ភ្នំពេញ៖ ថ្ងៃទី០១ ខែកញ្ញា ឆ្នាំ២០១៦នេះ គឺជាការចាប់ផ្ដើមយុទ្ធនាការចុះឈ្មោះបោះឆ្នោត ប្រជាពលរដ្ឋខ្មែរមានអាយុចាប់ពី ១៨ឆ្នាំឡើងទៅ ត្រូវចុះឈ្មោះបោះឆ្នោត ខណៈការិយាល័យទូទាំងប្រទេស បានបើកតាំងពីម៉ោង ៧ព្រឹក។
ជាមួយនឹងទ្វារការិយាល័យបោះឆ្នោតបានចាប់ផ្តើមឡើងនេះ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) នៅម៉ោង៨ព្រឹកនេះ បានអញ្ជើញទៅចុះឈ្មោះនៅការិយាល័យក្នុងសង្កាត់បឹងកេងកង៣ ខណ្ឌចំការមន រីឯលោក គួយ ប៊ុនរឿន អនុប្រធាន គ.ជ.ប នឹងទៅចុះឈ្មោះនៅការិយាល័យក្នុងសង្កាត់ទួលស្វាយព្រៃទី១ នាម៉ោងប្រមាណ ១០ព្រឹក។
យោងតាមស្ថិតិរបស់ គ.ជ.ប ក្នុងចំណោមប្រជាពលរដ្ឋជាង ១៥លាននាក់ មានអ្នកគ្រប់អាយុបោះឆ្នោតចាប់ពី ១៨ឆ្នាំឡើង ទៅប្រមាណ ជិត១០លាននាក់។
បើតាមអ្វីដែលបានឆ្លើយបំភ្លឺកន្លងមក របស់មន្ដ្រីអគ្គលេខាធិការរង គ.ជ.ប លោក សោម សូលីដា ការចុះបញ្ជីឈ្មោះបោះឆ្នោតថ្មី ដែលធ្វើឡើងតាមប្រព័ន្ធកុំព្យូទ័រ នៅពេលនេះ គឺ មានភាពច្បាស់លាស់ និង សុក្រឹត្យជាងការចុះបញ្ជីឈ្មោះបោះឆ្នោត នាពេលកន្លងទៅ៕
