ភ្នំពេញ៖ សាលាឧទ្ធរណ៍នៅព្រឹកថ្ងៃសុក្រនេះ សម្រេចច្រានចោលបណ្ដឹងមោឃភាព ដែលប្ដឹងដោយ មេធាវី របស់មន្ដ្រីសិទ្ធិមនុស្សអាដហុក ជំទាស់ចំពោះអង្គភាពប្រឆាំងអំពើពុករលួយ ករណីឃុំខ្លួន ហួសម៉ោងរដ្ឋបាល និងរំលោភនីតិវិធី។ការច្រានចោលរបស់សាលាឧទ្ធរណ៍ធ្វើឡើងនៅចំពោះមុខ ជនជាប់ចោទទាំងបួនរូប នៃសមាគមអាដហុក និងនៅចំពោះមុខមេធាវី។
តាមអ្នករាយការណ៍ព័ត៌មានវិទ្យុស្ដ្រី សាលាឧទ្ធរណ៍ បានសម្រេចថា វិធានការរបស់អង្គភាពប្រឆាំងអំពើពុករលួយស្របតាមក្រមនីតិវិធីព្រហ្មទណ្ឌ។
យ៉ាងណាក៏ដោយ មេធាវីការពារក្ដី អោយ សមាគមអាដហុក មិនបានថ្លែងអ្វីទៅកាន់អ្នកសារព័ត៌មានទេ ខណៈដែលអ្នកសារព័ត៌មាន រង់ចាំសាកសួរនៅខាងក្រៅបន្ទប់ការអានសាលដីការ របស់សាលាឧទ្ធរណ៍។
នៅថ្ងៃនេះ មន្ត្រីជាន់ខ្ពស់សមាគមអាដហុក ទាំងបួនរូប គឺ មាន លោក ណៃ វង់ដា លោក យី សុខសាន្ដ លោកស្រី លឹម មុនី និងលោក នី សុខា ត្រូវបាននាំខ្លួនចូលសាលាឧទ្ធរណ៍ ក្នុងសំណុំរឿង មោឃភាព ដែលមេធាវីបានប្ដឹងករណី អង្គភាពប្រឆាំងអំពើពុករលួយសួរចម្លើយអ្នកទាំងនោះ ហួសម៉ោងរដ្ឋបាល និងរំលោភនីតិវិធីតុលាការ។
អ្នកទាំងបួននាក់នេះ ត្រូវបានតុលាការរាជធានីភ្នំពេញ ចោទប្រកាន់ពីបទសូកប៉ាន់សាក្សី នាងខុមចាន់តារាទី ហៅស្រីមុំ ពាក់ព័ន្ធនិងប្រធានស្ដីទីគណបក្សសង្គ្រោះជាតិ លោក កឹម សុខា៕