ប៉ាគីស្ថាន៖ មន្ត្រីប៉ូលីសបានបំពុលឆ្កែរាប់រយក្បាលនៅក្រុងការ៉ាជី ភាគខាងត្បូងនៃប្រទេសប៉ាគីស្ថាន ក្នុងយុទ្ធនាការមួយដើម្បីទប់ស្កាត់ការវាយប្រហាររបស់ឆ្កែទាំងនោះ ដែលបានខាំមនុស្សរាប់ពាន់នាក់ជារៀងរាល់ឆ្នាំ នៅក្នុងទីក្រុងដែលប្រជាជនរស់នៅប្រមាណ ២០ លាននាក់។
តាមបណ្ដាញ Channel News Asia សាកសពសត្វឆ្កែបានងាប់រាយប៉ាយក្នុងតំបន់នៃទីក្រុងនោះ ហើយកម្មករបានប្រមូលផ្តុំសាកសពសត្វឆ្កែទាំងយកទៅបោះចោល។
លោក Sattar Javed អ្នកនាំពាក្យអាជ្ញាធរក្រុងបាននិយាយថា៖ «សត្វឆ្កែយ៉ាងតិចណាស់ ៧០០ ក្បាលត្រូវបានសម្លាប់នៅតំបន់ចំនួនពីរភាគខាងត្បូងនៃក្រុងការ៉ាជី។
អាជ្ញាធរក្រុមបានឱ្យដឹងថា គេបានជ្រើសរើសការប្រើថ្នាំបំពុលសត្វឆ្កែដោយប្រលាក់ក្នុងសាច់មាន់ហើយឱ្យឆ្កែទាំងនោះស៊ី។ ប៉ុន្តែការសម្លាប់ សត្វឆ្កែនេះ ត្រូវទទួលការរិះគន់ពីសកម្មជនសិទ្ធិសត្វនៅក្នុងប្រទេសប៉ាគីស្ថាន តែយ៉ាងណាមន្ត្រីក្រុង លោក Mohammad Zahid បាននិយាយថា វាគឺជាការចាំបាច់ដែលត្រូវសម្លាប់សត្វឆ្កែទាំងនោះ ព្រោះពួកវាជាសត្វ គ្មានម្ចាស់ ហើយតែងតែបង្កការគំរាមកំហែងដល់ប្រជាពលរដ្ឋ។
លោកវេជ្ជបណ្ឌិត Seemin Jamali ប្រធានទទួលបន្ទុកសង្គ្រោះបន្ទាន់បានឱ្យដឹងថា កាលពីឆ្នាំមុនមន្ទីរពេទ្យ Jinnah ក្រុងការ៉ាជី បានទទួលព្យាបាលមនុស្ស ៦៥០០ នាក់ដែលត្រូវបានសត្វឆ្កែអនាថាខាំ ហើយគិតត្រឹមឆមាសទី១ ឆ្នាំនេះវិញ គេបានរកឃើញថាមាន ៣៧០០ ករណីដែលសត្វឆ្កែបានវាយប្រហារមកលើប្រជាជន៕
ប្រភព:CNA
