ភ្នំពេញ៖ ជនជាប់ចោទដែលជាអ្នកតំណាងរាស្ត្រមកពីគណបក្សសង្គ្រោះជាតិ លោក អ៊ុំ សំអាន និងសហមេធាវីការពារក្ដី បានដើរចេញពីបន្ទប់សវនាការ ខណៈការជំនុំជម្រះកំពុងដំណើរការក្នុងសំណុំរឿងបង្ហោះឯកសារផែនទីសន្ធិសញ្ញាព្រំដែនកម្ពុជា-វៀតណាមនៅលើបណ្តាញសង្គមហ្វេសប៊ុក។
សហមេធាវីជនជាប់ចោទបានចាត់ទុកការជំនុំជម្រះនេះ ធ្វើឡើងមិនត្រឹមត្រូវតាមនីតិវិធីច្បាប់។ តែបែបនេះក្ដីចៅក្រមនៅតែបន្តជំនុំជម្រះរហូតដល់ចប់ ដោយប្រកាសថាសាលក្រមសំណុំរឿង លោក អ៊ំ សំអាន នឹងឱ្យដឹងនៅថ្ងៃទី១០ ខែតុលា ខាងមុខនេះ។
សាលាដំបូងរាជធានីភ្នំពេញនៅព្រឹកថ្ងៃទី ០៥ ខែ កញ្ញានេះ បានបើកសវនាការជំនុំជម្រះអ្នកតំណាងរាស្ត្រមកពីគណបក្សសង្គ្រោះជាតិ លោក អ៊ុំ សំអាន ក្នុងសំណុំរឿងបង្ហោះឯកសារផែនទីសន្ធិសញ្ញាព្រំដែនកម្ពុជា-វៀតណាម នៅលើបណ្តាញសង្គមហ្វេសប៊ុក។
នៅក្នុងសវនាការជំនុំជម្រះ ជនជាប់ចោទលោក អ៊ុំ សំអាន និងសហមេធាវីសម្រេចដើរចេញ ពីបន្ទាប់នៃសាលជំនុំជម្រះនេះ ដោយសារពួកគេចាត់ទុកថា សវនាការនេះខុសនីតិវិធីច្បាប់ ពោលគឺរំលោភរដ្ឋធម្មនុញ្ញ។
លោក ហែម សុជាតិ មេធាវីការពារជនជាប់ចោទលោក អ៊ុំ សំអាន ប្រាប់អ្នកសារព័ត៌មាននៅក្រៅរបងសាលាដំបូងរាជធានីភ្នំពេញថា មូលហេតុដែលសហមេធាវី និងជនជាប់ចោទចាត់ទុកសវនាការថា ខុសនីតិវិធី គឺទី១ បណ្តឹងសុំមោឃៈភាពនីតិវិធីរបស់សាលាដំបូងរាជធានីភ្នំពេញ នៅសាលាឧទ្ធរណ៍មិនទាន់សម្រេច។ ទី២ បទល្មើសដែលតុលាការចោទប្រកាន់តាមក្រមព្រហ្មទណ្ឌ មិនមានចែកអំពីបទល្មើសតាមបណ្តាញសង្គមហ្វេសប៊ុក(Facebook) និងប្រព័ន្ធអ៊ិនធឺណែតនោះទេ(Internet) និងទី៣ អ្នកតំណាងរាស្ត្រនៅមានអភ័យឯកសិទ្ធិសភានៅឡើយ។ លោក ហែម សុជាតិ៖«មេធាវីយល់ឃើញថា ខុសនីតិវិធី អញ្ចឹងមេធាវីមិនអាចចូលរួមសវនាការ មួយដែលខុសនីតិវិធីទេ ព្រោះកូនក្តីជាអ្នកតំណាងរាស្ត្រអញ្ចឹងត្រូវតែមានការដកអភ័យឯកសិទ្ធិឲ្យបានត្រឹមត្រូវតាមរដ្ឋធម្មនុញ្ញសិន ហើយយើងចេះតែបន្តធ្វើដែលមិនត្រឹមត្រូវស្របតាមរដ្ឋធម្មនុញ្ញនោះអញ្ចឹងវានឹងផលវិបាកតទៅទៀត សម្រាប់អ្នកតំណាងដទៃ ឬអ្នកដ៏ទៃណាមានអភ័យឯកសិទ្ធិ»។
ប៉ុន្តែហេតុផលនេះ ត្រូវបានចៅក្រមជំនុំជម្រះ លោក ហេង សុខណា បានបកស្រាយថា ការជំនុំជម្រះនៅព្រឹកមិញនេះ ត្រឹមត្រូវតាមនីតិវិធី ដោយចៅក្រមសំអាងទៅលើលិខិតរបស់រដ្ឋសភា ដែលបានបើកិច្ចប្រជុំសភាពេញអង្គអនុម័តបើកផ្លូវឲ្យតុលាការបន្តនីតិវិធីលើសំណុំរឿងលោក អ៊ុំ សំអាន តំណាងរាស្ត្រមណ្ឌលសៀមរាម។
ទាក់ទងទៅអភ័ឯកសិទ្ធិសភាវិញ ចៅក្រមបានពន្យល់ថា ករណីសំណុំរឿងបង្ហោះឯកសារផែនទីក្លែងកម្ពុជា-វៀតណាម នៅលើបណ្តាញសង្គមហ្វេសប៊ុក គឺជាបទល្មើសជាក់ស្តែង ដោយមិនចាំបាច់ដកអភ័យឯកជាមុនឡើយ។
រីឯបណ្តឹងសុំមោឃៈភាពនីតិវិធីសាលាដំបូងរាជធានីភ្នំពេញ របស់មេធាវីការពារក្តីជនជាប់ចោទ លោក ចៅក្រមបញ្ជាក់ថា សាលក្រមរបស់សាលាឧទ្ធរណ៍ បានសម្រេចនៅតែបានការដដែល ដោយបង្វិលសំណុំរឿងនេះមកឲ្យសាលាដំបូងរាជធានីភ្នំពេញចាត់ការតាមនីតិវិធី។
នៅក្នុងការជំនុំជម្រះនេះដែរ មេធាវីការពារក្តីម្នាក់ទៀតឲ្យលោក អ៊ុំ អាន គឺលោក ជួង ជូងី បានស្នើសុំឲ្យតុលាការរកអ្នកជំនាញផ្នែកច្បាប់ទាក់ទងទៅ និងការប្រើប្រាស់ប្រព័ន្ធអ៊ីនធឺណែត(Internet) និងហ្វេសប៊ុក(Facebook)ឲ្យពន្យល់អំពី ថាតើ ការបង្ហោះឯកសារនៅលើបណ្តាញសង្គមហ្វេសប៊ុក ស្ថិតនៅក្នុងបទល្មើសអ្វី និងក្រមព្រហ្មទណ្ឌមួយណាបានចែង។
នៅក្នុងសវនាការជំនុំព្រឹកថ្ងៃទី០៥កញ្ញា នេះ មានការខ្វែងគំនិតគ្នាអំពីការលើកឡើងពីការដកអភ័យសិទ្ធិសភា ដោយជនជាប់ចោទ លោក អ៊ុំ សំអាន បានបដិសេធមិនឆ្លើយរាល់សំនួររបស់ចៅក្រមជំនុំជម្រះ ដោយសារលោកទាមទារឲ្យរដ្ឋសភាដកអភ័យឯកសិទ្ធិសភាដោយសំឡេង ២ ភាគ ៣ ជាមុនសិន។
លោក អ៊ុំ សំអាន បាននិយាយថា សម្តេចនាយករដ្ឋមន្ត្រី ហ៊ុន សែន បានធ្វើរដ្ឋប្រហាររដ្ឋធម្មនុញ្ញ ដោយចាប់ខ្លួនលោកទាំងមានអភ័យឯកសិទ្ធិសភា។ លោកបានស្នើសុំចៅក្រមឲ្យអនុរក្សពន្ធនាគារដឹកលោកត្រឡប់ទៅពន្ធនាគារព្រៃសវិញ ដោយមិនចូលរួមស្តាប់ការជំនុំជម្រះនេះទៀតឡើយ។ លោក អ៊ំ សំអាន«ខ្ញុំមិននិយាយជាមួយសវនាការខុសច្បាប់នោះទេ»។
ទោះបីជាជនជាប់ចោទ និងសហមេធាវីសម្រេចដើរចេញពីបន្ទប់សវនាការក៏ដោយ តែចៅក្រមជំនុំជម្រះ បានសម្រេចបន្តជំនុំជម្រះ រហូតដល់ចប់នៅម៉ោងជាង ១១ព្រឹក ដោយបានស្តាប់ចម្លើយពីមន្ត្រីយុត្តិធម៌ម្នាក់ម្តងៗ និងពិនិត្យទៅលើភស្តុតាងជាវីឌីអូឃ្លិបដែលបានបង្ហោះនៅលើទំព័រហ្វេសប៊ុករបស់លោក អ៊ុំ សំអានហើយនឹងធ្វើការពិនិត្យទៅលើភស្តុតាងទាំងនោះ។
ចៅក្រមជំនុំជម្រះ លោក ហេង សុខណា បានសម្រេចប្រកាសសវនាការអំពីសំណុំរឿងលោក អ៊ុំ សំអាន អ្នកតំណាងរាស្ត្រគណបក្សសង្គ្រោះជាតិមកពីមណ្ឌលសៀមរាម នៅថ្ងៃទី ១០ ខែ តុលា ឆ្នាំ ២០១៦។ លោក អ៊ុំ សំអាន ត្រូវបានចាប់ខ្លួននៅយប់នៅថ្ងៃទី ១០ ខែ មេសា ឆ្នាំ ២០១៦ នៅខេត្តសៀមរាម បន្ទាប់ពីលោកមកពីសហរដ្ឋអាមេរិក ដោយតុលាការចោទប្រកាន់ពី បទញុះញង់ឲ្យប្រព្រឹត្តបទឧក្រិដ្ឋជាអាទិ៍ ដែលបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និង បទញុះញង់ឲ្យមានការរើសអើង៕
