ភ្នំពេញ៖ អ្នកនាំពាក្យគណៈកម្មាធិការជាតិ រៀបចំការបោះឆ្នោត គ.ជ.ប អះអាងថាស្ថាប័ន គ.ជ.ប បានត្រៀម ដើម្បីបើកយុទ្ធនាការ ចុះឈ្មោះបោះឆ្នោតក្រុមប្រឹក្សា ឃុំសង្កាត់ ដែលនឹងប្រព្រឹត្តិទៅ នៅថ្ងៃទី០១ខែកញ្ញា ដល់ថ្ងៃទី២៩ខែវិច្ឆិកា ខាងមុខបានសព្វគ្រប់ហើយ។
លោក ហង្ស ពុទ្ធា បានបញ្ជាក់ដូចនេះ នៅពេលលោកចូលរួមនៅក្នុងកម្មវិធីសិក្ខាសាលា ស្តីពីការចុះឈ្មោះបោះឆ្នោត កាលថ្ងៃទី ២៩ខែសីហា ឆ្នាំ២០១៦។
លោក ហង្ស ពុទ្ធា បានបញ្ជាក់ថា៖ «គ.ជ.ប បានត្រៀមកិច្ចការ របស់ខ្លួនរួចរាល់ហើយ ដើម្បីបើកយុទ្ធនាការ ចុះឈ្មោះបោះឆ្នោតក្រុមប្រឹក្សា ឃុំសង្កាត់ នៅទូទាំងប្រទេស»។
ចំណែកអ្នកសង្កេតការណ៍វិញ អ្នកនាំពាក្យ គ.ជ.ប ថា អាចចុះឈ្មោះបាននៅ កន្លែងខ្លួនចង់ ចុះសង្កេតការណ៍។
ការចុះឈ្មោះបោះឆ្នោតឃុំប្រឹក្សា ឃុំសង្កាត់ នឹងចាប់ផ្ដើមនៅថ្ងៃទី ០១ខែកញ្ញា ដល់ថ្ងៃទី ២៩ខែវិច្ឆិកាខាងមុខ។
ការចុះឈ្មោះបោះឆ្នោត នៅឆ្នាំនេះ ក្រោមការឧបត្ថម្ភ របស់អ្នកជំនាញ មកពីប្រទេសជប៉ុន និង សហភាពអឺរ៉ុប ដោយមាន ការប្រើនិន្នន័យ តាមកុំព្យូទ័រ ដែលគេរំពឹងថា មានតម្លាព ហើយការលួចបន្លំ នឹងមិនអាចមានទៀតទេ។ ជាមួយគ្នានេះ ពលរដ្ឋខ្មែរមានអាយុ១៨ឆ្នាំ ត្រូវទៅចុះឈ្មោះបោះឆ្នោត អាចមានចំនួន ជិត១០លាននាក់។
នៅពេលជាមួយគ្នា គណបក្សប្រឆាំង បានអះអាងថាខ្លួននឹងដាក់ពង្រាយអ្នកសង្កេតការណ៍ ជាង២០០០នាក់ នៅតាមការិយាល័យ ចុះបោះឆ្នោត ទាំងអស់នៅទូទាំងប្រទេស៕