ភ្នំពេញ៖ ខណៈព្រះអាទិត្យចាប់ផ្ដើម រះបញ្ចេញរស្មីភ្លាម គេឃើញសមត្ថកិច្ចបានដាក់ របាំងរាំងផ្លូវនៅកំណាត់ ខាងមុខ ស្នាក់ការគណបក្សសង្គ្រោះជាតិនៅសង្កាត់ចាក់អង្រែ។
ការដាក់កម្លាំងសមត្ថកិច្ចនិងរបាំងរាំងផ្លូវ ក៏កើតឡើង ចំពេល គណបក្សប្រឆាំងនេះ ត្រូវហែក្បួន ដាក់ញត្តិទៅស្ថានទូតមួយចំនួននៅភ្នំពេញ ដើម្បីឱ្យជួយ គាបសង្កត់គណបក្សកាន់អំណាច ឱ្យ គោរពកិច្ចព្រមព្រៀងក្រុងប៉ារីស ឡើងវិញ ដែលជាយន្តការជួយ ឱ្យកម្ពុជា មានសន្តិភាព និង ប្រជាធិបតេយ្យ ។
តែយ៉ាងនេះក្ដី មន្ត្រីគណបក្សសង្គ្រោះជាតិ អះអាងថា គេបានដើរដាក់ញត្តិ ជូនស្ថានទូតចំនួន១៥ ប្រទេសបានរួចហើយ។
លោក សុន ឆ័យ ថ្លែងដូចនេះធ្វើឡើងនៅទីស្នាក់ការបក្សសង្គ្រោះជាតិ កាលពីព្រឹកថ្ងៃទី ០៥ ខែកញ្ញា ឆ្នាំ២០១៦។ ចំណែកមន្ត្រីបក្សកាន់អំណាចថា ស្ថានទូតទាំងនោះ មិន ចាប់អារម្មណ៍អ្វីទេ។ លោក ជួន សារ៉េត រាយការណ៍បន្ត៖
ការដាក់ញត្តិ ជូនទៅស្ថានទូតមួយចំនួននៅរាជធានីភ្នំពេញបានធ្វើឡើងតាម ការគ្រោងទុកទោះជានៅផ្លូវនៅខាងមុខស្នាក់ការគណបក្សសង្គ្រោះជាតិ ត្រូវបានសមត្ថកិច្ចដាក់របាំងបិទក៏ដោយ។
លោក សុន ឆ័យ ដឹកនាំក្រុមសមាជិកសភាបក្សសង្គ្រោះជាតិដាក់ញ្ញត្តិទៅស្ថានទូតធំៗនៅកម្ពុជាដើម្បីផ្តល់ព័ត៌មានក៏ដូចជាសំណូមពរ មួយចំនួនទៅដល់ស្ថានទូតទាំងនេះឱ្យជួយដោះស្រាយស្ថានភាពនយោបាយ ដែលលោកអះអាងថាកំពុងតែមានស្ថានភាពអាក្រក់ ខ្លាំង។
លោក សុន ឆ័យ ដែលជាតំណាងរាស្ត្រគណបក្សសង្គ្រោះជាតិ បានថ្លែងចំពោះមុខអ្នកសារព័ត៌មាន នឹងអ្នកគាំទ្រ ថា ទោះបីជាមានការបិទផ្លូវយ៉ាងណាក៏ដោយចុះ ក៏សមាជិកសភា គណបក្សសង្គ្រោះជាតិចំនួន ៥រូប នៅតែអាចយកញ្ញត្តិទៅដាក់តាមស្ថានទូតចំនួន ១៥ នៅកម្ពុជាបានដដែល។ លោក សុន ឆ័យ បន្តថា ការរារាំង ក៏ដូចជាការបិទផ្លូវមិនឱ្យប្រជាពលរដ្ឋ ក៏ដូចជាតំណាងរាស្ត្រ អាចធ្វើដំណើរនៅតាមដងផ្លូវនេះ ជាការរំលោភបំពានសិទ្ធិរបស់ប្រជាពលរដ្ឋ និងសិទ្ធិរបស់អ្នកតំណាងរាស្ត្រ ដែលលោកថា ស្ថានភាពបែបនេះមិនគួរឱ្យបន្តមានតទៅទៀតនោះទេ។
លោក សុន ឆ័យ បន្តថាខ្លឹមសារសំខាន់នៃលិខិតដាក់ជូនស្ថានទូត នៅថ្ងៃនេះមានដូចជា៖«យើងខ្ញុំជាសមាជិកសភានៃគណបក្សសង្គ្រោះជាតិនៃប្រទេសកម្ពុជាសង្កេតឃើញថាអ្នកកាន់អំណាច របស់គណបក្សប្រជាជនកម្ពុជា ក្នុងរដ្ឋាភិបាលបានប្រព្រឹត្តិល្មើសនឹងឆន្ទះរបស់ប្រជាពលរដ្ឋ នេះដូចមានចែងក្នុងរដ្ឋធម្មនុញស្រាប់នឹងគោលការណ៍ចែងក្នុងកិច្ចព្រមព្រៀងទីក្រុងប៉ារីស កាន់តែធ្ងន់ធ្ងរទៅ ដោយបានប្រើអំណាច ដោយរំលោភក្នុងការគៀបសង្កត់សិទ្ធិសេរីភាព របស់ពលរដ្ឋ នឹងប្រើប្រាស់ប្រព័ន្ធតុលាការក្នុងការចាប់ចងឃុំឃាំង សកម្មជនដីធ្លីមន្ត្រីសិទ្ធិមនុស្សនឹងសហជីព នឹងថ្នាក់ដឹកនាំគណបក្សសង្គ្រោះជាតិផង»។
លោក សុន ឆ័យ សង្កត់ធ្ងន់ថា សហប្រធាននៃទីក្រុងប៉ារីស នឹងប្រទេសដែលជាហត្ថលេខីទទួលខុសត្រូវក្នុងការជំរុញឱ្យរដ្ឋាភិបាលកម្ពុជា បឈ្ឈប់ការរំលោភបំពានកិច្ចព្រមព្រៀងទីក្រុងប៉ារីស។ «សមាជិកសភានៃប្រទេសកម្ពុជាសូមថ្កោលទោសដាច់អហិង្កាការប្រើអំណាច ដូចបានរៀបរាប់ខាងលើនេះ ហើយសូមប្រកាសថានឹងចូលរួមជាមួយប្រជាពលរដ្ឋនឹងសហគមន៍អន្តរជាតិ ក្នុងការធ្វើឱ្យការគ្រប់គ្រងប្រទេសវិលមក ការអនុវត្តត្រឹមត្រូវតាមរដ្ឋធម្មនុញឆ្នាំ១៩៩៣វិញ ជាមួយគ្នានេះយើងសូមឱ្យសហប្រធាននៃកិច្ចព្រមព្រៀងទីក្រុងប៉ារីស រួមជាមួយប្រទេស សមាជិកអាស៊ាន និងប្រទេសហត្ថលេខីទាំងអស់ទទួលខុសត្រូវក្នុងការជំរុញឱ្យលោកនាយករដ្ឋមន្ត្រី ហ៊ុន សែន បញ្ឈប់ប្រើអំណាចដោយរំលោភទៅលើកិច្ចព្រមព្រៀងទីក្រុងប៉ារីសជាបន្ទាន់»។
ឆ្លើយតបនឹងការលើកទ្បើងរបស់ តំណាងរាស្ត្រគណបក្សសង្គ្រោះជាតិនេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា ការដាក់ញត្តិ ទៅស្ថានទូតធ្វើឡើងដោយ តំណាងរាស្ត្រគណបក្សសង្គ្រោះជាតិ គឺជាសិទ្ធិរបស់ពួកគេ ប៉ុន្តែលោកសោកស្តាយថាគណបក្សនេះ ហាក់បីដូចជាមិនយល់ពីខ្លឹមសារស្មារតីនៃកិច្ចព្រមព្រៀងទីក្រុងប៉ារីស។ លោកបន្តថា ប្រទេសដែលជាហត្ថលេខីនៃកិច្ចព្រមព្រៀងទីក្រុងប៉ារីសមិនមានតួនាទី ភារកិច្ចដោះស្រាយបញ្ហាកម្ពុជា ជម្លោះរាជរដ្ឋាភិបាលកម្ពុជានោះទេ។ លោក សុខ ឥសាន្ត ពន្យល់យ៉ាងដូច្នេះ៖ «ក្នុងបញ្ហាដែលយើងកត់សម្គាល់ស្មារតី នៃកិច្ចព្រមព្រៀងនេះគឺសហប្រធាននៃកិច្ចព្រមព្រៀងទីក្រុងប៉ារីសហ្នឹង នឹងកោះប្រជុំនៅពេលណាដែលមានឈ្លានពាន រំលោភបំពារបំពានលើឯករាជ្យភាព អធិបតេយ្យភាព មោទនភាពទឹកដី ដែលធ្វើឱ្យប៉ះពាល់ទៅដល់ប្រទេសកម្ពុជាដែលមិនអាចបំបែកបាន អាហ្នឹងបានសហប្រធាននៃកិច្ចព្រមព្រៀងទីក្រុងប៉ារីស កោះប្រជុំដើម្បីដោះស្រាយបញ្ហា ប៉ុន្តែក្រៅពីនេះស្មារតីនៃកិច្ចព្រមព្រៀងសន្តិភាពទីក្រុងប៉ារីស មិនបាននិយាយទេ»។
លោក សុខ ឥសាន្ត បញ្ជាក់ដែរថា ប្រទេសកម្ពុជាគោរពនូវលទ្ធិប្រជាធិបតេយ្យសេរី ពហុបក្ស ហើយប្រទេសដែលជាហត្ថលេខី នៃកិច្ចព្រមព្រៀងទីក្រុងប៉ារីសគ្មានហេតុផលណាមួយក្នុងការលូកដៃចូលរឿងផ្ទៃក្នុងរបស់ប្រទេសកម្ពុជានោះទេ។
លោក សុខ ឥសាន្ត៖ «មតិរបស់ឯកឧត្តមអស់លោក នៅក្នុងគណបក្សសង្គ្រោះជាតិដែលថាយើងកំពុងដើរឃ្លាតឆ្ងាយ ពីមាគានៃលទ្ធិប្រជាធិបតេយ្យសេរីពហុបក្សនេះ គឺជាការមិនត្រឹមត្រូវនឹងសភាពការជាក់ស្តែងនៅកម្ពុជា អញ្ចឹងគាត់និយាយនេះវាប្រាសចាក ពីការពិតទាំងស្រុង ហើយខ្ញុំយល់ថាការដាក់ពាក្យនេះគេទទួលមែន ក៏ប៉ុន្តែទទួលក្នុងន័យគួរសមទេ តែត្រង់ថាតួនាទីភារកិច្ចដោះស្រាយយ៉ាងណាគេមិនអាចដោះស្រាយបានទេ»។
តាមលោក សុន ឆៃ ញត្តិដែលបានដាក់ជូនទៅស្ថានទូតទាំងនោះ រួមមាន៖ស្ថានទូត បារាំង ស្ថានទូតអាមេរិក ស្ថានទូតអូស្ត្រាលី ស្ថានទូត ឥណ្ឌូនេស៊ី ស្ថានទូតចិន ស្ថានទូតអាល្លឺម៉ង់ ជាដើម។
គួរំលឹកថាកិច្ចព្រមព្រៀងសន្ដិភាពទីក្រុងប៉ារីស ២៣ តុលា ១៩៩១ គឺជាដំណោះស្រាយប្រវត្ដិសាស្ដ្រមួយជួយបញ្ចប់សង្គ្រាមស៊ីវិលនៅប្រទេសកម្ពុជាដោយនាំមកនូវសន្ដិភាពការបង្រួបបង្រួមជាតិ និងលទ្ធិប្រជាធិបតេយ្យ។ កិច្ចព្រមព្រៀងជាប្រវត្ដិសាស្ដ្រពិភពលោកនេះធ្វើឡើង នៅទីក្រុងប៉ារីប្រទេសបារាំងដោយមានប្រទេស ១៨ ជាភាគីជួយបញ្ចប់ជម្លោះរបស់ប្រទេសកម្ពុជា ក្នុងនោះមានប្រទេសមហាអំណាចទាំងប្រាំ នៃក្រុមប្រឹក្សាសន្ដិសុខនៃអង្គកាសហប្រជាជាតិផងដែរ។ កិច្ចព្រមព្រៀងនេះតម្រូវឲ្យកម្ពុជាអនុវត្ដន៍គោលនយោបាយសេរីពហុបក្សការគោរពសិទ្ធិមនុស្សជាមូលដ្ឋាន ដើម្បីឆ្ពោះទៅរកការអភិវឌ្ឍប្រទេស ដើរតាមគន្លងប្រជាធិបតេយ្យ៕
