ភ្នំពេញ៖ រដ្ឋលេខាធិការក្រសួងការបរទេស លោក ទ្បុង វិសាលោ បានថ្លែងថា ប្រសិនបើប្រទេសវៀតណាមមិនបញ្ឈប់សង់ប៉ុស្តិ៍រដ្ឋបាល ឬការជីកស្រះនោះទេ កម្ពុជានឹងស្នើឱ្យរើចេញជាបន្ទាន់។
ការថ្លែងដូចនេះ បន្ទាប់ពីលោក ចេញពីកិច្ចប្រជុំចង្អៀតរវាងប្រធានគណៈកម្មការចម្រុះខណ្ឌសីមានិងបោះបង្គោលព្រំដែនគោក កម្ពុជា-វៀតណាម នៅព្រឹកថ្ងៃទី ២៩ខែសីហាឆ្នាំ២០១៦នេះនៅទីស្ដីការគណៈរដ្ឋមន្ត្រី។ អ្នកវិភាគ ថាដើម្បីឱ្យមានភាពប្រាកដប្រជា គឺ ភាគីទាំង២ត្រូវស្នើឱ្យអ្នកជំនាញប្រទេស ជួយក្នុងរឿងនេះ។ លោក ជួន សារ៉េត រាយការណ៍ពីព័ត៌មាននេះ
លោក ទ្បុង វិសាលោ បានផ្តល់បទសម្ភាសន៍ជាមួយអ្នកសារព័ត៌មាននៅថ្ងៃនេះថា កំណត់ទូតដែលកម្ពុជាបានដាក់ទៅវៀតណាមឱ្យបញ្ឈប់សកម្មភាពនានា និងការរំលោភបំពានមកលើកម្ពុជា សង់ប៉ុស្តិ៍រដ្ឋបាល ការជីកស្រះ និងសាងសង់ផ្លូវជាដើម។
ត្រង់ចំនុចនេះលោក បានអះអាងថា វៀតណាមបានទទួលយកសំណើររបស់ប្រទេសកម្ពុជាទៅពិភាក្សាបន្តនៅអន្តរក្រសួងរបស់ប្រទេសពួកគេ។ ប៉ុន្តែលោក សង្កត់ធ្ងន់ថា ប្រសិនបើវៀតណាមនៅតែបន្តសកម្មភាពរំលោភបំពានតាមរយៈការសាងសង់ប៉ុស្តិ៍រដ្ឋបាល ឬសាងសង់ផ្លូវជាដើមនោះ លោកនឹងឱ្យរុះរើចេញវិញ។
លោក ទ្បុង វិសាលោ៖ «គេថាគេចាំគេទៅប្រជុំពិភាក្សាជាមួយក្រសួងពាក់ព័ន្ធគេ គេឆ្លើយប៉ុណ្ណឹង ខ្ញុំបានតវ៉ាថាប្រសិនបើហ៊ានធ្វើខ្ញុំឱ្យរុះរើចេញចប់ហើយបើនិយាយជាមួយពាក់ព័ន្ធផង»។
រដ្ឋលេខាធិការក្រសួងការបរទេសរូបនេះ គូសបញ្ជាក់ដែរថា ទាក់ទងនឹងកំណត់ទូតរបស់កម្ពុជាដែលបានដាក់ទៅប្រទេសវៀតណាម ហើយប្រទេសវៀតណាមមិនដែលបានឆ្លើយតបនោះ តាមរយៈកិច្ចប្រជុំកម្ពុជា-វៀតណាមព្រឹកមិញនេះភាគីវៀតណាមបានទទួលយកសំណើររបស់កម្ពុជាទៅពិភាក្សាជាមួយក្រសួងពាក់ព័ន្ធរបស់ប្រទេសពួកគេពីការស្នើរបស់កម្ពុជា ។
លោក ទ្បុង វិសាលោ៖ «ខ្ញុំថាកំណត់ទូតយើងសរសេរទៅគេសរសេរមក ប៉ុន្តែវាធម្មតាតែវាវៀតណាមគាត់សរសេរមកគាត់ថានៅលើទឹកដីរបស់គាត់អញ្ចឹងយើងត្រូវបកទៅវិញវាឡើងច្រើនដោយសារវាតទល់គ្នាចឹងហើយទីបញ្ចប់គាត់ឆ្លើយថាសរុបសេចក្តីគាត់ឆ្លើយថាចាំយកទៅពិភាក្សាជាមួយក្រសួងពាក់ព័ន្ធ អញ្ចឹងប៉ុណ្ណឹងវាគ្រប់គ្រាន់ហើយគេស្តាប់គាត់សិនព្រោះវាឆ្លើយឆ្លងគ្នាបើឱ្យឆ្លើយរហូតតើឆ្នាំណាចប់ មួយថាដីខ្មែរ មួយថាដីវៀតណាម ឥលូវគាត់សុខចិត្តបញ្ចប់រឿងដោយសារគាត់យកទៅពិភាក្សាជាមួយក្រសួងពាក់ព័ន្ធគាត់»។
ទាក់ទងនឹងបញ្ហានេះដែរ អ្នកស្រាវជ្រាវពីការអភិវឌ្ឍសង្គម លោក បណ្ឌិត មាសនីបានផ្តល់បទសម្ភាសន៍ជាវិទ្យុស្ត្រីនៅថ្ងៃនេះថា កិច្ចប្រជុំពាក់ព័ន្ធនឹងកំណត់ទូតព្រំដែនកម្ពុជាអាចទទួលបានលទ្ធផលល្អប្រសើរជាងមុន ប៉ុន្តែលោក មាស នី គូសបញ្ជក់ថាលទ្ធផលល្អប្រសើរនេះដែរលុះត្រាតែប្រទេសទាំងពីរមានឆន្ទៈពិតប្រាកដក្នុការដោះស្រាយបញ្ហាដែលកំពុងកើតមានទ្បើង។
លោក មាស នី បន្តថា ដើម្បីបន្ធូរបន្ថយភាពតានតឹងរវាងប្រទេសកម្ពុជា-វៀតណាមនោះគឺត្រូវមានភាគីទីបីចូលរួមគឺប្រទេសបារាំង ។ប៉ុន្តែលោកមិនទាន់មានជំនឿចិត្តថាប្រទេសបារាំងនឹងអាចរកដំណោះស្រាយឱ្យកម្ពុជាបានល្អប្រសើរនោះទេព្រោះកន្លងបារាំងក៏ធ្លាប់បានកាត់ទឹកដីកម្ពុជាឱ្យទៅវៀតណាមផងដែរ។
លោក មាស នី៖ «ពីដើមមកយើងឃើញថាវៀតណាមហាក់បីដូចជាមិនសូវខ្វល់ ប៉ុន្តែម្តងនេះហេតុអីក៏ប្រទេសទាំងពីរយល់ព្រមស្របគ្នាដើម្បីសុំជំនួយបច្ចេកទេស ឬជំនួយពីប្រទេសបារាំងខ្ញុំគិតថាបើសិនជាដើរច្រកហ្នឹងមែន ខ្ញុំគិតថាល្អហើយបើសិនជាបារាំងចូលមកជួយសម្រេចធ្វើកិច្ចការហ្នឹង ចង់ឱ្យសម្រេចម៉ាចប់តែម្តងប៉ុន្តែថាតើបារាំងហ្នឹងយើងគិតថាជាប្រទេសមួយដែលយើងជឿទុកចិត្តប៉ុណ្ណាព្រោះអីពីដើមបារាំងក៏ធ្លាប់មានចូលរួមក្នុងកាត់ទឹកដីខ្មែរឱ្យវៀតណាមដែរ ប៉ុន្តែខ្ញុំគិតថាមានតែជំរើសហ្នឹងទេដែលអាចបញ្ចៀសភាពតានតឹងរវាងប្រទេសទាំងពីរហ្នឹងបាន »។
សូមជំរាបថាកម្ពុជាបានប្តឹងតវ៉ាដោយដាក់កំណត់ទូតទៅស្ថានទូតវៀតណាមប្រចាំកម្ពុជាករណីដែលចោទថាវៀតណាមបានរំលោភបំពានព្រំដែនកម្ពុជាគឺចាប់តាំងពីឆ្នាំ២០១១មក មាន២៣កំណត់ទូតហើយ៕
