ញូដេលី៖ លោក John Kerry រដ្ឋមន្ត្រីការបរទេសសហរដ្ឋអាមេរិក នៅថ្ងៃពុធទី ៣១សីហានេះ បានអំពាវនាវទៅកាន់ប្រទេសចិន និងប្រទេសហ្វីលីពីន ដើម្បីឱ្យប្រទេសទាំងពីរនេះគោរពតាមការសម្រេចរបស់មជ្ឈឹត្តការអន្តរជាតិក្រុងឡាអេ លើបញ្ហាជំលោះដែនទឹកសមុទ្រចិនខាងត្បូង។
លោក Kerry បានថ្លែងទៅកាន់សិស្សនិស្សិតក្នុងដំណើរទស្សនកិច្ចរយៈពេលពីរថ្ងៃ នៅទីក្រុង New Delhi ថា៖«នេះជាឱកាសសំខាន់ដើម្បីលើកកម្ពស់សេចក្តីសម្រេចកំរិតអន្ដរជាតិដែលបានសម្រេចរួចហើយនោះ ហើយវាក៏បង្ហាញការគោរពចំពោះច្បាប់អន្តរជាតិ និងគាំទ្រដល់ស្ថិរភាព និងភាពរុងរឿងក្នុងតំបន់»។
ការកត់សម្គាល់របស់លោក Kerry នេះ ធ្វើឡើងមុនជំនួបកំពូលក្រុមប្រទេស G20 ដែលនឹងប្រព្រឹត្តទៅនៅប្រទេសចិននៅថ្ងៃទី ៤ ខែកញ្ញា និងទី ៥ ដែលត្រូវមានការចូលរួមដោយមេដឹកនាំសកលផងដែរ។
ម្សិលមិញនេះមេដឹកនាំវៀតណាមលោក Tran Dai Quang ក៏បានព្រមានពីសង្គ្រាមដែលអាចកើតមានឡើងនៅក្នុងសមុទ្រចិនខាងត្បូង ដែលលោកថា នឹងគ្មានអ្នកឈ្នះ និងអ្នកចាញ់នោះទេ ប៉ុន្តែគឺមានតែអ្នកឈឺចាប់៕ប្រភព៖CNA
