ភ្នំពេញ៖ សកម្មជនដីធ្លីសហគមន៍បឹងកក់ អ្នកស្រី ទេព វន្នី និងអ្នកស្រី ប៊ូវ សោភា ត្រូវបានកម្លាំងនគរបាលខណ្ឌដូនពេញ បញ្ជូនទៅដល់សាលាដំបូងរាជធានីភ្នំពេញកាលពីម៉ោង៧និង១០នាទីព្រឹក ថ្ងៃពុធទី១៧សីហា ពាក់ព័ន្ធការរៀបចំធ្វើយុទ្ធនាការអាវខ្មៅទាមទារឱ្យដោះលែងសកម្មជនសិទ្ធិមនុស្ស។
សកម្មជនដីធ្លីបឹងកក់ទាំង២នាក់នេះ ត្រូវបានសមត្ថកិច្ច ខណ្ឌដូនពេញ កាលពីល្ងាចថ្ងៃទី១៥ ខែសីហា ឆ្នាំ២០១៦ ចាប់ឃាត់ខ្លួន ស្ត្រីទាំង២នាក់ ក្នុងពេលធ្វើសកម្មភាពយុទ្ធនាការអាវខ្មៅ។
យុទ្ធនាការអាវខ្មៅ ដែលបង្កើតឡើងដោយ អង្គការសង្គមស៊ីវិល និងជនមួយចំនួន ត្រូវបានធ្វើឡើងជាបន្តបន្ទាប់ ក្រោយពីមានការឃាត់ខ្លួន មន្ត្រីអាដហុក៤នាក់ និងអគ្គលេខាធិការរង គ.ជ.ប ម្នាក់។
ប៉ុន្តែយុទ្ធនាការនេះ ត្រូវបានហាមឃាត់ដោយរាជរដ្ឋាភិបាលកម្ពុជា ក្រោមហេតុផលថា ជាចលនា បដិវត្តពណ៌។
ករណីថ្ងៃចន្ទពណ៌ខ្មៅធ្វើឡើង រៀងរាល់ថ្ងៃចន្ទ ដោយមន្ត្រីសង្គមស៊ីវិល និងអ្នកលេងបណ្ដាញសង្គម។
ចាប់តាំងពីមានការឃុំខ្លួន មន្ត្រីសិទ្ធិមនុស្ស និងអគ្គលេខាធិការរងគ.ជ.ប លោក នី ចរិយា នៅចុងខែឧសភាមកនោះ គឺ មនុស្សជាង១០នាក់ត្រូវបានឃាត់ខ្លួនហើយ ដោះលែងទៅវិញ បន្ទាប់ពីបង្ខំឱ្យពួកគេផ្ដិតមេដៃ សន្យាលែងធ្វើសកម្មភាពដូចនេះ។
តែចំពោះ អ្នកស្រី ទេព វន្នី និងអ្នកស្រី ប៊ូវ សោភា ត្រូវនាំខ្លួនឡើងតុលាការ បន្ទាប់ពីបានឃុំខ្លួន២ថ្ងៃហើយ ក្រោយពីសាកសួររក អ្នកនៅពីក្រោយ ការរៀបចំនេះ និង មូលហេតុរៀបចំថ្លុកទីងមោងកំបុតក្បាលដាក់កប់ក្នុងដី ដែលគេថាតំណាងឱ្យ មន្ត្រីតុលាការ ពុករលួយ៕
