ភ្នំពេញ៖ ស្ត្រីសហគមន៍បឹងកក់ ទទូចឲ្យសម្ដេចនាយករដ្ឋមន្ត្រី ហ៊ុន សែន ចុះមកស្វែងរក ការពិតនៅតំបន់បឹងកក់ ជាជាងចុះទៅតាមបណ្តាខេត្តមួយចំនួនដែលគេថា គ្រាន់ជាការរៀបចំទុកជាមុនរបស់មន្ត្រីថ្នាក់ក្រោម ដោយមិនបានដោះស្រាយចំបញ្ហារបស់ប្រជាពលរដ្ឋ។
អ្នកនាំពាក្យគណបក្សប្រជាជនប្រាប់ឲ្យអ្នក បឹងកក់ ទៅសួរសាលារាជធានីភ្នំពេញ មុននឹងមានសំណូមពរឲ្យចុះទៅមើលតំបន់ពួកគាត់។ លោក ធូ វិរៈ លម្អិតព័ត៌មាននេះ៖
ស្ត្រីសហគមន៍បឹងកក់ទទូចដូចនេះ ក្នុងសន្និសីទសារព័ត៌មានដែលធ្វើឡើងក្នុងសហគមន៍បឹងកក់នៅព្រឹកថ្ងៃទី ២៩សីហា នេះ ក្នុងយុទ្ធនាការ ថ្ងៃចន្ទពណ៍ខ្មៅ ដើម្បីទាមទារឲ្យតុលាការដោះលែងអ្នកស្រី ទេព វន្នី មន្ដ្រីការពារសិទ្ធិមនុស្ស សកម្មជននយោបាយ និង អ្នកតំណាងរាស្ដ្រដែលត្រូវបានចាប់ឃុំខ្លួនឲ្យមានសេរីភាពឡើងវិញ។
ស្ត្រីបឹងកក់ម្នាក់គឺ អ្នកស្ត្រី ប៊ូវ សោភា បានអំពាវនាវទៅសម្តេចនាយករដ្ឋមន្ត្រី ហ៊ុន សែន ឲ្យជួយអន្តរាគមន៍រកដំណោះស្រាយបញ្ហាដីធ្លី នៅតំបន់បឹងកក់នៅសេសសល់ចំនួន ១៩ គ្រួសារ ទៀតដែលមិនទាន់ទទួលបានសំណងពីសាលារាជធានីភ្នំពេញ ដោយទទូចឲ្យ សម្តេច ហ៊ុន សែន ចុះមកមើលផ្ទាល់ពីស្ថានភាពពិតប្រាកដនៅតំបន់របស់ពួកគេ។
អ្នកស្ត្រី ប៊ូវ សោភា៖«លោកនាយករដ្ឋមន្ត្រី ហ៊ុន សែន មិនបាច់ចុះ ២៤ ខេត្តក្រុង មើលតែក្បែរច្រមុះនិងសិនទៅ មិនចំណាយសាំងឡានទៀត ដើរមកដល់ថាឥឡូវពួកខ្ញុំនៅចង់បានអ្វីទៀត ដោះស្រាយដីឲ្យពួកខ្ញុំមក បើពួកខ្ញុំបានដីហើយ នៅតែដើរធ្វើបាតុកម្ម ទាមទារ តវ៉ាអញ្ចឹងទៀត បានន័យថា ពួកខ្ញុំខូច អញ្ចឹងអ្វីដែលពួកខ្ញុំទាមទារចង់បានគឺ ១៩គ្រួសារឲ្យពួកគាត់មានដោះស្រាយចប់សប់ គ្រប់ មកហើយទម្លាក់ការចោទប្រកាន់តំណាងសហគមន៍បឹងកក់ទាំងអស់ ហើយដោះលែងអ្នកស្រី ទេព វន្នី នេះជាគោលបំណងដែលពួកខ្ញុំធំបំផុត»។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត មានប្រសាសន៍ថាមុននឹងសហគមន៍បឹងកក់សំណូមពរ ឲ្យសម្តេចជួយអន្តរាគមន៍ គួរទៅសួរបញ្ហានេះជាមួយសាលាក្រុងភ្នំពេញវិញទៅ។
លោក សុខ ឥសាន្ត៖«សំណូមពរឲ្យសម្តេចចុះទៅគួរសួរទៅអាជ្ញាធរក្រុងថា តើគេដោះស្រាយបានកម្រិតណាហើយ ពីព្រោះនៅក្នុងផែនការ គេដោះបញ្ចប់តាំងពីឆ្នាំទៅមកម្លេះ ដល់ពេលយើងដឹងសភាពការនិងហើយ ទើបសំណូមពរវាត្រូវ…..១៩គ្រួសារសួរសាលាក្រុងថា ឥឡូវវាដល់ណាហើយ ដោះស្រាយជាជំហាន ព្រោះបងប្អូនគេទាមទារឲ្យមានឯកសារច្បាស់លាស់ បានគេកំណត់ដោះស្រាយត្រឹមត្រូវតាមគោលការណ៍របស់គេ »។
នៅក្នុងយុទ្ធនាការថ្ងៃចន្ទពណ៍ខ្មៅ ក្នុងសប្តាហ៍ទី១៧ ក្រុមស្ត្រីសហគមន៍បឹងកក់បានឈរលើក បដា និងរូបថត អ្នកស្ត្រី ទេព វន្នី លោកបណ្ឌិត កែម ឡី រួមទាំងរូបថត អ្នកស្រី ហ៊ីលឡារី គ្លីនតុន ដែលធ្លាប់ជួយអន្តរាគមន៍ឲ្យមានការដោះលែង សហគមន៍បឹងកក់កាលពីឆ្នាំ ២០១២ និងក៏បានផ្តល់ពាន់រង្វាន់ជ័យលាភីរង្វាន់ស្ត្រី ជាអ្នកដឹកនាំរបស់អង្គការ Vital Voices ដល់អ្នកស្រី ទេព វន្នី។
អង្គការសិទ្ធិមនុស្សក្នុងស្រុកចំនួន ៦០ បានស្នើសុំឲ្យទម្លាក់បទចោទប្រកាន់ និងដោះលែងសកម្មជនសិទ្ធិ លំនៅដ្ឋានតំបន់បឹងកក់គឺលោកស្រី ទេព វន្នី នៅក្នុងសំណុំរឿងការធ្វើ«យុទ្ធនាការថ្ងៃច័ន្ទពណ៌ខ្មៅ» ។
ជាមួយគ្នានេះ ក្រុមស្ត្រីទាំងនេះ ចង់ឲ្យអ្នកស្រី ហ៊ីលឡារី គ្លីនតុន ជាប់ឆ្នោតជាប្រធានាធិបតីសហរដ្ឋអាមេរិក ព្រោះពួកគាត់សង្ឃឹមថា ស្ត្រីក្លាយជាមេដឹកនាំនិងអាចជួយដោះស្រាយបញ្ហាស្ត្រី ពិសេសបញ្ហារំលោភសិទ្ធិមនុស្ស និងការរំលោភបំពានកម្មសិទ្ធិដីធ្លី នៅតំបន់បឹងកក់៕
