ភ្នំពេញ៖ បើយោងតាមសេចក្តីជូនដំណឹងរបស់ក្រសួងទេសចរណ៍កាលពីថ្ងៃទី០៨ ខែកញ្ញា ម្សិលមិញបានឱ្យដឹងថា ក្នុងព្រឹត្តិការណ៍ EQUINOX ដែលនឹងមានបាតុភូតព្រះអាទិត្យរះចំកំពូលប្រាសាទអង្គរវត្ត នៅថ្ងៃទី២៣ កញ្ញាខាងមុខនេះ ក្រសួងទេសចរណ៍ បានរៀបចំឱ្យមានកម្មវិធីប្រកួតប្រជែងថតរូប ក្រោមប្រធានបទ ស៊ែលហ្វីអច្ឆរិយអង្គរ ដើម្បីចូលរួមផ្សព្វផ្សាយព្រឹត្តិការណ៍នេះ។
កម្មវិធីប្រកួតនេះ នឹងចាប់ផ្តើមនៅថ្ងៃទី ២២ និងផុតកំណត់ផ្ញើរូបភាពនៅម៉ោង ៥ រសៀល ថ្ងៃទី២៣ កញ្ញា។
បេក្ខជនដែលចង់ចូលរួម គឺត្រូវដាក់រូបដែលបានថតលើ Timeline ក្នុងទំព័រហ្វេសប៊ុករបស់ខ្លួន ជាមួយនឹងការពិពណ៌នា និងបន្ថែម @Cambodia MOT ព្រមទាំង Tag រូបថតឲ្យក្រសួងទេសចរណ៍ ។ ក្នុងការណែនាំរបស់ក្រសួង បេក្ខជនដែលចូលរួមក៏ត្រូវ Mention មិត្តរបស់ខ្លួនឲ្យជួយ Like ដើម្បីបង្កើនការឈ្នះនេះផងដែរ។ ក្រោយមកពួកគេត្រូវផ្ញើរូបថត និងព័ត៌មានលម្អិតផ្ទាល់ខ្លួនទៅកាន់អ៊ីម៉ែល seilfie angkor @gmail.com ឲ្យបានមុនថ្ងៃទី ២៣ កញ្ញា វេលាម៉ោង ៥ល្ងាច។
សេចក្តីជូនដំណឹងដដែលបញ្ជាក់ថា លក្ខខ័ណ្ឌចូលរួមក្នុងកម្មវិធីប្រកួតប្រជែងនេះ គឺបេក្ខជនត្រូវផ្ញើរូបថត Selfie ដែលមិនបានកែច្នៃទៅកាន់អ៊ីម៉ែលខាងលើ។
សម្រាប់ជ័យលាភីក៏នឹងត្រូវធ្វើការជូនដំណឹងតាមអ៊ីម៉ែលដដែលនោះ។
ចំពោះការវិនិច្ឆ័យរូប៖ ទីមួយគឺជ្រើសរើសដោយគណៈកម្មការ និងទីពីរ ដាក់ឲ្យបោះឆ្នោតតាមហ្វេសប៊ុករបស់ក្រសួងទេសចរណ៍។ រូបថតដែលមានចំនួន like ច្រើនជាងគេ គឺជាអ្នកឈ្នះ។
ក្រសួងទេសចរណ៍បានឱ្យដឹងថា ជ័យលាភីក្នុងកម្មវិធីប្រកួតប្រជែងនេះ លេខមួយ ទទួលបានវិញ្ញាបនបត្ររួមនិងទឹកប្រាក់ ២០០ដុល្លារ។ លេខពីរ វិញ្ញាបនបត្រ រួមនិងទឹកប្រាក់ ១៥០ដុល្លារ និងលេខបី វិញ្ញាបនបត្រ រួមនិងទឹកប្រាក់ ១០០ដុល្លារ។
សូមបញ្ជាក់ថា ព្រឹត្តិការណ៍ EQUINOX គឺជាព្រឹត្តិការណ៍ដ៏កម្រ ហើយវាកើតឡើងមួយឆ្នាំ២ដង គឺនៅខែមិនា និងខែកញ្ញា។ បាតុភូតដ៏អស្ចារ្យលើកទី ២ ក្នុងឆ្នាំនេះ គឺចំថ្ងៃទី២៣ កញ្ញា ឆ្នាំ២០១៦។ ក្រសួងទេសចរណ៍ ក៏បានអំពាវនាវឱ្យមានការផ្សព្វផ្សាយព្រឹត្តិការណ៍នេះ ឱ្យបានទូលំទូលាយ ជាពិសេសក្រុមហ៊ុន បណ្តាទីភ្នាក់ងារទេសចរណ៍ រួមនិងមគ្គុទ្ទេសទេសចរណ៍ទាំងអស់ ត្រូវធ្វើយ៉ាងណាឲ្យដំណឹងនេះបានទៅដល់ភ្ញៀវទេសចរ ក្នុងបុព្វហេតុផ្សព្វផ្សាយគោលដៅទេសចរណ៍ក្នុងប្រទេសកម្ពុជា ឲ្យកាន់តែទូលំទូលាយ៕
