សៀមរាប៖ ក្នុងរយៈពេលបីថ្ងៃនេះ អង្គការក្នុងស្រុកចំនួន១៦ ដែលធ្វើការពាក់ព័ន្ធ នឹងយុវជនបាន រៀបចំវេទិកាយុវជនអាស៊ានឆ្នាំ២០១៦ ចាប់ពីថ្ងៃទី២២ ដល់ថ្ងៃទី២៤ សីហានៅសណ្ឋាគារ រ៉ូយ៉ាល់អ៊ីមផាយ ខេត្តសៀមរាម។
យុវជនប្រហែល ជាង២០០នាក់ មកពីបណ្តាប្រទេសក្នុងសមាគមអាស៊ានទាំង១០រួមមាន ថៃ ហ្វីលីពីន ឥណ្ឌូនេស៊ី ម៉ាឡេស៊ី សឹង្ហបុរី វៀតណាម ជាដើម ក្នុងនោះក៏មានប្រទេសទីម័រឡេស្តេ ផងដែរ បានពិភាក្សាលើបញ្ហាផ្សេងៗ ដែលយុវជនខ្លួនឯងផ្ទាល់កំពុងជួបប្រទះ និងរួមគ្នារកដំណោះស្រាយទៅថ្ងៃអនាគត។
កញ្ញា ផាត សុខាល័យ មន្ត្រីគម្រោងអប់រំ សិទ្ធិពលរដ្ឋ សិទ្ធិនយោបាយ នៃអង្គការកម្មវិធីអភិវឌ្ឍន៍ ធនធានយុវជន បានឲ្យដឹងថា គោលបំណងសំខាន់នៃវេទិកាថ្នាក់តំបន់នេះ គឺដើម្បីឲ្យយុវជនចែករំលែកបញ្ហាសង្គមផ្សេងៗ ដែលពួកគេបានជួបប្រទះ និងចង់បានដំណោះស្រាយ ពីភាគីពាក់ព័ន្ធ នៃរដ្ឋាភិបាលអាស៊ាន។
កញ្ញាបន្តថា វេទិកានេះ ក៏ចង់កំណត់ឱ្យដឹងថា តើយុវជនគួរធ្វើសកម្មភាពអ្វីសម្រាប់ពេលខាងមុខ ដើម្បីដោះស្រាយបញ្ហាទាំង៧ចំណុច ដែលកំពុងជួបប្រទះ។
កញ្ញា បានឱ្យដឹងថា បញ្ហាប្រឈម ទាំង៧ចំណុច ដែលបានចេញសេចក្តីថ្លែងការណ៍ កាលពីឆ្នាំ២០១៤ នៅក្នុងទីក្រុងយ៉ាំងហ្គន ប្រទេសភូមា រួមមាន ការកសាងសន្តិភាព និងការផ្សះផ្សាដោយសារតែប្រទេសក្នុងតំបន់ មិនទាន់មានសន្តិភាពពេញ លេញនៅឡើយ បញ្ហាទី២.អភិបាលកិច្ច និងប្រជាធិតេយ្យ បញ្ហាទី៣.ការអប់រំដែលមានលក្ខណៈចូលរួម បញ្ហាទី៤. សុខភាពផ្លូវភេទ ការមិនទាន់យល់ដឹងពីសិទ្ធិទទួលបានសុខភាព បញ្ហាទី៥. ការគ្រប់គ្រងធនធានធម្មជាតិ បញ្ហាទី៦. សុខមាលភាពរបស់យុវជន និងបញ្ហាទី៧. ការចំណាកស្រុករបស់យុវជន។
សម្រាប់ថ្ងៃដំបូងនៃ កម្មវិធីក្នុងវេទិកាយុវជនអាស៊ានឆ្នាំ២០១៦នេះ គណៈកម្មការរៀបចំ នាំយុវជនចម្រុះទាំង១១ប្រទេសចុះកម្មសិក្សា៦កន្លែងផ្សេងគ្នា ដើម្បី សិក្សា និងស្វែងយល់ពីបញ្ហា មួយចំនួននៅក្នុងប្រទេសកម្ពុជាដូចជាបញ្ហា អប់រំ និរន្តរភាពបរិស្ថាន អភិបាលកិច្ច សុខភាព ជាដើម៕
