ហ្វីលីពីន៖ អ្នកនាំពាក្យរបស់រដ្ឋាភិបាលហ្វីលីពីនបានឱ្យដឹងថា ប្រធានាធិបតីហ្វីលីពីនលោក Rodrigo Duterte បានច្រានចោលការរិះគន់មួយកាលពីថ្ងៃសុក្រទី១៩សីហាម្សិលមិញ របស់អង្គការសហប្រជាជាតិដែលរិះគន់ថា របបដឹកនាំរបស់លោកបានធ្វើឱ្យមានការកើនឡើងនៃការសម្លាប់ជនសង្ស័យជួញដូរគ្រឿងញៀន ហើយលោក Duterte ក៏បានបដិសេធការទទួលខុសរបស់រដ្ឋាភិបាលរបស់លោកផងដែរ។
មនុស្សប្រហែល ៩០០ នាក់ដែលគេសង្ស័យថា មានជាប់ពាក់ព័ន្ធនឹងការជួញដូរគ្រឿងញៀនត្រូវបានសម្លាប់ចាប់តាំងពីលោក Duterte ចូលមកកាន់អំណាច បន្ទាប់ពីលោកឈ្នះការបោះឆ្នោតកាលពីខែឧសភា។ គេនៅចាំបានថា ក្នុងអំឡុងពេលស្បថចូលកាន់តំណែងលោក Duterte បានសន្យាបញ្ឈប់មិនឱ្យមានការចរាចរគ្រឿងញៀន ហើយលោកក៏បានព្រមានដល់អ្នករត់ពន្ធគ្រឿងញៀនទាំងនោះថា ពួកគេនឹងអាចប្រថុយនឹងការស្លាប់ប្រសិនបើពួកគេមិនបានកែលម្អនោះទេ។
អង្គការសហប្រជាជាតិនៅសប្តាហ៍នេះ បានអំពាវនាវដល់រដ្ឋាភិបាលក្រុងម៉ានីលត្រូវការពារប្រជាជនទាំងអស់ពីការកំណត់គោលដៅមុខសញ្ញានៃការសម្លាប់ និងការសម្លាប់ក្រៅប្រព័ន្ធតុលាការ។
សមាជិកព្រឹទ្ធសភាលោក Leila de Lima បានរិះគន់យ៉ាងចាស់ដៃមកលោកប្រធានាធិបតីហ្វីលីពីន ហើយសមាជិកព្រឹទ្ធសភារូបនេះនឹងចាប់ ផ្តើមស្នើឱ្យមានការស៊ើបអង្កេតការសម្លាប់នេះឱ្យបានច្បាស់ លាស់នៅសប្តាហ៍ក្រោយ។ ហើយលោកក៏បានស្នើឱ្យកោះហៅមន្ត្រីប៉ូលីស និងមន្ត្រីកំពូលៗដែលប្រឆាំងគ្រឿងញៀនដើម្បីពន្យល់អំពីការកើនឡើងនៃការសម្លាប់ ដែលមិនធ្លាប់មានពីមុនមកនេះ។
យ៉ាងណាមិញ លោក Duterte ឆ្លើយតបដោយព្រមានសមាជិកសភារូបនេះវិញថា មិនត្រូវរំខានដល់យុទ្ធនាការរបស់លោកនោះទេ។ លោក Duterte បន្តថាជនជួញដូរគ្រឿងញៀនទាំងគួរតែស្លាប់ ព្រោះពួកគេបានរារាំងកិច្ចខិតខំប្រឹងប្រែងយើងដែលយើងចង់ឱ្យប្រទេសមានភាពល្អប្រសើរ៕
ប្រភព៖ CNA
