នាយករដ្ឋមន្ដ្រីចិន លោក Li Keqiang បាននិយាយថា ចិន ចង់ឃើញកិច្ចសហប្រតិបត្តិការនិងការដោះដូរ នៃទំនាក់ទំនងជាមួយកម្ពុជា កាន់តែរឹងមាំ និងស៊ីជម្រៅថែមទៀត។
លោក Li Keqiang បានធ្វើកំណត់សំគាល់ដូចនេះ ក្នុងជំនួបជាមួយសមភាគីកម្ពុជា សម្ដេចនាយករដ្ឋមន្ដ្រី ហ៊ុន សែន នៅក្រោយនៃកិច្ចប្រជុំមេដឹកនាំអាស៊ីខាងកើត ជាមួយមេដឹកនាំ នៃសមាគម អាស៊ាន នៅទីក្រុងវៀងច័ន្ទ ប្រទេសឡាវ កាលពីថ្ងៃពុធទី០៧ កញ្ញា។
លោក Li Keqiang បានបន្ថែមថា ៖«ចិន និងកម្ពុជា ជាមិត្ត ជាដៃគូ ជាប្រទេសជិតខាងដ៏ល្អ ហើយចិន ខិតខំប្រឹងប្រែងគាំទ្រកម្ពុជា គឺ ដើម្បីជារដ្ឋនៃអធិបតេយ្យ ឯករាជ្យ ស្ថេរភាព និងការអភិវឌ្ឍសេដ្ឋកិច្ច»។
តាមទីភ្នាក់ងារសារព័ត៌មាន ចិនស៊ិនហួរ មេដឹកនាំចិនក៏បានបង្ហាញ សង្ឃឹមផងដែរថា ប្រទេសទាំងពីរ អាចធ្វើអោយមានការរីកចំរើនពិតៗនៅក្នុង វិស័យពាណិជ្ជកម្ម កសិកម្ម ហេដ្ឋា រចនាសម្ព័ន្ធ ការអប់រំ និងទេសចរណ៍។
ចំណែកសមភាគីកម្ពុជាវិញ សម្ដេច ហ៊ុន សែន ក៏បានថ្លែងកោតសរសើរ ការផ្ដល់ជំនួយរបស់ប្រទេសចិន ដែលជួយធ្វើអោយមានកំណើនសេដ្ឋកិច្ចនៅកម្ពុជា និងជីវភាពប្រជាជន កម្ពុជាកាន់តែមានភាពល្អប្រសើរ។
សម្ដេចនាយករដ្ឋមន្ដ្រី បន្ដថា កម្ពុជាមានឆន្ទៈ ដើម្បីចូលរួមជាមួយប្រទេសចិន បង្កើនការដោះដូរ នៃកិច្ចសហប្រតិបត្តិការ គ្រប់វិស័យ ទាំងអស់ ដោយធ្វើយ៉ាងណាអោយទំនាក់ទំនងចិន និងអាស៊ានកាន់តែប្រសើរ៕ប្រភព: ចិនស៊ិនហួ
