ភ្នំពេញ៖ នៅថ្ងៃទី ១០ កញ្ញានេះ ក្រសួងអប់រំយុវជន និងកីឡា បានប្រកាសលទ្ធផលប្រឡងមធ្យមសិក្សាទុតិយភូមិចំណេះទូទៅ និងបំពេញវិជ្ជា ឬបាក់ឌុបនៅតាមមណ្ឌលប្រឡងរាជធានីភ្នំពេញ និង ខេត្តកណ្តាល។ សិស្សានុសិស្សប្រឡងជាប់ភាគច្រើនសម្តែងការសប្បាយរីករាយ ខណៈសិស្សានុសិស្សមួយចំនួនមានអារម្មណ៍ក្រៀមក្រំ ព្រោះតែមិនបានលឺឈ្មោះរបស់ពួកគេ។ តែយ៉ាងណា ក៏សិស្សដែលប្រឡងជាប់មិនទាន់គិតថា រៀនមុខវិទ្យាអ្វីនៅមហាវិទ្យាល័យ។
លទ្ធផលប្រឡងមធ្យមសិក្សាទុតិយភូមិ ឬប្រឡងបាក់ឌុបឆ្នាំនេះ បេក្ខជនប្រឡងជាប់និទ្ទេស A មានចំនួន ៤០៥នាក់ និទ្ទេស B ចំនួន ២ ៨០១នាក់ និទ្ទេស C ចំនួន ៥ ៥៩៥ នាក់ និទ្ទេស D ចំនួន ៨ ៨៣៥ នាក់និង និទ្ទេស E មានចំនួន ៣៨ ១១៧ នាក់ ស្មើនិង ៦២.១៨ ភាគរយនៃចំនួនសិស្សប្រឡងជាប់នៅឆ្នាំ ២០១៦នេះ។
សេចក្តីប្រកាស់ព័ត៌មានតាមរយៈគេហទំព័រហ្វេសប៊ុករបស់ក្រសួងអប់រំ យុវជន និងកីឡា បានឲ្យដឹងនៅព្រឹកថ្ងៃទី ១០ កញ្ញានេះថា សិស្សប្រឡងមធ្យមសិក្សាទុតិយភូមិចំណេះទូទៅ និងបំពេញវិជ្ជា ឬបាក់ឌុប នៅឆ្នាំសិក្សា ២០១៦នេះ សិស្សដែលបានប្រឡងជាប់ថ្នាក់វិទ្យាសាស្ត្រពិត មានចំនួន ៣៨ ៤១៥នាក់ ស្មើនិងប្រមាណ ៥៧,២៨%។
ចំណែក បេក្ខជនប្រឡងជាប់ថ្នាក់វិទ្យាសាស្ត្រសង្គម មានចំនួន ១៧ ៣៣៨នាក់ ស្មើនិងប្រមាណ ៧៦,៧៥% នៃបេក្ខជនសរុបចំនួន ៥៥ ៧៥៣នាក់ ស្មើនិង ៦២,១៨% នៃបេក្ខជនដែលមានវត្តមានចំនួន ៨៩ ៦៦១នាក់ ៕
