ភ្នំពេញ៖ ពេលនេះ គ្មាននរណា អះអាងថា លោកកឹម សុខា ប្រធានស្ដីទីគណបក្សសង្គ្រោះជាតិ បាត់បង់សិទ្ធិចុះបោះឆ្នោត នោះទេព្រោះពុំមានសាក្រមរបស់តុលាការផ្តន្ទាទោស លោកនោះទេ ទោះជាលោកមានរឿងក្ដីនៅតុលាការក៏ដោយ។
តែជាមួយគ្នានេះ លោក បានអំពាវនាវឱ្យពលរដ្ឋខ្មែរដែលមានអាយុពី១៨ឆ្នាំត្រូវទៅចុះបោះឆ្នោតដោយចាត់ទុកថាពលរដ្ឋគឺជាអ្នកកំណត់ជោគវាសនារបស់ប្រទេស។ ខណៈលោក កឹសុខាអំពាវនាវដូចនេះ គឺលោកសមរង្ស៊ីប្រធានរបស់លោកវិញ កាន់តែលំបាកទៀត ព្រោះមេបក្សប្រឆាំងរូបនេះបាន គេចខ្លួន នៅក្រៅប្រទេស។ កញ្ញា ច្រឹក ស្រី អូន រាយការណ៍បន្ត៖
ប្រធានស្ដីទីគណបក្សសង្គ្រោះជាតិ ដែលតុលាការរាជធានីភ្នំពេញកោះហៅចូលខ្លួនសវនាការនៅសប្ដាហ៍ក្រោយនេះ ក្នុងសំណុំរឿងមិនចូលខ្លួនតាមដីកាកោះ បានអំពាវនាវ ឱ្យពលរដ្ឋខ្មែរមានអាយុ១៨ឆ្នាំឡើងទៅ សូមទៅចុះបោះឆ្នោត ខណៈខ្លួនលោកមិនបានបញ្ជាក់ថា នឹងទៅចុះបោះឆ្នោត នៅពេលណានោះទេ ។
លោក កឹមសុខា បានថ្លែងអំពាវនាវដូចនេះ តាមរយៈ បណ្ដាញសង្គម នៃគណបក្សសង្គ្រោះជាតិ ដែលត្រូវបាន ផ្សព្វផ្សាយ នៅថ្ងៃទី៣១ សីហានេះ ។
សេចក្ដីអំពាវនាវរបស់លោក មានដូចនេះ៖
-ការបោះឆ្នោតមានសារៈសំខាន់ណាស់ សម្រាប់ជោគវាសនា អនាគតរបស់ខ្លួនយើងផ្ទាល់ និងប្រទេសជាតិយើង
-បងប្អូនអាចបោះឆ្នោតបានលុះត្រាតែបងប្អូនបានចុះឈ្មោះបោះឆ្នោត
-បងប្អូនចុះឈ្មោះបោះឆ្នោតនៅក្នុងឃុំ-សង្កាត់ណា បងប្អូនត្រូវទៅបោះឆ្នោតនៅ ឃុំ-សង្កាត់ នោះ
-បើបងប្អូនចង់ជ្រើសរើសមេដឹកនាំល្អក្នុង ឃុំ-សង្កាត់ របស់បងប្អូន ដើម្បីការរីកចម្រើនភូមិ-ឃុំ-សង្កាត់ និងដើម្បី ឪពុក-ម្ដាយ និងក្រុមគ្រួសារបងប្អូនផ្ទាល់ លុះត្រាតែបងប្អូនទៅចុះឈ្មោះបោះឆ្នោតនៅក្នុងឃុំ-សង្កាត់របស់បងប្អូនផ្ទាល់។
លោក កឹម សុខា មិនបានបញ្ចាក់ថាលោកនឹងទៅចុះឈ្មោះបោះឆ្នោតនៅពេលណាទេ។
លោក អេង ឆៃអ៊ាង មន្ត្រីជាន់ខ្ពស់នៃគណបក្សសង្គ្រោះជាតិ មិនបានអះអាងថា លោក កឹមសុខា ប្រធានរបស់លោកនឹងទៅចុះឈ្មោះបោះឆ្នោតនៅពេលណានោះទេ បើទោះជា អ្នកសារព័ត៌មានបាន ជជីកសួរជាច្រើនដងក៏ដោយ គឺលោកគ្រាន់តែនិយាយថា ដល់ពេលណានៅពេលនោះហើយ។
លោក អេង ឆៃអ៊ាង ៖«លោកគាត់មិនទាន់សម្រេចទេគាត់គ្រាន់តែអំពាវនាវ ឲ្យប្រជាពលរដ្ឋទៅចុះឈ្មោះបោះឆ្នោតមិនអ្វីទេពេលវេលា វាមានការប្រែប្រួលហើយការចុះឈ្មោះបោះឆ្នោតមានពេលយូរដែរ៣ខែ»។
តាមច្បាប់ បោះឆ្នោតប្រទេសកម្ពុជា លោក កឹម សុខា អាចចុះឈ្មោះបោះឆ្នោតបាននៅថ្ងៃណាក៏បាន ព្រោះការចុះឈ្មោះបោះឆ្នោត មានរយៈពេល ៩០ថ្ងៃ ដោយចាប់ផ្ដើមពីថ្ងៃទី១ កញ្ញា ដល់ថ្ងៃទី២៩ វិច្ឆិកា ហើយម្យ៉ាងទៀតលោក កឹម សុខា នៅតែជាជនគ្មានទោសព្រោះតុលាការមិនទាន់រកឃើញលោកមានកំហុស និងមានទោសអ្វីទេ។
ចុះចំណែកលោក សម រង្ស៊ី វិញដែលជាប្រធានលោក កឹម សុខា លោកអាចចុះឈ្មោះបោះឆ្នោតបានដែរឬទេ?
លោក អេង ឆៃអ៊ាង បញ្ជាក់ប្រាប់ជាមួយវិទ្យុស្ត្រីថា លោក សម រង្ស៊ី ក៏មានលទ្ធភាពមកចុះឈ្មោះបោះឆ្នោតបាននៅគ្រប់ពេល ឱ្យតែលោកវិលចូលប្រទេសវិញ។
លោកបញ្ជាក់ថា ករណីរបស់លោក សម រង្ស៊ី គឺជារឿងនយោបាយ ដែលត្រូវដោះស្រាយដោយការចរចា។
lលោក អេង ឆៃអ៊ាង៖«សំខាន់ការបោះឆ្នោត កាលថ្នាក់ដឹកនាំជាន់ខ្ពស់បក្សប្រឆាំងត្រូវបានគេរារាំងមិនឲ្យចុះឈ្មោះបោះឆ្នោត។ ការបោះឆ្នោតនោះមិនអាចចាក់ទុកជាការបោះឆ្នោតត្រឹមត្រូវ។ រឿងនេះមិនសង្ឃឹមទេព្រោះរឿងនេះមិនមែនជារឿងតុលាការទេវាជារឿងនយោបាយ… » ។
ស្របនឹងការពន្យល់របស់ លោកអេង ឆៃអ៊ាង លោក សោម សូរិដា អគ្គលេខាធិការរង គ.ជ.ប បានប្រាប់អ្នកសារព័ត៌មាន ក្នុងកម្មវិធីមួយស្ដីពីនីតិវិធីនៃការចុះឈ្មោះបោះឆ្នោតកាលពីថ្ងៃអង្គារទី៣០សីហាថា លោក សមរង្ស៊ី មានលទ្ធភាពចុះបោះឆ្នោត ប៉ុន្តែបើមានបណ្ដឹងជំទាស់ គេនឹងសើរើ ឡើងវិញ។
លោក សោម សូ រិដា៖«តាមមាត្រា៤១ និង៥១ ឯកឧត្តម សម រង្ស៊ី អាចចុះឈ្មោះបោះឆ្នោតបានព្រោះបើគាត់ទៅបង្ហាញខ្លួននៅការិយាល័ចុះឈ្មោះបោះឆ្នោត ស្របតាមមាត្រា៥១ បើមានឯកសារនិងលក្ខខណ្ឌគ្រប់គ្រាន់គាត់អាចចុះឈ្មោះបោះឆ្នោតបាន។ តែគាត់មានសិទ្ធមានឈ្មោះក្នុងបញ្ជីបោះឆ្នោតឬអត់។ ដើម្បីមានឈ្មោះបោះឆ្នោតមានអាយុ១៨ឆ្នាំ សញ្ជាតិខ្មែរ ទីលំនៅ មិនវិកល់ចរិក និង មិនមានទោស»។
យ៉ាងណា ក៏ដោយ មន្ត្រីបក្សកាន់អំណាច តែងតែព្រមានថា បើលោក សម រង្ស៊ី ចូលប្រទេសវិញ គឺនឹងមានការចាប់ខ្លួន ព្រោះដីកាចាប់ខ្លួនដោយសាលាឧទ្ធរណ៍បាន ចូលជាធរមានហើយ។
លោក សម រង្ស៊ី មិនត្រឹមតែរងការចាប់ខ្លួន ករណីបណ្ដឹងរបស់លោក ហោ ណាំហុង នោះទេ គឺលោកនៅមានបណ្ដឹង កោះហៅឱ្យចូលខ្លួន ដោយតុលាការរាជធានីភ្នំពេញ ករណីបរិហារកេរ្តិ៍ មន្ត្រីបក្សកាន់អំណាច យ៉ាងតិច ៤សំណុំរឿងទៀត។ តែបែបនេះក្ដី មជ្ឈដ្ឋាន មួយចំនួន បានហៅមេបក្សប្រឆាំងល្បីរូបនេះថា ជាអ្នកទោសនយោបាយដែលមិនធ្លាប់បានដេកគុក ម្ដងណាឡើយ ខណៈលោកបានចូលប្រទេសវិញ តាមការចរចានយោបាយ និងការលើកលែងទោស ពីព្រះមហាក្សត្រ ហើយបើគិតគឺមានចំនួន ៤លើកមកហើយ។
គេរំពឹងថា ពលរដ្ឋខ្មែរដែលមានអាយុចាប់ពី១៨ឆ្នាំ ទៅ មានជិត១០លាននាក់ នឹងទៅ ចុះឈ្មោះបោះឆ្នោតដោយការចុះឈ្មោះបោះឆ្នោតលើកនេះធ្វើតាមរយៈប្រព័ន្ធកុំព្យូទ័រ៕
