ភ្នំពេញ៖ គណបក្សសង្គ្រោះជាតិ ប្រកាសដាក់យុទ្ធសាស្ត្រ ៤ចំនុច ដើម្បីទប់ស្កាត់ជនបរទេស ដែល បន្លំធ្វើអត្តសញ្ញាណប័ណ្ណសញ្ជាតិខ្មែរដើម្បីចុះឈ្មោះបោះឆ្នោតដែលនឹងប្រព្រឹត្តទៅ នៅថ្ងៃទី១កញ្ញា ខាងមុខនេះ។
បក្សប្រឆាំងអះអាងថា យុទ្ធសាស្ត្រទាំង៤នេះជាផ្នែកមួយ នៃការពង្រឹងការបោះឆ្នោត និងដំណើរការបោះឆ្នោតកាន់តែប្រសើរ។
យោងតាមសេចក្ដីប្រកាសព័ត៌មានរបស់គណបក្សសង្គ្រោះជាតិ ដែលបានផ្សព្វផ្សាយ ជាសាធារណៈនៅព្រឹកថ្ងៃទី១៩សីហានេះ គណបក្សបានដាក់យុទ្ធសាស្ដ្រ៤ចំនុចដែលមានខ្លឹមសារដូចខាងក្រោម៖
១.ក្រុមសមាជិកសភាគណបក្សសង្គ្រោះជាតិ នឹងស្នើទៅក្រសួងយុត្ដិធម៌ ឱ្យផ្ដល់នូវបញ្ជីឈ្មោះជនបរទេសដែលទទួលបានសញ្ជាតិខ្មែរ តាមរយៈសញ្ជាតិតូបនីយកម្ម ត្រឹមត្រូវតាមច្បាប់។
២.គណបក្ស នឹងស្នើទៅក្រសួងមហាផ្ទៃ ដើម្បីស្រាវជ្រាវនិងចាត់វិធានការចំពោះការ ផ្ដល់អត្ដសញ្ញាណប័ណ្ណសញ្ជាតិខ្មែរ ដោយខុសនីតិវិធីច្បាប់។ គណបក្សប្រឆាំងនេះ នឹងចូលរួមសហការជាមួយនឹងក្រសួងមហាផ្ទៃ ក្នុងការផ្ដល់ឈ្មោះជនបរទេសដែលទទួលបាន អត្ដសញ្ញាណប័ណ្ណសញ្ជាតិខ្មែរដោយខុសច្បាប់។
៣.គណបក្សប្រឆាំងធំនេះ ឱ្យដឹងថា នឹងពឹងពាក់មេធាវីដើម្បីរៀបចំពាក្យបណ្ដឹងប្ដឹងជនបរទេសដែលប្រើប្រាស់អត្ដសញ្ញាណប័ណ្ណសញ្ជាតិខ្មែរ ដោយខុសច្បាប់ ទៅចុះឈ្មោះបោះ ឆ្នោត ទៅគណៈកម្មាធិការជាតិរៀបចំការបោះឆ្នោត និងទៅតុលាការ និង
ទី៤. គណបក្សនេះ អះអាងថា នឹងរៀបចំភ្នាក់ងារសង្កេតការណ៍តាមការិយាល័យចុះឈ្មោះបោះឆ្នោត ដើម្បីពិនិត្យឃ្លាំមើល ដំណើរការចុះឈ្មោះបោះឆ្នោត ហើយនិងប្ដឹងជំទាស់ ប្ដឹងតវ៉ា នូវភាពមិនប្រក្រតីទាំងឡាយ រួមទាំងជនបរទេសដែលប្រើប្រាស់អត្ដសញ្ញាណប័ណ្ណសញ្ជាតិខ្មែរ ខុសច្បាប់ យកទៅចុះឈ្មោះបោះឆ្នោត។
ឆ្លើយតបនិងសេចក្ដីប្រកាសព័ត៌មាននេះ អ្នកនាំពាក្យក្រសួងមហាផ្ទៃ លោកឧត្ដមសេនីយ៍ ខៀវ សុភ័គ បានស្វាគមន៍ចំពោះគណបក្សសង្គ្រោះជាតិ ដែលមានបំណងសហការដូចនេះ ប៉ុន្ដែលោកថា គេមិនត្រូវបិទសិទ្ធិបែបរើសអើងនោះទេ។
គណបក្សសង្គ្រោះជាតិដែលបានចេញសេចក្ដីប្រកាសព័ត៌មានដូចនេះ ហើយដាក់ចុះនូវផែនការដូចនេះ គឺធ្វើឡើងបន្ទាប់ពីគណបក្សប្រឆាំងធំមួយនេះ កាលពីថ្ងៃទី១៨សីហា បានបើកសិក្ខាសាលា ដោយមានអ្នកជំនាញច្បាប់មកបកស្រាយអំពីច្បាប់ស្ដីពីសញ្ជាតិ និងច្បាប់អន្តោប្រវេសន៍នៃព្រះរាជាណាចក្រកម្ពុជា។
ជនបរទេសដែលរស់នៅក្នុងប្រទេសកម្ពុជា គេសង្កេតឃើញមានច្រើនជាតិសាសន៍ ប៉ុន្ដែជនជាតិវៀតណាម ឬគេហៅថា ជនអន្តោប្រវេសន៍មានចំនួនច្រើនជាងគេ ដែលបក្សប្រឆាំងអះអាងក្រៅផ្លូវការថា អាចមាន១លាននាក់ តែរដ្ឋាភិបាលអះអាងថា មានជាង១០ម៉ឺននាក់៕
