដែលមាន ជាង៣៤ម៉ឺនតោន។
សូមបញ្ជាក់ថា កាលពីឆ្នាំ២០១៥ កម្ពុជា បាននាំចេញអង្ករទៅកាន់ទីផ្សារអន្តរជាតិ បានចំនួនជាង៥៣ម៉ឺន៨ពាន់តោន កើនឡើង៣៩ភាគរយ បើធៀបនឹងឆ្នាំ២០១៤។ ប្រទេសដែលនាំមុខគេក្នុងការនាំចូលអង្ករពីកម្ពុជាច្រើនជាងគេ គឺចិន ប្រមាណជាង ១០ម៉ឺនតោន ប្រទេសបារាំង ប្រមាណជាង ៧ម៉ឺនតោន លេខ៣ប្រទេសប៉ូឡូញ ប្រមាណជាង៦ម៉ឺនតោន ទី៤ ប្រទេសហូឡង់ បានជិត ៦ម៉ឺនតោន និងទី៥ ប្រទេសម៉ាឡេស៊ី បានជិត ៥ម៉ឺនតោន៕
