ភ្នំពេញ៖ អ្នកតំណាងរាស្ត្រគណបក្សសង្គ្រោះជាតិ ជំទាស់ទៅនឹងសេចក្តីសម្រេចរបស់ចៅក្រមស៊ើបសួរសាលាដំបូងរាជធានីភ្នំពេញ ករណីបញ្ជូនសំណុំរឿងប្រធានស្ដីទីគណបក្សសង្គ្រោះជាតិ ទៅជំនុំជម្រះ ករណីមេបក្សប្រឆាំងរូបនេះមិនចូលខ្លួនកន្លងមក ពាក់ព័ន្ធ នាង ខុម ចាន់តារាទី ហៅស្រីមុំ។
សេចក្តីថ្លែងការណ៍របស់គណបក្សសង្គ្រោះជាតិ ធ្វើឡើងនៅថ្ងៃនេះបន្ទាប់ពី ចៅក្រមស៊ើបសួរនៃសាលាដំបូងរាជធានីភ្នំពេញ លោក ថាន់ ឡេង កាលពីថ្ងៃទី ២៣សីហា បានបញ្ចប់ការស៊ើបសួរលើសំណុំរឿងរបស់លោក កឹម សុខា និងបញ្ជូនសំណុំរឿងនេះទៅជំនុំជម្រះ។
យោងតាមសេចក្តីថ្លែងការណ៍ ចុះថ្ងៃទី ២៥ខែសីហានេះ គណបក្សប្រឆាំងធំនេះ បានស្នើឲ្យសាលាដំបូងរាជធានីភ្នំពេញទម្លាក់ការចោទប្រកាន់ករណី លោក កឹម សុខា ដោយមូលហេតុថា តុលាការសម្រចបញ្ជូនសំណុំរឿងនេះទៅជំនុំជម្រះ ដោយមិនទាន់ដកអភ័យឯកសិទ្ធិសភាលោក កឹម សុខា ជាមុន។
សេចក្តីថ្លែងការណ៍នេះ បានហៅការសម្រេចរបស់សាលាដំបូងរាជធានីភ្នំពេញថា រំលោភទៅលើ រដ្ឋធម្មនុញ្ញយ៉ាងធ្ងន់ធ្ងរ។
កាលពីថ្ងៃម្សិលមិញសាលាដំបូងរាជធានីភ្នំពេញ បានសម្រេចបញ្ជូនសំណុំរឿង ប្រធានស្ដីទីគណបក្សសង្គ្រោះជាតិ លោក កឹម សុខា ដែលបដិសេធមិនចូលខ្លួនតាមដីកាកោះរបស់តុលាការ ពាក់ព័ន្ធនឹងបទចោទរឿងសញ្ចរកម្មជាមួយអ្នកនាង ខុម ចាន់តារាទី ហៅស្រីមុំ ទៅជំនុំជម្រះ។ ប៉ុន្តែមិនទាន់ដឹងថា នឹងបើកសវនាការនៅថ្ងៃណានោះទេ។
កាលពីកំឡុងខែ ឧសភា សាលាដំបូងរាជធានីភ្នំពេញ បានចេញដីកាបង្គាប់ឲ្យចាប់ខ្លួន លោក កឹម សុខា ពីបទល្មើសជាក់ស្ដែង ដែលបដិសេធក្នុងការចូលខ្លួនតាមដីកាកោះហៅ ក្នុងសំណុំរឿងសញ្ចរកម្មលើអ្នកនាង ខុម ចាន់តារាទី ហៅស្រីមុំ៕
