ហ្សិមបាវ៉េ៖ កាលពីសប្ដាហ៍មុន ប្រជាជននៃប្រទេស ហ្សិបបាវ៉េ ដែលស្អប់មេដឹកនាំរបស់ខ្លួន គឺលោកប្រធានាធិបតី រ៉ូបើត មូលហ្គាបេ(Robert Mugabe) បានសម្ដែងការត្រែកអរ ដោយសារទទួលដំណឹងពីមន្ទីរពេទ្យថា បុរសខ្លាំងកាន់អំណាចជិត ៤០ ឆ្នាំរូបនេះបានស្លាប់ហើយ។
ដំណឹងនេះបានផ្សព្វផ្សាយភ្លាម ស្រាប់តែប្រជាជនដែលធ្លាប់រងការឈឺចាប់នៃការគ្រប់គ្រងរបស់លោកRobert Mugabe បានចុះដើរតាមដងផ្លូវនានានៅក្នុងប្រទេសអាហ្វ្រិកមួយនេះ ជាពិសេសនៅរដ្ឋធានី ហារ៉ារ៉េ(HARARE) ដោយពួកគេបានសម្ដែងការសប្បាយរីករាយ។
ចំណែកអ្នកលេងបណ្ដាញសង្គម ក៏ចាប់ផ្ដើមបញ្ចេញមតិដែរ។ អ្នកខ្លះសរសេរបែបចំអកថា គួរបន្តកាន់អំណាចច្រើនឆ្នាំទៀតទៅ ហើយអ្នកខ្លះទៀតថាកាន់អំណាចរហូតដល់ជីវិតចុងក្រោយ។ ប៉ុន្តែបានតែ ប៉ុន្មានថ្ងៃប៉ុណ្ណោះ ស្រាប់តែមានការជូនដំណឹងពីមន្ទីរពេទ្យមកវិញថា លោក Mugabe បានដឹងខ្លួនវិញហើយ។
ដំណឹងនេះ ធ្វើឱ្យអ្នកគាំទ្របុរសខ្លាំងរូបនេះ ចុះដើរតាមផ្លូវម្ដងដោយពួកគេស្រែកច្រៀង ប៉ុន្តែមិនសូវរំភើបដូចក្រុមប្រឆាំងនោះទេ។
កាលពីថ្ងៃសៅរិ៍ទី៣ កញ្ញា លោក Robert Mugabe បានត្រឡប់ពីព្យាបាលវិញ ហើយបានពោលពាក្យមកកាន់អ្នកសារព័ត៌មានថា៖«អ្នកថាខ្ញុំស្លាប់។ ជាការពិតខ្ញុំស្លាប់មែន តែខ្ញុំនៅតែជាប្រធានាធិបតី។ អ្នកចង់ឱ្យខ្ញុំស្លាប់ តែខ្ញុំនៅតែមានជីវិត»។
អ្នកសារព័ត៌មានម្នាក់បានសួរខ្លួនឯងថា៖«តើពួកយើងនិយាយជាមួយខ្មោច។ ស្រាប់តែ លោក Mugabe បានលឺ ហើយនិយាយថា ខ្ញុំពិតជា Mugabe»។
នៅពេលដំណឹងថា Mugabe បានស្លាប់
នៅពេលទទួលដំណឹងថា បុរសខ្លាំង Mugabe បានស្លាប់ដោយជរាភាព ក្រុមអ្នកនយោបាយបក្សប្រឆាំងក៏ចាប់ផ្ដើមធ្វើបាតុកម្មតាមដងផ្លូវនានា នៅរដ្ឋធានីរបស់ប្រទេសក្រីក្រមួយនេះ។ ក្រុមប្រឆាំងបានចោទរដ្ឋាភិបាលបក្សកាន់អំណាចរបស់លោក Mugabe ថា បានប្រព្រឹត្តអំពើពុករលួយយ៉ាងខ្លាំង និងបង្កភាពអយុត្តិធម៌សង្គមដែលមិនអាចកែប្រែបានឡើយ។
តែមុនបាតុកម្មផ្ទុះឡើង ក្រុមប្រឆាំងក៏បានបង្កើតក្រុមចម្រុះរឹងមាំមួយ ដើម្បីឆ្ពោះទៅរកការបោះឆ្នោតដែលគេថា ការបោះឆ្នោតរបស់ប្រទេសមួយ នេះ មិនមានភាពសុក្រឹត និង យុត្តិធម៌។ បាតុកម្មបានប្រើពេលជាច្រើនថ្ងៃទើបមានការបង្ក្រាប។ គេថា Mugabe បានបញ្ជាឱ្យកងទ័ពស្មោះត្រង់និងលោក បង្ក្រាបបាតុកម្មហើយត្រូវប្ដឹងទៅតុលាការ។ ប្រធានាធិបតី Robert Mugabe បានព្រមានថា៖«ហ្សិមបាវ៉េ មិនមែនជាល្បែងនៃបដិវត្តន៍អារ៉ាប់នោះទេ»។
លោក Mugabe បានប្រាប់តុលាការ ឱ្យចាត់ការលើក្រុមប្រឆាំងបានមុនលោកវិលត្រឡប់ពីព្យាបាលវិញ។
ការឡើងកាន់អំណាចរបស់ Robert Mugabe
លោ Mugabe បានឡើងកាន់អំណាចតាំងពីឆ្នាំ១៩៨០ គឺតាមរយៈការបោះឆ្នោតមួយដែលគ្រានោះ លោកមានប្រជាប្រិយភាពជាងគេបើធៀបនឹងអ្នកនយោបាយដទៃ។ តែការបោះឆ្នោតក្រោយមកទៀត សន្លឹកឆ្នោតគាំទ្រលោកចេះតែរួចតូច។ យ៉ាងនេះក្ដីលោកនៅតែឈ្នះ ខណៈអ្នកសង្កេតការណ៍ រកឃើញប្រព័ន្ធបោះឆ្នោតរបស់ប្រទេសនេះ មិនមានភាពសុក្រឹតឡើយ។ លោក Mugabe មុនក្លាយជាប្រធានាធិបតី លោកក៏ធ្លាប់ធ្វើជានាយករដ្ឋមន្ត្រីផងដែរ។
លោកត្រូវបានរកឃើញថា ជាមេដឹកនាំលំដាប់ទី ១ នៃទ្វីបអាហ្វ្រិកដែលកាន់អំណាចយូរជាងគេ ហើយមានទ្រព្យសម្បត្តិ ១០ លានដុលា្លរអាមេរិក។ ទោះជាលោកមានអាយុ ៩២ ឆ្នាំក៏ដោយ ក៏លោកនៅតែសន្យាថា នឹងប្រកួតដើម្បីបន្តកាន់តំណែងកំពូលរបស់ប្រទេសក្រីក្រមួយនេះទៀត នៅក្នុងការបោះឆ្នោត ឆ្នាំ២០១៨៕ ប្រភព: BBC និង AFP
