ចិន៖ យោងតាមបណ្តាញផ្សាយព័ត៌មាន BBC បានឲ្យដឹងថា សហរដ្ឋអាមេរិក និងចិន រួមគ្នាទទួលខុសត្រូវចំនួន ៤០ ភាគរយនៃការបំភាយឧស្ម័នកាបោនលើពិភពលោក។ ឥឡូវនេះ ប្រទេសមហាអំណាចទាំងពីរអាមេរិក និងចិន បានផ្តល់សច្ចាប័នលើកិច្ចព្រមព្រៀងអាកាសធាតុសកលទីក្រុងប៉ារីស។
បន្ទាប់ពីដំណើរមកដល់របស់មេដឹកនាំពិភពលោកនៃក្រុមប្រទេស G20 ចូលរួមកិច្ចប្រជុំកំពូលនៅទីក្រុងហាងចូវ ប្រទេសចិន លោក អូបាម៉ា ប្រធានាធិបតីអាមេរិកបានថ្លែងថា៖ «នេះជាប្រវត្តិសាស្ត្រដ៏សំខាន់ក្នុងកិច្ចខិតខំប្រឹងប្រែងនៅពេលបច្ចុប្បន្ននេះ»។
ប្រទេសចិនត្រូវបានគេស្គាល់ថា បានបំពុលបរិយាកាសខ្លាំងជាងគេបំផុតលើពិភពលោក ដោយបំភាយឧស្ម័នកាបូនិច (CO2) ដែលបង្កឱ្យមានការប្រែប្រួលអាកាសធាតុដ៏អាក្រក់។
ការបំភាយឧស្ម័នកាបូនិច CO2 បានជំរុញឱ្យអាកាសធាតុមានការផ្លាស់ប្តូរពីមួយឆ្នាំទៅមួយឆ្នាំ។
កាលពីចុងខែធ្នូ ប្រទេសជាច្រើនបានយល់ព្រមកាត់បន្ថយការបំភាយឧស្ម័ន ដើម្បីរក្សាកំណើនសកលជាមធ្យមឲ្យស្ថិតនៅក្រោមសីតុណ្ហភាព ២ អង់ស្សាសេ។
កិច្ចព្រមព្រៀងទីក្រុងប៉ារីស គឺកិច្ចព្រមព្រៀងអាកាសធាតុដំបូងបំផុតរបស់ពិភពលោក។ កិច្ចព្រមព្រៀងនេះ នឹងចូលជាធរមានដោយស្របច្បាប់ បន្ទាប់ពីកិច្ចព្រមព្រៀងនេះត្រូវបានផ្តល់សច្ចាប័នដោយប្រទេសយ៉ាងតិចណាស់ ៥៥ ដែលប្រទេសទាំងនោះ ផលិតបានរវាង ៥៥% នៃការបំភាយឧស្ម័នកាបោនជាសកល។
សមាជិកអចិន្ត្រៃយ៍សភាប្រជាជនចិនបានអនុម័តតាមសំណើ ដើម្បីពិនិត្យ និងផ្តល់សច្ចាប័នលើកិច្ចព្រមព្រៀងទីក្រុងប៉ារីស៕
