ភ្នំពេញ៖ លោក ឃៀង សុគន្ធា ប្រធាននាយកដ្ឋានអត្តសញ្ញាណប័ណ្ណកម្ម បានបញ្ជាក់ក្នុងកម្មវិធីមួយស្ដីពី នីតិវិធីចុះឈ្មោះបោះឆ្នោតនៅឃុំសង្កាត់ និងបញ្ជូនទិន្នន័យនៅថ្ងៃសុក្រទី២៦សីហានេះថា នាយកដ្ឋានរបស់ កំពុងស្វែងរកការផ្តល់អត្តសញ្ញាណប័ណ្ណ និង អ្នកប្រើប្រាស់មិនស្របច្បាប់។
ចំណែកអ្នកច្បាប់ថា ទាំងអ្នកប្រើ និង អ្នកផ្តល់ឲ្យមានទោសដូចគ្នា។ កញ្ញា ច្រឹក ស្រីអូន រាយការណ៍៖
អត្តសញ្ញាណប័ណ្ណ គឺ ជាឯកសារគោលដែលត្រូវយកចុះឈ្មោះបោះឆ្នោតបាន។ តែកន្លងមកមន្ត្រីគ.ជ.ប ថាទោះជាជនបរទេសក៏ដោយឲ្យតែមានអត្តសញ្ញាណប័ណ្ណគឺអាចចុះឈ្មោះបោះឆ្នោតបានទោះជាមិនចេះភាសាខ្មែរក៏ដោយ។
ជុំវិញបញ្ហានេះលោក ឃៀង សុគន្ធា ប្រធាននាយកដ្ឋានអត្តសញ្ញាណកម្មបានបញ្ជាក់ ថានាយកដ្ឋានរបស់លោក មិនមានបំណងផ្តល់ អត្តសញ្ញាណប័ណ្ណ ដល់ជនបរទេសទេបើ ជននោះមិនមែនជាជនជាតិខ្មែរ។
លោកបន្តថាពេលជនបរទេសណាមកសុំធ្វើ អត្តសញ្ញាណប័ណ្ណ គឺជននោះត្រូវមាន ឯកសារផ្សេងៗ ដូចជាសំបុត្របញ្ជាក់កំណើតជាដើម។ លោកក៏បានអះអាងថា នាយកដ្ឋានរបស់លោកកំពុងស្វែង រកអ្នកផ្តល់អត្តសញ្ញាណប័ណ្ណ និង អ្នកប្រើប្រាស់មិនស្របច្បាប់ ផងដែរ។
ទោះជាយ៉ាងណា លោក គួយ ប៊ុនរឿន អនុប្រធានគ.ជ.ប ថាទោះជាជនបរទេសនោះអាចចុះឈ្មោះបោះឆ្នោះបានក៏ដោយតែ មិនមែនមានន័យថាគេមានសិទិ្ធបោះឆ្នោះនោះទេនៅពេលមានអ្នកប្ដឹងជំទាស់។
លោកបញ្ជាក់ថា គ.ជ.ប នឹងត្រួតពិនិត្យមើលភស្តុតាងហើយនិងទាក់ទងនៅក្រសួងមហាផ្ទៃដើម្បីដោះស្រាយតាមច្បាប់។
ជុំវិញរឿងនេះ លោក ហុង គឹមសួន ជាអ្នកច្បាប់ មួយរូប លោកមានប្រសាសន៍ថា ទាំងអ្នកប្រើនិងអ្នកផ្តល់ឲ្យគេគឺត្រូវមានទោស ទោះបីជា បុគ្គលនោះមានលិខិតបញ្ជាក់កំណើត ឬ សៀវភៅគ្រួសារក៏ដោយ បើគេដឹងថាការទទួលបានរបស់ពួកគាត់មិនស្របច្បាប់។
ជុំវិញបញ្ហានេះ លោក សូ ចន្ថា សាស្ត្រាចារ្យវិទ្យាសាស្ត្រនយោបាយ មានប្រសាសន៍ថា មន្ត្រីផ្តល់អត្តសញ្ញាណប័ណ្ណ គួរត្រួតពិនិត្យជាមុនថា ជនបទេសនោះទទួលបានព្រះរាជក្រឹត្យ ផ្តល់សញ្ជាតិ ពីព្រះមហាក្សត្ស ឬអត់ មុនពេលផ្តល់អត្តសញ្ញាណប័ណ្ណដល់ជននោះ។
លោកសង្ឃឹមថា ដំណើការនៃការបោះឆ្នោត និងមានភាពយុត្តិធម៌ ដោយមិនមានការរំលោភគោលការណ៍ស្មើភាព។(សំឡេង)
ថ្មីៗនេះ បក្សប្រឆាំងក៏បានស្នើក្រសួងមហាផ្ទៃ និង ក្រសួងយុត្តិធម៌ ត្រួតពិន្យិការផ្តល់សញ្ជាតិ និង អត្តសញ្ញាណប័ណ្ណឲ្យជនបរទេសផងដែរ។
ក្នុងច្បាប់សញ្ជាតិគឺ មានមាត្រាមួយបានចែងអំពីការផ្តល់សញ្ជាតិតូបនីយកម្មទៅឱ្យជនបរទេស ដែលមានផលប្រយោជន៍ដល់ប្រទេសកម្ពុជា ហើយជននោះត្រូវចេះដឹងពីវប្បធម៌ប្រពៃណីកម្ពុជា នឹងចេះអានអក្សរ និងភាសាខ្មែរ។ អ្នកទទួលបានសញ្ជាតិខ្មែរ គឺតាមរយៈ ព្រះរាជក្រឹត្យ របស់ព្រះមហាក្សត្រ៕