ភ្នំពេញ៖ អ្នកឯកទេសជំនាញវះកាត់ខួរក្បាល និងជានាយកគ្រប់គ្រងនៃមន្ទីរពេទ្យជប៉ុន សាន់រ៉ាយស៏ លោក វេជ្ជបណ្ឌិត យូស៊ីហ្វូមី ហាយ៉ាស៊ី បាននិយាថា ជាទូទៅជំងឺស្ទះ ឬដាច់សរសៃឈាមខួរក្បាល ដែលភាសាអង់គ្លេសហៅថា ស្តូប (STROKE) ភាគច្រើនកើតទៅលើអ្នកដែលមានវ័យចំណាស់។ ក៏ប៉ុន្តែសម្រាប់ប្រជាពលរដ្ឋកម្ពុជាវិញ ជម្ងឺនេះគឺច្រើនកើតចំពោះមនុស្សនៅអាយុចន្លោះពី ៣០-៤០ ឆ្នាំ រួចបាត់ទៅហើយ។
នាយកគ្រប់គ្រងនៃមន្ទីរពេទ្យ ជប៉ុន សាន់រ៉ាយស៏ លោក វេជ្ជបណ្ឌិត យូស៊ីហ្វូមី ហាយ៉ាស៊ី អ្នកឯកទេសវះកាត់ខួរក្បាលបានលើកទ្បើងថា ជំងឺស្ទះ ឬជំងឺដាច់សរសៃឈាមខួរក្បាល ដែលភាសាអង់គ្លេសហៅថា ស្តូ្រក (STROKE) ជាជំងឺសរសៃឈាមនៅក្នុងខួរក្បាលយ៉ាងដែលអាចបង្ករឱ្យមនុស្សស្លាប់ ឬកើតពិការភាព ដោយភាគច្រើនកើតទៅលើអ្នកដែលមានវ័យចំណាស់។ ក៏ប៉ុន្តែសម្រាប់ប្រជាពលរដ្ឋកម្ពុជាវិញ លោកវេជ្ជបណ្ឌិតពន្យល់ថា គឺបានកើតចំពោះមនុស្សនៅអាយុចន្លោះពី ៣០-៤០ ឆ្នាំ រួចទៅហើយ។
លោក វេជ្ជបណ្ឌិត យូស៊ីហ្វូមី ហាយ៉ាស៊ី ការលើកទ្បើងដូចនេះធ្វើទ្បើងនៅក្នុងសិក្ខាសាលាសុខភាពលើកទី១០ស្តីពី «ជំងឺស្ទះ ឬដាច់សរសៃ ឈាមខួរក្បាល» កាលពីថ្ងៃទី ២៦ ខែសីហា ម្សិលមិញ នៅសាកលវិទ្យាល័យមួយនៃរាជធានីភ្នំពេញ។
លោកវេជ្ជបណ្ឌិត យូស៊ីហ្វូមី ហាយ៉ាស៊ី បានផ្តល់បទសម្ភាសន៍ជាមួយអ្នកសារព័ត៌មានថា តាមរយៈអ្នកបកប្រែថា ជំងឺស្ទះ ឬដាច់សរសៃឈាមខួរក្បាលកើតទ្បើងប្រហាក់ប្រហែលគ្នារវាងបុរស និងស្ត្រី។ ប៉ុន្តែនៅក្នុងប្រទេសជប៉ុន ស្ត្រីបានកើតជំងឺនេះច្រើនជាងបុរស។
លោក ហាយ៉ាស៊ី បន្តថា រោគសញ្ញាដែលគេអាចដឹងថា កើតជំងឺស្ទះ ឬដាច់សរសៃឈាមនោះ ទី១គឺ អ្នកជំងឺចាប់ផ្តើមចុះខ្សោយអវៈយវៈ ដូចជា ដៃចាប់ផ្តើមទន់ទៅៗ ទី០២ មុខរបស់អ្នកជំងឺកំរើកលេងបាន ទី០៣ អ្នកជំងឺនិយាយលេងបាន ឬនិយាយអត់ច្បាស់ ទី០៤ ប្រសិនបើអ្នកជំងឺនោះដាច់សរសៃឈាមក្នុងខួរក្បាលនោះ អ្នកជំងឺនោះចាប់ផ្តើមឈឺក្បាលខ្លាំងទ្រាំលេងចង់បានជាដើម។
លោក ហាយ៉ាស៊ី គូសបញ្ជាក់ទៀតថា ជាទូទៅជំងឺស្ទះ ឬដាច់សរសៃឈាមក្នុងខួរក្បាល ច្រើនកើតទៅលើអ្នកដែលមានវ័យដូចជា៖«ជាទូទៅអ្នកជំងឺដែលមានវ័យចំណាស់គឺប្រឈមមុខកើតជំងឺ STROKE ក៏ប៉ុន្តែគាត់បានដឹងថានៅក្នុងស្រុកខ្មែរយើង គឺជំងឺ STROKE គឺច្រើនកើតលើអ្នកដែលមានវ័យក្មេងនៅទ្បើយឧទាហរណ៍គាត់មានអាយុចន្លោះពី ៣០-៤០ឆ្នាំគឺមានជំងឺ STROKE រួចទៅហើយ»។
អ្នកឯកទេសរូបនេះបន្តថា ជំងឺស្ទះ ឬដាច់សរសៃឈាមក្នុងខួរក្បាលនេះអាចកើតពីតំណរពូជផងដែរ ប៉ុន្តែជាទូទៅ ជំងឺនេះច្រើនជាង ៨០ ភាគរយកើតទ្បើងដោយសាររបៀបនៃការរស់នៅរបស់ពួកគេ។
លោកវេជ្ជបណ្ឌិត យូស៊ីហ្វូមី ហាយ៉ាស៊ី បានផ្តល់ជាអនុសាសន៍ថា ដើម្បីទប់ស្កាត់ជំងឺស្ទះ ឬដាច់សរសៃឈាមខួរក្បាលនោះប្រជាពលរដ្ឋត្រូវអនុវត្តតាមគោលការណ៍មានដូចខាងក្រោម៖ «គឺទាក់ទងនឹងសម្ពាធឈាម មានការលើសសម្ពាធឈាមដូច្នេះប្រជាជនគ្រប់គ្នាត្រូវស្វែងយល់ និងដឹងអំពីកម្រិតនៃសម្ពាធឈាមគាត់ដើរប៉ុណ្ណា។ ប្រសិនបើគាត់ដឹងថាសម្ពាធគាត់ទ្បើងហើយអ្វីដែលសំខាន់បំផុតគឺត្រូវណែនាំឱ្យគាត់បញ្ចុះសម្ពាធឈាម គាត់តាមរយៈការកាត់បន្ថយញុំាប្រៃ ក៏ដូចជាធ្វើលំហាត់ប្រាណផ្សេងៗទៀតដើម្បីធ្វើឱ្យសម្ពាធឈាមរបស់គាត់ហ្នឹងចុះមកទាបវិញ។ ប៉ុន្តែបើសិនជាសម្ពាធឈាមហ្នឹងខ្ពស់ខ្លាំងគឺត្រូវណែនាំគាត់ឱ្យមកកាន់មន្ទីរពេទ្យ ដើម្បីទទួលការព្យាបាលដោយត្រឹមត្រូវ។
ចំណុចផ្សេងទៀតគឺទាក់ទងនឹងការជក់បារីវាក៏ជាកត្តាមួយដែលធ្វើឱ្យគាត់ប្រឈមមុខនឹងការកើតជំងឺ STROKE មួយទៀតអ្នកជំងឺដែលមានការលើសទម្ងន់ អ្នកជំងឺដែលធាត់ខ្លាំងគឺគាត់ក៏ប្រឈមមុខកើតជំងឺ STROKE ដែរអញ្ចឹងអ្វីដែលល្អបំផុតគឺត្រូវបញ្ចុះទម្ងន់គាត់ឱ្យមកទាប មួយទៀតដែលញុំាគ្រឿងស្រវឹងច្រើនក៏ប្រឈមមុខកើតជំងឺ STROKE ដែរ មួយចុងក្រោយអ្នកជំងឺដែលមានចង្វាក់បេះដូងមិនធម្មតា អញ្ចឹងអ្នកជំងឺដែលគាត់អាចដឹងថាចង្វាក់មិនធម្មតាគាត់ត្រូវការទទួលថ្នាំខ្លះមួយចំនួនដើម្បីគ្រប់គ្រងចង្វាក់បេះដូងគាត់ដើម្បីកុំឱ្យវិវត្តទៅរកជំងឺ STROKE »។
សូមជំរាបថា បើតាមការឱ្យដឹងពីនាយកគ្រប់គ្រងនៃមន្ទីរពេទ្យជប៉ុន សាន់រ៉ាយស៏ លោកវេជ្ជបណ្ឌិត យូស៊ីហ្វូមី ហាយ៉ាស៊ី ថា មន្ទីពេទ្យសាន់រ៉ាយស៏ នឹងដាក់សម្ពោធជាផ្លូវការនៅថ្ងៃទី ២០ ខែកញ្ញា ឆ្នាំ២០១៦ ខាងមុខនេះ ដែលបានបណ្តាក់ទុនលើមន្ទីពេទ្យនេះចំនួន ៣៥ លានដុល្លារសហ រដ្ឋអាមេរិក៕
