ប្រធានាធិបតីភីលីពីន លោក Rodrigo Duterte បដិសេធមិនជួបជាមួយ អគ្គលេខាធិការអង្គការសហប្រជាជាតិ បាន គីមូន ដែលលោក បាន គីមូន នឹងមានវត្តមាននៃកិច្ចប្រជុំកំពូល អាស៊ាន អង្គការសហប្រជាជាតិ នៅសប្ដាហ៍ក្រោយ នៅទីក្រុងវៀងច័ន្ទ នៃប្រទេសឡាវ។
អ្នកនាំពាក្យរបស់លោក បាន គីមូន គឺ លោក Stephane Dujarric បាននិយាយថា លោក បាន គីមូន បានស្នើជួបលោកប្រធានាធិបតី Duterte ប៉ុន្ដែសំណើនេះត្រូវបានលោក Duterte ច្រានចោល។
អ្នកនាំពាក្យប្រធានាធិបតីភីលីពីន លោក Ernesto Abella បានប្រាប់ទីភ្នាក់ងារ សារព័ត៌មាន Reuters ថា លោក Duterte នឹងមិនជួបលោក បាន គីមូន ទេ។ ប៉ុន្ដែអ្នកនាំពាក្យរូបនេះ មិនបានបញ្ជាក់ថា មូលហេតុអ្វីនោះទេ។
កាលពីសប្ដាហ៍មុន អ្នកជំនាញអង្គការសហប្រជាជាតិ បានទទូចអោយទីក្រុងម៉ានីល បញ្ឈប់ការប្រហារជីវិតមនុស្សក្រៅប្រព័ន្ធតុលាការ ដោយចាត់ទុកថា ជាការបំពារបំពាន យ៉ាងធ្ងន់ធ្ងរលើសិទ្ធិមនុស្ស។
ចាប់តាំងពីប្រធានាធិបតី Duterte ឡើងកាន់តំណែងកាលពីថ្ងៃទី ៣០មិថុនា មកនោះ ឧក្រិដ្ឋជនគ្រឿញៀន យ៉ាងតិច២ពាន់នាក់ ត្រូវបានបាញ់សម្លាប់។
លោក Duterte បានប្រកាសសង្គ្រាមប្រឆាំងគ្រឿងញៀន ដោយសម្លាប់មនុស្សយ៉ាងរង្គាលធ្វើអោយសហគមន៍អន្ដរជាតិជាច្រើនថ្កោលទោស ជាពិសេសក្រុមប្រឹក្សាសិទ្ធិមនុស្សអង្គការសហប្រជាជាតិ។
លោក Duterte ដោយប្រតិកម្មនិងការថ្កោលទោសនេះ លោកបានប្រកាស ថា នឹងដើរចេញ ពីសមាជិកភាពរបស់អង្គការសហប្រជាជាតិ៕ ប្រភព Channel News Asia
