ភ្នំពេញ៖ រដ្ឋមន្ដ្រីក្រសួងព័ត៌មានទទូចដល់អ្នកសារព័ត៌មាន បញ្ចៀសឲ្យបាននូវការបញ្ចេញព័ត៌មាន ឬការធ្វើអត្ថាធិប្បាយដោយកុំបំប៉ោងសភាពការណ៍ នៅក្នុងអំឡុងពេលបោះឆ្នោតដែលនាំឲ្យមានការភ័ន្ដច្រឡំដល់សារធារណៈមតិមួយចំនួន។
លោក ខៀវ កាញ្ញារិទ្ធ បានថ្លែងដូចនេះ ក្រោយពីបញ្ចប់កម្មវិធីសិក្ខាសាលា ស្ដីពី នីតិវិធី និងច្បាប់បោះឆ្នោត នៃព្រះរាជាណាចក្រកម្ពុជានៅថ្ងៃទី៣០ សីហានេះ ។
លោក ខៀវ កាញ្ញារិទ្ធ បានបញ្ជាក់ដូចនេះថា៖«ជាធម្មតានៅថ្ងៃបោះឆ្នោត ជាធម្មតាគេសុំឲ្យអ្នកកាសែតនៅស្ងាត់ស្ងៀម ដោយយើងដឹងហើយថា ការបោះឆ្នោត បួន ប្រាំលើកមកនេះ យើងដឹងថា របៀបផ្សព្វផ្សាយមានពីរបែប ទី១ ការផ្សព្វផ្សាយដោយគ្រាន់តែយកមនុស្ស ពីរ បីនាក់មកដើម្បីបំប៉ោងសំឡេងធំ ដូច្នេះហើយវាហាក់ដូចជាប៉ះពាល់លើការប្រព្រឹត្ដិទៅលើការបោះឆ្នោត ខ្ញុំមិននិយាយជំនួសគ.ជ.ប ទេ ប៉ុន្ដែនិយាយរួមគឺយើងស្នើរសុំឲ្យមានការស្ងាត់ស្ងៀម តែពេលក្រោយពេលបិទហិបឆ្នោត ហើយទើបអ្នកកាសែតធ្វើអត្ថាធិប្បាយអ្វីផ្សេងបានទៀត»។
នៅក្នុងពិធីនេះដែរ អគ្គលេខាធិការរងម្នាក់នៃគណកម្មាធិការជាតិរៀបចំការបោះឆ្នោត គ.ជ.ប បានអះអាងថា ប្រព័ន្ធបោះឆ្នោតនៅឆ្នាំនេះ ធានាបានមិនឲ្យមានការផ្ទុះរឿងខុសប្រក្រតីអ្វីទេ ដូចជាការលួចទិន្នន័យតួលេខសន្លឹកឆ្នោតជាដើម ។
ការបោះឆ្នោតក្រុមប្រឹក្សាឃុំសង្កាត់ ឆ្នាំ ២០១៧ និង ការបោះឆ្នោតសភាឆ្នាំ ២០១៨ ដែលគេរំពឹងថា មានអ្នកសង្កេតការណ៍អន្ដរជាតិ ជាច្រើនចូលរួមមកឃ្លាំមើលការបោះឆ្នោតផងដែរ នោះនឹងទទួលបានការលើកទឹកចិត្ដពីអ្នកបោះឆ្នោត និងបក្សនយោបាយដែលពាក់ព័ន្ធ ៕
