ភ្នំពេញ៖ សេចក្ដីរាយការណ៍របស់អ្នករាយការណ៍ព័ត៌មានវិទ្យុស្ដ្រីFM102 បានឱ្យដឹងថា សមត្ថកិច្ច បានដាក់ពង្រាយកងកំលាំងចម្រុះជុំវិញសាលាដំបូងរាជធានីភ្នំពេញ ជាច្រើនកំណាត់ នៅព្រឹកថ្ងៃសុក្រ ទី ០៩ កញ្ញា នេះ ស្របពេលដែលតុលាការ បើសវនាការ ជំនុំជម្រះក្ដីករណី លោក កឹម សុខា។
អ្នករាយការណ៍បានឱ្យដឹងទៀតថា កម្លាំងចម្រុះប្រដាប់អាវុធ និងខែល ជាច្រើនរយនាក់បានពង្រាយ ជុំវិញសាលាដំបូងរាជធានីភ្នំពេញតាំងពីព្រឹកព្រលឹម ដែលធ្វើអោយមានការរិះគន់ ចំពោះចំណាត់ការរបស់អាជ្ញាធរ ដោយសារតែការកកស្ទះចរាចរណ៍តាមដងផ្លូវ។
នៅខណៈដែល ខាងក្រៅតុលាការ ពរពេញ ដោយសមត្ថកិច្ចប្រដាប់អាវុធ នៅខាងក្នុងបន្ទប់ សវនាការ គឺ សំនុំរឿងលោក កឹម សុខា កំពុងចាប់ផ្ដើម ជំនុំជម្រះក្ដីករណីលោក កឹម សុខា មេដឹកនាំបក្សប្រឆាំង ដែលមិនចូលខ្លួនក្នុងសំណុំរឿង សញ្ចារកម្ម ទាក់ទិននឹងនាងខុម ចាន់តារាទី ហៅស្រីមុំ។
តែយ៉ាងនេះក្ដី ទាំងមេធាវីប្រាំរូប និងលោក កឹម សុខា មិនបានចូលខ្លួន ដើម្បីតតាំងក្ដីនៅតុលាការ ថ្ងៃនេះទេ។ ក្រុមមេធាវីទាំងប្រាំរូប បានចេញសេចក្ដីប្រកាសព័ត៌មានដោយសម្រេច ពហិការ ហើយបានប្ដឹងដិតចិត្តដូរ ចៅក្រម ទៀតផង។
នៅស្នាក់ការគណបក្សសង្គ្រោះជាតិពលរដ្ឋឡើងមកការពារលោក កឹម សុខា
សេចក្ដីរាយការណ៍ របស់អ្នករាយការណ៍ព័ត៌មានរបស់វិទ្យុស្ដ្រីម្នាក់ទៀត ដែលចុះស្រង់ព័ត៌មាននៅស្នាក់ការគណបក្សសង្គ្រោះជាតិបានឱ្យដឹងថា សកម្មជន និងអ្នកគាំទ្រ របស់គណបក្សប្រឆាំងមួយនេះ បានឡើងមកបណ្ដើរៗ មកកាន់ស្នាក់ការបក្សនេះ ដើម្បីការពារ និងលើកទឹកចិត្ត លោក កឹម សុខា អោយតស៊ូ ដើម្បីយុត្ដិធម៌ របស់មេបក្សប្រឆាំងល្បីរូបនេះ។
តាមប្រភព ពលរដ្ឋជាច្រើនរយនាក់បានមកជួបជុំគ្នាតាំងពីល្ងាចថ្ងៃម្សិលមិញ ហើយនៅព្រឹកនេះទៀតពួកគេបានឡើងមកបណ្ដើរៗទៀត។
ពលរដ្ឋទាំងនោះ បានប្រាប់អ្នកសារព័ត៌មានថា ពួកគេមកទីនេះ គឺ ដើម្បីផ្ដល់យុត្ដិធម៌អោយ លោក កឹម សុខា និងគណបក្សសង្គ្រោះជាតិ ដែលពួកគាត់ថា រងអំពើអយុត្ដិធម៌យ៉ាងខ្លាំង។
យ៉ាងណាក៏ដោយ គណបក្សសង្គ្រោះជាតិបានចេញសេចក្ដីប្រកាសព័ត៌មាន មុននេះបន្តិចថា លោក កឹម សុខា នៅម៉ោង៩ព្រឹកនេះ នឹងថ្លែងសុរន្ទកថា ទៅកាន់អ្នកគាំទ្រលោក ជាអ្វីដែលគេ មើលឃើញថា មេបក្សប្រឆាំងមានរឿងអាស្រូវរូបនេះ ប្ដេជ្ញាដើម្បីយុត្ដិធម៌ខ្លួនឯងផង និងដើម្បីគណបក្សខ្លួនឯងផង។
កាលពីថ្ងៃម្សិលមិញ បក្សប្រឆាំងធំនេះ ក៏បានចេញសេចក្ដីថ្លែងការណ៍បង្ហាញប្ដេជ្ញាតស៊ូ រហូតដល់ មានការកែទម្រង់ប្រព័ន្ធតុលាការនៅកម្ពុជា អោយមានអព្យាក្រឹត្យឯករាជ្យ ហើយដោះលែង សកម្មជនរបស់ខ្លួនចេញពីពន្ធនាគារមកវិញ។
លោក សម រង្ស៊ី និយាយពីតារាភាពយន្ដ ពិសិដ្ឋពិលិកាដោយភ្ជាប់គ្រួសារមេដឹកនាំកាន់អំណាចនៅកម្ពុជា
លោក សម រង្ស៊ី ជាមេបក្សប្រឆាំង កំពុងនិរទេសខ្លួននៅក្រៅប្រទេស បានរិះគន់ប្រព័ន្ធតុលាការនៅកម្ពុជា ដោយភ្ជាប់ករណីឃាតកម្ម លើតារាភាពយន្ដ អ្នកស្រី ពិសិដ្ឋ ពិលិកា ដែលត្រូវខ្មាន់កាំភ្លើងបាញ់សម្លាប់ កណ្ដាលថ្ងៃត្រង់ នៅឆ្នាំ១៩៩៩។
លោក សម រង្ស៊ី បានបញ្ចេញឯកសារមួយចំនួនពាក់ព័ន្ធនឹង កំណត់ហេតុរបស់អ្នកស្រីពិសិដ្ឋ ពិលិកា រឿងរ៉ាវមួយចំនួន ទាក់ទងនឹងអ្វីដែលគេហៅថា រឿងស្នេហាជាមួយមេដឹកនាំ (សម្ដេច នាយករដ្ឋមន្ដ្រី ហ៊ុន សែន) ។
តែយ៉ាងនេះក្ដី បក្សកាន់អំណាចនៅតែវាយប្រហារទៅលើមេបក្សប្រឆាំងវិញថា ព្យាយាមរករឿងអតីតកាលយូរអង្វែង មកកកូរ ស្ថានការណ៍ដោយអះអាងថារឿងទាំងនេះ តុលាការមិនបាន បោះបង់ចោលនីតិវិធីរបស់ខ្លួននោះទេ។
អ្វីដែលនាំអោយលោក សម រង្ស៊ី បញ្ចេញឯកសារបែបនេះ ត្រូវបានមើលឃើញថា មេបក្សប្រឆាំងរូបនេះព្យាយាមទាញរឿងអតីតកាល បូកបញ្ចូលរឿងបច្ចុប្បន្នកាលរបស់លោក កឹម សុខា រឿងស្នេហាជាមួយនឹងស្ដ្រី ខុម ចាន់តារាទី ហៅស្រីមុំ។
ករណីទាំងនេះ អ្នកវិភាគមួយចំនួនពិនិត្យឃើញថា រឿងរ៉ាវរបស់អ្នកនយោបាយកម្ពុជា នឹងមិនអាចបញ្ចប់បានឡើយ បើអ្នកនយោបាយទាំងនោះមិនស្វែងរកការឯកភាពជាតិ ហើយមិនបញ្ឈប់ការប្រកួតគ្នាដែលគ្មានសមភាព និងយុត្ដិធម៌៕