ព្រះអង្គ ប៊ុត ប៊ុនតិញ បណ្ដាញព្រះសង្ឃឯករាជ្យដើម្បីយុត្តិធម៌សង្គម មានសង្ឃដីកានៅថ្ងៃទី ០៤ កញ្ញា ឆ្នាំ២០១៦ ថា មរណភាព លោកបណ្ឌិត កែម ឡី គឺជាកំហុសព្រះអង្គនិងលោកបណ្ឌិត ដែលគិតខុសដោយគិតថាត្រឹមតែចាប់ដាក់គុក។
នេះបើតាមការចុះផ្សាយលើគណនីបណ្តាញសង្គម នៃបណ្ដាញព្រះសង្ឃឯករាជ្យ របស់ព្រះអង្គដែលបានបង្ហោះជាសាធារណៈនៅថ្ងៃអង្គារទី៦កញ្ញានេះ។
ព្រះអង្គមានសង្ឃដីកាដូចនេះនៅក្នុងរដ្ឋកាលីហ្វញ៉ាសហរដ្ឋអាមេរិក។ ព្រះសង្ឃ ប៊ុត ប៊ុនតិញ មានថេរដីកាបន្តលើកឡើងពីផលលំបាក ក្នុងកំឡុងពេលរៀបចំពិធីបុណ្យសពលោកបណ្ឌិតផងដែរ។
ព្រះអង្គថា ការនៅរស់គេគំរាម គេប្រមាថ ដល់ពេលស្លាប់ទៅ គេ ប្រមាថទៀត ដោយគេថា សព លោក បណ្ឌិត កែម ឡី បានស្អុយហើយ ដោយមិនអាចទុកយូរបានទៀតទេ។
លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់នៅ កណ្តាលទីក្រុងភ្នំពេញកាលពីថ្ងៃទី១០ កក្កដា ឆ្នាំ២០១៦។ សពលោក បណ្ឌិត ត្រូវបានដំកល់ធ្វើបុណ្យបាន១៥ថ្ងៃនៅវត្តពោធិយារាម ហៅវត្តចាស់ នៅសង្កាត់ជ្រោយចង្វារ។
នៅថ្ងៃទី២៤កក្កដា សព លោក បណ្ឌិត បានយកទៅបញ្ចុះនៅស្រុកកំណើតរបស់លោក នៅខេត្តតាកែវ ដោយមានប្រជាពលរដ្ឋចូលរួមហែ និងអមតាមផ្លូវរាប់ម៉ឺនសែននាក់។ មកដល់ពេលនេះ មានរយៈពេលជិត២ខែហើយ ដែល អាជ្ញាធរនៅមិនទាន់បង្ហាញកាមេរ៉ាសុវត្ថិភាព ពីរូបភាពនៃការបាញ់សម្លាប់លោកបណ្ឌិតនោះទេ។ ខ្មាន់កាំភ្លើងម្នាក់ ហៅឈ្មោះខ្លួនឯងថា ជួប សម្លាប់ ត្រូវបានសមត្ថកិច្ចចាប់ខ្លួន៕
