ភ្នំពេញ៖ លោក ហុង លីម សមាជិកសភាអូស្ត្រាលី ដើមកំណើតខ្មែរនៅរដ្ឋវិចតូរីយ៉ានៅថ្ងៃចន្ទទី ១៥សីហា នេះបាននិយាយក្នុងសន្និសីទរបស់លោកក្នុងប្រទេសអូស្ដ្រាលី ដោយលើកឡើងថា គណបក្សកាន់អំណាចនៅកម្ពុជាសព្វថ្ងៃបាន រំលោភបំពានលើ ព្រះមហាក្សត្រយ៉ាងធ្ងន់ធ្ងរ ហើយមិនតែប៉ុណ្ណោះ ថ្នាក់ដឹកនាំរដ្ឋាភិបាលបានតាំងខ្លួនឯងខ្ពស់លើព្រះមហាក្សត្រថែមទៀត ។
លោកពន្យល់ថា ដូចជាការចារបន្ថែមលើរាជសាររបស់ព្រះមហាក្សត្រ ដែលឲ្យពិនិត្យមើលញត្ដិរបស់គណបក្សសង្គ្រោះជាតិ បានយកស្នាមមេដៃមកថ្វាយព្រះមហាក្សត្រ។ ប៉ុន្ដែមន្ដ្រីរាជរដ្ឋាភិបាល បានចាត់ទុកការវាយប្រហាររបស់លោក ហុង លីម នេះថា ជាការប្រឆាំងងុបងល់ ហើយបក្សកាន់អំណាចមិនបានរំលោភតួនាទីព្រះមហាក្សត្រអ្វីឡើយ។
ស្តាប់សំឡេង៖
ក្នុងសន្និសីទសារព័ត៌មានមួយ នៅចំពោះមុខពលរដ្ឋខ្មែរនៅអូស្ត្រាលី ដែលត្រូវបានបង្ហោះផ្សព្វផ្សាយជាសាធារណៈនៅថ្ងៃនេះ លោក ហុង លីម ថ្លែងរិះគន់ថារបបដឹកនាំដោយសម្ដេច ហ៊ុន សែន សព្វថ្ងៃគឺជាការដឹកនាំមួយមិនគោរពព្រះមហាក្សត្រ អ្វីទេ។
ត្រង់ចំណុចនេះលោកបានលើកជាឧទាហរណ៍ថា ដូចកាលដែលព្រះមហាក្សត្របានចេញព្រះរាជសារឲ្យមន្ដ្រីអាជ្ញាធរធ្វើការពិនិត្យមើល និងដោះស្រាយបញ្ហាជូនពលរដ្ឋទៅតាមអ្វីដែលអាចធ្វើបាន ប៉ុន្ដែ លោកថាសម្ដេច ហ៊ុន សែន បែរជាយករាជសាររបស់ព្រះមហាក្សត្រមកសរសេរបន្ថែមលើរាជសារ ដែលនេះជាការប្រមាថលើព្រះមហាក្សត្រ ដែលជាម្ចាស់ប្រទេសទាំងមូល ។
បន្ថែមពីនេះលោក ហុង លីម ថា បច្ចុប្បន្ននេះគណបក្សកាន់អំណាចបានយកខ្លួនឯងធំជាងស្ថាប័នព្រះមហាក្សត្រទៅទៀត។ សមាជិកសភាអូស្ត្រាលីដើមកំណើតខ្មែរ-ប្រចាំរដ្ឋវ៉ិចតូរីយ៉ា រូបនេះបានបញ្ជាក់ថា លោក មានការគោរពព្រះមហាក្សត្រ និងឲ្យតម្លៃប្រជាពលរដ្ឋគ្រប់រូបៗ ប៉ុន្ដែលោកមិនឲ្យតម្លៃរបបដឹកនាំដោយប្រមុខរាជរដ្ឋាភិបាលសព្វថ្ងៃនោះទេ ដែលលោកថា គឺជារបបដឹកនាំដូច «តិរច្ឆាន»។
លោក ហុង លីម៖«ខ្ញុំយកជា ឧទាហរណ៍មួយជាក់ស្ដែង គណបក្សប្រឆាំងយកញត្ដិមួយដែលថាមានស្នាមមេដៃប្រមាណម៉ឺននាក់យកទៅថ្វាយព្រះមហាក្សត្រ បើអ្នកភ្នំពេញស្ដាប់ឮសូមស្ដាប់ឲ្យច្បាស់ នោះគឺជារឿងរវាងប្រជារាស្ដ្រផ្ញើទូលថ្វាយព្រះករុណាជាអម្ចាស់ គឺជារឿងរវាងរាស្ដ្រនិងស្ដេចតែពីរមុខទេ ហើយអ្នកឯងមកឆែក ថា ស៊ីញ៉េ (ហត្ថលេខា) ហ្នឹងក្លែងក្លាយឬមិនក្លែងក្លាយ ហើយទាក់ទងអីនឹងខ្លួនហ្នឹង អាហ្នឹងជាការប្រមាថស្ដេចពេញទីហើយ»។
ជុំវិញប្រសាសន៍សមាជិកសភាអូស្ត្រាលីដើមកំណើតខ្មែរ-ប្រចាំរដ្ឋវ៉ិចតូរីយ៉ានេះដែរ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រីបានផ្ដល់បទសម្ភាសន៍មកកាន់វិទ្យុស្ដ្រីFM102 នៅថ្ងៃទី ១៥សីហា ថា លោកសោកស្ដាយជាខ្លាំងចំពោះការមើលឃើញផ្ទុយពីការពិតរបស់លោក ហុង លីម ដូចនេះ។ អ្នកនាំពាក្យបាន បន្ថែមឲ្យដឹងទៀតថា ការដែលមន្ដ្រីរាជរដ្ឋាភិបាល ពិនិត្យលើស្នាមមេដៃពលរដ្ឋដែលគណបក្សសង្គ្រោះជាតិ យកមកថ្វាយព្រះមហាក្សត្រគឺធ្វើតាម ព្រះតម្រិះរបស់ព្រះមហាក្សត្រប៉ុណ្ណោះ ហើយម្យ៉ាងវិញទៀត គឺជាការងារដែលត្រូវធ្វើតាមទម្រង់រដ្ឋបាល។ លោកយល់ថា ការលើកឡើងរបស់លោក ហុង លីម គឺជាសម្ដីពាលដែលមិនអាចទទួលយកបានឡើយ ។
តែយ៉ាងណាលោក ផៃ ស៊ីផាន ក៏បានផ្ដាំលោក ហុង លីម ថា គួរតែគិតគូរពីការងាររបស់ខ្លួននៅប្រទេសអូស្ដ្រាលី វិញទៅ ដោយមិនចាំបាច់មកលូកលាន់ការងារក្នុងប្រទេសកម្ពុជានោះទេ បើសិនជាខ្លួនបានបោះបង់សញ្ជាតិកំណើតខ្លួនចោលទៅហើយនោះ។
លោក ផៃ ស៊ីផាន៖«អញ្ចឹងបានខ្ញុំថា នេះជាការយល់របស់អ្នកប្រឆាំងរាជរដ្ឋាភិបាលផ្កាប់មុខអ្វីដែលយើងធ្វើគឺជានីតិវិធីរដ្ឋបាលរវាងនីតិប្រតិបត្ដិជាមួយព្រះមហាក្សត្រដែលយើងតែងតែធ្វើហើយអ្វីដែលជាការយល់ឃើញរបស់ជនពាល នោះយើងមិនយកចិត្ដទុកដាក់ទេបាទ»។
ចំណែកលោក សូ ចន្ថា សាស្ដ្រាចារ្យវិទ្យាស្ដ្រនយោបាយយល់ឃើញថា ការលើកឡើងរបស់លោក ហុង លីម គឺជាមតិបុគ្គលផ្ទាល់ខ្លួនប៉ុណ្ណោះ។ លោកសាស្ដ្រាចារ្យវិទ្យាសាស្ដ្រនយោបាយរូបនេះថា ច្បាប់រដ្ឋធម្មនុញ្ញ ចែងពីសិទ្ធិអង្គព្រះមហាក្សត្រគឺជា តួនាទីខ្ពង់ខ្ពស់ក្នុងការជួយ ប្រទេសជាតិ ឲ្យមានឯកភាពជាតិ តុលាការឯករាជ្យ រក្សានូវបូរណភាពទឹកដី ក៏ប៉ុន្ដែច្បាប់ទាំងនេះមិនបានអនុវត្ដនោះទេ។ តែបែរជាឮពីការគំរាមលើរបបរាជានិយមទៅវិញ។
ត្រង់ប្រការនេះលោកថា ប្រសិនជាគណបក្សកាន់អំណាចមិនចង់ឮការតិះតៀនពីមនុស្សជុំវិញខ្លួន ពីការរំលោភបំពានលើសិទ្ធិស្ថាប័នព្រះមហាក្សត្រ គឺថ្នាក់ដឹកនាំគណបក្សកាន់អំណាចត្រូវគោរពឲ្យបានខ្ជាប់ខ្ជួននូវច្បាប់រដ្ឋធម្មនុញ្ញដែលមានចែងពីសិទ្ធិអំណាចរបស់អង្គព្រះមហាក្សត្រ។
លោក សូ ចន្ថា៖«ប្រសិនបើមានការចារនៅលើព្រះរាជលិខិតរបស់អង្គព្រះមហាក្សត្រខ្ញុំគិតថា នោះនីតិវិធីរដ្ឋបាលដូចមិនមានចែងទៅក្នុងនោះទេប៉ុន្ដែវាឆ្លុះបញ្ជាំងថា មិនគោរព មិនឲ្យតម្លៃ ទៅលើព្រះរាជលិខិតរបស់ព្រះមហាក្សត្រទៅវិញទេ»។
សូមជម្រាបថា លោក ហុង លីម សមាជិកសភាអូស្ត្រាលី ដើមកំណើតខ្មែរនៅរដ្ឋវ៉ិចតូរីយ៉ា ត្រូវបានរាជរដ្ឋាភិបាលកម្ពុជាប្រកាសហាមមិនឱ្យចូលប្រទេសកម្ពុជា ក្រោយពេលលោកបានផ្ដល់បទសម្ភាសន៍ទៅកាន់វិទ្យុអាស៊ីសេរីកាលពីថ្ងៃទី ០៣សីហា ឆ្នាំ ២០១៦ ជុំវិញឃាតកម្មលើលោកបណ្ឌិត កែម ឡី ដោយលោក បានហៅរបបដឹកនាំដោយសម្ដេច ហ៊ុន សែន ថា ជារបប«តិរច្ឆាន»។ ប៉ុន្តែក្នុងសន្និសីទសារព័ត៌មាននេះ លោក ហុង លីម ប្រកាសថា លោកនឹងវិល ចូលប្រទេសកម្ពុជា វិញ នៅពេលមានការផ្លាស់ប្ដូរមេដឹកនាំ សព្វថ្ងៃនេះ ៕
