ភ្នំពេញ៖ បន្ទាប់ពីមានករណីផ្ទុះគ្រាប់បែកនៅក្នុសង្កាត់បឹងកេងកង៣ បានកើតឡើងកាលពីយប់មិញ ដែលធ្វើអោយមនុស្ស៤នាក់រងរបួស និងបង្កការខូចខាតដល់រថយន្ដ រួមទាំងសម្ភារ របស់ប្រជាពលរដ្ឋនៅក្នុងមូលដ្ឋានរួចមក អ្នកវិភាគបានហៅការផ្ទុះគ្រាប់បែកមួយនោះ ជាការគ្រប់គ្រងអាវុធជាតិផ្ទុះមិនបានល្អប្រសើរ។
តើកត្តាអ្វីខ្លះ ដែលធ្វើអោយអ្នកវិភាគយល់ឃើញបែបនេះ? ជាបន្ដសូមអញ្ជើញស្ដាប់បទវិភាគដែលរៀបចំឡើងដោយ កញ្ញា ជុំ ជោគជាតាដូចតទៅ៖
នៅក្នុងហេតុការណ៍ផ្ទុះគ្រាប់បែក កាលពីយប់ថ្ងៃអង្គារទី ០៦ កញ្ញា នៅផ្លូវសំខាន់មួយនៅកណ្ដាលរាជធានីភ្នំពេញ បានបណ្ដាលឱ្យមនុស្ស ៤ នាក់បានរងរបួស។
ភ្លាមៗ បណ្ដាញសង្គមហ្វេសប៊ុកបាន បង្ហោះរូបភាពព្រោងព្រាតហើយក្នុងនោះ គេឃើញយុវជន ២ នាក់ជិះម៉ូតូមួយគ្រឿង បានទម្លាក់គ្រាប់បែកនៅកណ្ដាលផ្លូវ ជាហេតុធ្វើអោយមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ ដែលនៅក្បែរនោះ។
ជុំវិញហេតុការណ៍ផ្ទុះគ្រាប់បែកនេះ អ្នកវិភាគបញ្ហាសង្គម បានហៅការផ្ទុះគ្រាប់បែកនៅពេលនោះ ជាការគ្រប់គ្រងអាវុធជាតិផ្ទុះមិនបានល្អប្រសើរនិងគ្មានប្រសិទ្ធភាព។
តើកត្តាអ្វីខ្លះដែលនាំអោយអ្នកវិភាគ យល់ឃើញបែបនេះ?
លោកសាស្ដ្រាចារ្យ សូ ចន្ថា អ្នកវិភាគពីបញ្ហាសង្គម បានលើកឡើងថា ការទម្លាក់គ្រាប់បែកចោលនៅកណ្ដាលផ្លូវសាធារណៈ បែបនេះ ដោយសារតែជននោះ មើលស្រាលប្រព័ន្ធសន្ដិសុខ របស់អាជ្ញាធរ ដែលមានភាពធូរលុង។
លោកបញ្ជាក់បន្ថែមថា ៖“មូលហេតុដែលនាំអោយមាន ការគប់គ្រាប់នៅទីសាធារណៈ បែបនេះ យើងមើលទៅ ទីមួយប្រព័ន្ធសន្ដិសុខ របស់អាជ្ញាធរ ហ្នឹងហាក់នៅមានការខ្វះខាត… ”។
ចំណែកលោកសាស្ដ្រាចារ្យ មាស នី អ្នកវិភាគពីបញ្ហាសង្គមម្នាក់ដែរ លោកក៏បានបង្ហាញការយល់ឃើញដែរថា បញ្ហានេះ គឺ កើតឡើងដោយសារតែសមត្ថកិច្ច គ្រប់គ្រងអាវុធជាតិផ្ទុះ មិនបានល្អ។ លោកថា បញ្ហានេះមកពីអាជ្ញាធរធ្វេសប្រហែស។
លោក មាស នី៖“ រឿងទីមួយ ទាក់ទិននិងកងឯកភាព ដែលមានតួនាទីក្នុងការកាន់អាវុធ។ ទីពីរ ទៀតវាអាចជាការហូរចូលអាវុធពីប្រទេសជិតខាង ដោយក្រុមណាមួយដែលគេរកស៊ីជួញដូរ អាវុធ សម្រាប់យកបំរើការងារប្លន់។ ហើយទីបីទៀត ប្រហែលជាអាចដូចជាកងកម្លាំងប្រដាប់អាវុធខ្លះ គាត់មានអាវុធ ប៉ុន្ដែគាត់មិនទាន់បានមានការប្រយ័ត្នប្រយែងពីអាវុធរបស់គាត់ … “។
លោកសាស្ដ្រាចារ្យ មាស នី បានបន្ដថា តាមការកត់សម្គាល់របស់លោក ការសម្លាប់គ្នាដោយ ការប្រើអាវុធ គឺភាគច្រើនកើតឡើងស្របពេល រដ្ឋាភិបាល បញ្ចេញកម្លាំងទ័ពដើម្បីធ្វើអ្វីមួយ។
លោក មាស នី ៖“ក្នុងនាមពលរដ្ឋ យើងសង្កេតឃើញ ដូចខ្ញុំបានជម្រាបជូនម៉េចថា យើងច្រើនតែឃើញការកើតឡើងនូវការសម្លាប់គ្នា តាមប្រដាប់អាវុធនោះ គឺច្រើនតែកើតឡើងនៅពេលដែលរដ្ឋាភិបាល បញ្ចេញកងកម្លាំងទ័ពមកសម្រាប់ វិធានការអីណាមួយ ប្លន់ បាញ់ សម្លាប់ និងច្រើនតែកើតមាន”។
ជុំវិញរឿងនេះដែរ វិទ្យុស្ដ្រីមិនអាចសុំការបំភ្លឺពីលោក ខៀវ សុភ័គ អ្នកនាំពាក្យក្រសួងមហាផ្ទៃបាននោះទេ។ តែយ៉ាងណាក៏ដោយបើតាម សេចក្ដីថ្លែងការណ៍របស់ក្រសួងមហាផ្ទៃ បានឱ្យដឹងថាកម្លាំងមានសមត្ថកិច្ចបាន នឹងកំពុងបន្ដចាត់វិធានការស្រាវជ្រាវ ស៊ើបអង្កេតយ៉ាងហ្មត់ចត់ ដើម្បីស្វែងរកជនល្មើស បញ្ជូនទៅតុលាការធ្វើការផ្ដន្ទាទោស ។
អ្វីដែលចាប់អារម្មណ៍គឺក្រសួងមហាផ្ទៃ បានថ្លែងថ្កោលទោសយ៉ាងដាច់អហង្ការ ចំពោះសកម្មភាពដ៏គួរឲ្យស្អប់ខ្ពើមនេះ។
តែយ៉ាងណា លោក សូ ចន្ថា យល់ឃើញមួយជ្រុងទៀត។ លោក ពិនិត្យឃើញថា ហេតុការណ៍ផ្ទុះគ្រាប់បែក កាលពីយប់ថ្ងៃអង្គារ គឺជារឿងដែល អ្នកបង្ករ មានចេតនាធ្វើអោយប្រជាពលរដ្ឋ មានការភ័យខ្លាច។
លោក សូ ចន្ថា៖“ចឹងបើយើងមើលទៅហាក់ដូចជាគ្រាន់តែ ជាការបង្កើតនូវព្រឹត្តិការណ៍ ឬក៏ធ្វើអោយអសន្ដិសុខ នៅក្នុងរាជធានីភ្នំពេញ ឬដែលយើងហៅថា ជាព្រឹត្តិការណ៍មួយធ្វើអោយប្រជាពលរដ្ឋនៅភ្នំពេញ មានការភ័យខ្លាច ហើយមួយទៀតអាចជាការបំភ័យ ដល់ពលរដ្ឋដែលនៅតាមបណ្ដាខេត្តផ្សេងៗ ដែលគ្រោងមករាជធានីភ្នំពេញ នៅថ្ងៃខាងមុខ ជាពិសេសថ្ងៃទី៩ ដែលបក្សប្រឆាំង គ្រោងនឹងអញ្ជើញពលរដ្ឋឡើងមកនោះ”។
នេះជាឧបទ្ទវហេតុ ដ៏ភ្ញាក់ផ្អើលខ្លាំងមួយទៀត បន្ទាប់ពីករណីបាញ់សម្លាប់អ្នកវិភាគដ៏ល្បីល្បាញមួយរូបគឺ លោកបណ្ឌិត កែម ឡី កាលពីថ្ងៃទី១០ កក្កដា។
អ្នកវិភាគយល់ឃើញប្រហាក់ប្រហែលគ្នាថា ស្ថានការណ៍នយោបាយ នៅកម្ពុជាមុនការបោះឆ្នោត ស្ថិតក្នុងភាពផុយស្រួយយ៉ាងខ្លាំង ដោយពួកគាត់ទទូចឱ្យអ្នកនយោបាយបក្សកាន់អំណាច និងគណបក្សប្រឆាំង ត្រូវសម្របសម្រួលគ្នាឡើងវិញ ទើបស្ថានការណ៍ដ៏ភ័យខ្លាចដូចការផ្ទុះគ្រាប់បែក កាលពីយប់ថ្ងៃអង្គារនេះ មិនអាចកើតឡើងបាន៕
