ភ្នំពេញ៖ អាជ្ញាធរបានដាក់បារាស់បិទផ្លូវ ឆ្លងកាត់ខាងមុខទីស្នាក់ការគណបក្សសង្គ្រោះជាតិ ខណៈដែលគណបក្សប្រឆាំងធំនេះ ត្រូវដាក់ញត្តិទៅកាន់ស្ថានទូតមួយចំនួននៅរាជធានីភ្នំពេញដើម្បីសុំអន្ដរាគមន៍ អោយស្ថានទូតទាំងនោះពិនិត្យមើលការអនុវត្ត កិច្ចព្រមព្រៀងសន្ដិភាពទីក្រុងប៉ារីសឡើងវិញ។
តាមសេចក្ដីរាយការណ៍របស់អ្នករាយការណ៍នៃវិទ្យុស្ដ្រីFM102 ដែលបានចុះយកព័ត៌មាននៅទីនោះ ការបិទផ្លូវនេះ ធ្វើឡើងតាំងពីម៉ោង៦ព្រឹកថ្ងៃទី ០៥ កញ្ញា នេះ ដោយដាក់បារាស់ជាច្រើនជាន់ ហើយសមត្ថកិច្ចបំពាក់ដោយអាវុធគ្រប់ដៃ។
អ្នកធ្វើដំណើរតាមដងផ្លូវមានការរអ៊ូរទាំ និងរិះគន់ចំណាត់ការរបស់អាជ្ញាធរ។
យ៉ាងណាក៏ដោយវិទ្យុស្ដ្រីFM102 មិនអាចសុំការបំភ្លឺភា្លមៗពីអ្នកនាំពាក្យសាលារាជធានីភ្នំពេញ ឬក្រសួងមហាផ្ទៃបាននៅឡើយទេ ខណៈកងប្រដាប់អាវុធដែលឈរបិទផ្លូវនោះ ប្រាប់អ្នកសារព័ត៌មានថា គេធ្វើឡើងតាមការបញ្ជាពីថ្នាក់លើ។
បន្ទាប់ពីការបិទផ្លូវដោយសមត្ថកិច្ចនោះ គឺ កាលពីថ្ងៃទី៣០ និងថ្ងៃទី៣១ កងទ័ពបានចល័តទ័ពនៅម្ដុំទីស្នាក់ការគណបក្សសង្គ្រោះជាតិ ដោយអ្នកវិភាគ ពិនិត្យឃើញថា ជាសញ្ញានៃការគំរាមផ្នែកនយោបាយ ទៅលើគណបក្សប្រឆាំង។
សូមជម្រាបថា នៅក្នុងស្នាក់ការ គណបក្សសង្គ្រោះជាតិនោះ គឺ លោក កឹម សុខា ប្រធានស្ដីទីគណបក្សដែលរងនូវការកោះហៅពីតុលាការ កំពុងសម្ងំនៅទីនោះ ខណៈដែលតុលាការរាជធានីភ្នំពេញ នឹងបើកជំនុំជម្រះក្ដីករណីរបស់លោក ពាក់ព័ន្ធសំនុំរឿង សញ្ចារកម្ម ដែលគេថា លោក មានទំនាក់ទំនងជាមួយនិងនាង ខុម ចាន់តារាទី ហៅស្រីមុំ៕
