ភ្នំពេញ៖ ក្រសួងធនធានទឹក និង ឧតុនិយម បានចេញសេចក្ដីជូនដំណឹងឲ្យសាធារណជន មានការប្រុងប្រយ័ត្នខ្ពស់ ចំពោះអ្នកដែលរស់នៅតំបន់មាត់សមុទ្រ និង អ្នកទេសចរគ្រប់រូបត្រូវប្រុងប្រយ័ត្នរាល់ការធ្វើដំណើរកំសាន្ដលើផ្ទៃសមុទ្រ។
បើយោងតាមសេចក្ដីជូនដំណឹងរបស់ក្រសួងធនធានទឹក គឺចាប់ពីថ្ងៃទី ២២ខែសីហា រហូតដល់ថ្ងៃទី ២៥ខែសីហា ឆ្នាំ ២០១៦ តទៅ ប្រទេសកម្ពុជានឹងទទួលរងឥទ្ធិពលខ្យល់ព្យុះដែលបក់មកពីមហាសមុទ្រប៉ាស៊ីហ្វីក នឹងបណ្ដាលឲ្យតំបន់មួយចំនួនក្នុងប្រទេសកម្ពុជា អាចកើតមានខ្យល់កន្ដ្រាក់ រួមជាមួយភ្លៀងធ្លាក់រាយប៉ាយ ហើយក្នុងនោះ តំបន់សមុទ្រទទួលរងសម្ពាធពីព្យុះបក់មកខ្លាំងជាងគេ ដែលក្នុងនោះតំបន់ជាប់មាត់សមុទ្រ រួមមានខេត្ដ កោះកុង ខេត្ដ ព្រះសីហនុ ខេត្ដ កែប និង ខេត្ដ កំពត នឹងមានភ្លៀងធ្លាក់ច្រើន លាយឡំនិងខ្យល់កន្ដ្រាក់។
ជាងនេះទៀត នៅលើផ្ទៃសមុទ្រ នឹងមានខ្យល់បក់បោកខ្លាំង បង្កឲ្យរលកសមុទ្រមានកំពស់ចាប់ពី ១ម៉ែត្រ ទៅដល់ ២ ម៉ែត្រ កន្លះ។
សេចក្ដីជូនដំណឹងដដែលនេះបានឲ្យដឹងថា ឥទ្ធិពលខ្យល់ព្យុះដែលមកប៉ះប្រទេសកម្ពុជា គឺមានឈ្មោះថា ហ្គោនី បានកើតឡើងនៅមហាសមុទ្រប៉ាស៊ីហ្វិក កាលពីថ្ងៃទី ១៧ខែសីហា ហើយវាបានបន្ដដំណើរឆ្ពោះទៅទិសខាងលិច នៅថ្ងៃទី ២៣ សីហា រួច បក់ទៅដល់កោះតៃវ៉ាន់ ហើយក៏ជះឥទ្ធិពលមកដល់កម្ពុជា ផងដែរ ។
ក្រសួងធនធានទឹក និង ឧតុនិយម បានបញ្ជាក់ថា ក្រសួង សង្ឃឹមថា ប្រជានេសាទទាំងអស់ ក៏ដូចជាអ្នកធ្វើដំណើរតាមសមុទ្រ ត្រូវបង្កើននូវការប្រុងប្រយ័ត្នឲ្យបានខ្ពស់ដើម្បីជៀសវាង គ្រោះថ្នាក់ផ្សេងៗដែលអាចកើតមានឡើងដោយសារតែឥទ្ធិពលខ្យល់ព្យុះនេះ៕
