Kathmandu៖ មន្ត្រីប៉ូលីសបានឱ្យដឹងថា យ៉ាងតិចណាស់មនុស្ស ៣៣ បានស្លាប់ និង ២៨ នាក់រងរបួសបន្ទាប់ពីហេតុការណ៍រថយន្ដក្រុងមួយគ្រឿងដែលផ្ទុកពេញដោយមនុស្សបានបើកធ្លាក់ជម្រាលភ្នំ។
ហេតុការណ៍នេះ កើតឡើងនៅភាគខាងកើតប្រទេសនេប៉ាល់កាលពីថ្ងៃចន្ទទី ១៥ ម្សិលមិញ ដែលតំបន់នោះសំបូរទៅដោយកូនភ្នំជាច្រើន។
រថយន្ដក្រុងនេះបានដឹកអ្នកដំណើរដែលភាគច្រើនគឺជាអ្នកភូមិពីក្រុង Kathmandu ទៅក្រុង Kavre, មានចំងាយ ៤០ គីឡូម៉ែត្រ ខាងកើតនៃរដ្ឋធានីនេះ។ ខណៈបើកមកដល់ផ្លូវ Arniko រថយន្តក្រុងនេះបានបើករេចេញពីផ្លូវធ្លាក់ចុះជម្រាលភ្នំកំពស់ប្រមាណ ២០០ ម៉ែត្រ ។
មន្ត្រីក្រសួងមហាផ្ទៃនេប៉ាល់លោក Chiranjivi ប្រាប់ទីភ្នាក់ងាររ៉យទ័រថា ឧទ្ធម្ភាគចក្រយោធាបានបើកប្រត្តិបត្តការណ៍សង្គ្រោះអ្នករងរបួសទៅកាន់មន្ទីរពេទ្យនៅក្រុង Kathmandu ។ មន្ត្រីរូបនោះបន្តថា ផ្នែកជាច្រើននៃរថយន្តបានខូចខាត ហើយទ្រព្យសម្បត្ដិរបស់អ្នកដំណើរត្រូវបានបែកខ្ញែកគ្នានៅទីកន្លែងកើតហេតុនោះ៕ ប្រភព: Reuters
