នាយករដ្ឋមន្ដ្រីនៃប្រទេសតួកគី Binali Yildirim បាននិយាយថាមនុស្ស ៤០០២៩នាក់ ត្រូវបានឃុំខ្លួនចាប់តាំងពីរដ្ឋប្រហារមិនបានសម្រេចផ្ទុះឡើងកាលពីខែមុន ដែលចំនួននេះច្រើនបំផុតនៃកំណត់ត្រាពិភពលោក។
ក្នុងសន្ទរកថាមួយ ដែលត្រូវបានផ្សព្វផ្សាយតាមកញ្ចក់ទូរទស្សន៍លោកនាយករដ្ឋមន្ត្រី Yildirim បានបញ្ជាក់ថា មនុស្ស ២០៣៥៥នាក់ ត្រូវបានចាប់ខ្លួនក្រោយពីរកឃើញជាប់ពាក់ព័ន្ធរដ្ឋប្រហារមិនបានសម្រេចថ្ងៃទី ១៥កក្កដា ហើយពួកអ្នកទាំងនោះជាប់ពាក់ព័ន្ធ ទៅនិងបព្វជិត មូស្លីម ម្នាក់ដែលជ្រកកោននៅសហរដ្ឋអាមេរិកគឺលោក Fethullah Gulen។
លោកនាយករដ្ឋមន្ដ្រីបានឲ្យដឹងទៀតថាមនុស្ស ៧៩៩០០នាក់ បានបញ្ឈប់ពីក្របខណ្ឌការងាររដ្ឋ ហើយ ៤២៦២នាក់ មកពីក្រុមហ៊ុន និងស្ថាប័នឯកជននានា។
តាមបណ្ដាញផ្សាយព័ត៌មាន Channel News Asia ការផ្ទុះរដ្ឋប្រហារមិនបានសម្រេចនៅប្រទេសតួកគី កាលពីថ្ងៃ ១៥កក្កដា បានបណ្ដាលឲ្យមនុស្សជិត ២០០នាក់ស្លាប់ ហើយ ឧត្ដមសេនីយ៍ជាច្រើនរូបត្រូវបានចាប់ខ្លួនភ្លាមៗនៅថ្ងៃនោះ៕ ប្រភព:CNA
