ភ្នំពេញ៖ បច្ចុប្បន្នប្រទេសចិនគឺជាដៃគូអភិវឌ្ឍន៍ដែលបានផ្តល់ហិរញ្ញប្បទាន សហប្រតិបត្តិការច្រើនជាងគេដល់កម្ពុជា។ ហិរញ្ញប្បទានពីប្រទេសនេះបានឆ្លើយតបទៅនឹង តម្រូវការជាក់ស្តែងរបស់រាជរដ្ឋាភិបាលកម្ពុជា។
ការលើកទ្បើងដូចនេះរបស់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរត្ន ធ្វើឡើងក្នុងជំនួបជាមួយ រដ្ឋមន្ត្រីក្រសួងពាណិជ្ជកម្ម នៃសាធារដ្ឋប្រជាមានិតចិន លោក Gao Hucheng កាលពីអង្គារទី២ កញ្ញា។ អ្នកជំនាញខាងសេដ្ឋកិច្ចក៏យល់ស្របដូចនេះដែរ តែលោកថា សហភាពអឺរ៉ុបក៍ជាផ្នែកមួយជួយធ្វើកម្ពុជាមានកំណើនសេដ្ឋកិច្ចខ្លាំងដែរ។លោក ជួន សារ៉េត រាយការណ៍ពីព័ត៌មាននេះ៖
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន បានលើកទ្បើងថា កិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសកម្ពុជា-ចិន គឺកាន់តែជិតស្និទ្ធ ហើយចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរត្រូវបានពង្រឹង និងពង្រីកឥតឈប់ឈរ។ នេះបើយោងតាមសេចក្តីប្រកាសព័ត៌មានចុះកាលពីថ្ងៃទី ០២ខែសីហា ឆ្នាំ២០១៦ ។
នៅក្នុងសេចក្តីប្រកាសព័ត៌មាននេះលោក អូន ព័ន្ធមុន្នីរ័ត្ន បានគូសបញ្ជាក់ថា បច្ចុប្បន្នប្រទេសចិនគឺជាដៃគូអភិវឌ្ឍន៍ដែលបានផ្តល់ ហិរញ្ញប្បទានសហប្រតិបត្តិការច្រើនជាងគេដល់កម្ពុជា។
លោកថាហិរញ្ញប្បទានពីប្រទេសចិននេះបានឆ្លើយតបទៅនឹង តម្រូវការជាក់ស្តែងរបស់រាជ រដ្ឋាភិបាលកម្ពុជា គឺទាំងហិរញ្ញប្បទានឥតសំណង និងឥណទានសម្បទាន ដល់ការកសាងហេដ្ឋារចនាសម្ព័ន្ធរូបវន្តនៅ កម្ពុជាផងដែរ។
ហេដ្ឋារចនាសម្ព័ន្ធទាំងនោះមានដូចជា ផ្លូវ ស្ពាន កំពង់ផែ ប្រព័ន្ធធារាស្ត្រ អគ្គីសនី និងទូរគមនាគមន៍ជាដើម ជាពិសេសការវិនិយោគពីប្រទេសចិន និងភ្ញៀវទេសចរចិនបានដើរតួនាទីយ៉ាងសំខាន់ ក្នុងការជុំរុញកំណើនសេដ្ឋកិច្ចរបស់កម្ពុជាផងដែរ។
ទាក់ទងនឹងការលើកទ្បើងនេះដែរ បណ្ឌិតសេដ្ឋកិច្ច និងជាមន្ត្រីផ្នែកស្រាវជ្រាវនៅរាជបណ្ឌិតសភាកម្ពុជា លោក គី សេរីវឌ្ឍន៍ បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា ជំនួយរបស់ប្រទេសចិនគឺមានមុខពីរ ព្រោះការផ្តល់ជំនួយនេះ ប្រាកដជាមានអ្វីនៅពីក្រោយ។ លោក គី សេរីវឌ្ឍន៍ បន្តថាប្រភេទជំនួយរបស់ប្រទេសចិនគឺ ភាគច្រើនជាកម្ចីជាជាងការផ្តល់ជាអំណោយ ប៉ុន្តែលោកទទួលស្គាល់ថាការផ្តល់ជំនួយរបស់ប្រទេសចិនមកប្រទេសកម្ពុជាពិតជាមានសារៈសំខាន់ ព្រោះ កម្ពុជាជាប្រទេសដែលកំពុងអភិវឌ្ឍន៍នៅទ្បើយ មានន័យថាប្រទេសកម្ពុជាពិតជាត្រូវការអ្នកដែលផ្តល់ជំនួយ។
សំណួរមួយបានចោទសួរថា តើចិនពិតជាដៃគូរអភិវឌ្ឍន៍មិនអាចខ្វះខាតបានមែនឬយ៉ាងណានៅក្នុងប្រទេសកម្ពុជា?
ឆ្លើយតបទៅនឹងសំណួរនេះ លោក គី សេរីវឌ្ឍន៍ បញ្ជាក់ថា ចំពោះដៃគូអភិវឌ្ឍន៍ចិនជាមួយកម្ពុជា មិនមែនមិនអាចខ្វះខាតបាននោះទេ។
លោកពន្យល់យ៉ាងដូច្នេះថា៖«តាមពិតទៅបើយើងនិយាយពីដៃគូអភិវឌ្ឍន៍មិនមែន មិនអាចខ្វះខាតបាននោះទេវាមានពីរ កាលណាយើងនិយាយពីសហគមន៍អឺរ៉ុប ហើយនឹងចិនវាខុសគ្នាហើយ ព្រោះអីចិនគាត់ផ្តល់ជំនួយមកយើង ខ្ញុំលើកជាគោលបំណង នៃជំនួយរបស់ចិនគឺអត់មានបង្កប់នួវនយោបាយ បង្កប់នូវការគោរពសិទ្ធិមនុស្សអីនោះទេ នៅក្នុងនោះទេ ប៉ុន្តែជំនួយរបស់អឺរ៉ុបវាមានបង្កប់ នូវការគោរពសិទ្ធិមនុស្សជាច្រើននៅក្នុងនោះ ប្រជាធិបតេយ្យជាច្រើននៅក្នុងនោះ ដូច្នេះនៅពេលដែលយើងយកតែជំនួយតែពីម្ខាងៗ វាធ្វើឱ្យអ្នកផ្តល់ជំនួយមកយើងគាត់មានឥទ្ធិពលខ្លាំងលើប្រទេសដែលទទួលជំនួយ»។
លោក គី សេរីវឌ្ឍន៍ គូសបញ្ជាក់ដែថា ប្រទេសដែលផ្តល់ជំនួយច្រើនជាងគេមកដល់កម្ពុជាគឺមានប្រទេសចិន នឹងប្រទេសជប៉ុន ដោយប្រទេសទាំងពីរនេះផ្តល់ជំនួយផ្សេងៗពីគ្នាតែប៉ុណ្ណោះ។ តែយ៉ាងណាក៏ដោយ លោក គី សេរីវឌ្ឍន៍ ក៏បានបញ្ជាក់ថាប្រសិនបើប្រទេសកម្ពុជាអស់ជំនួយពីចិននោះកម្ពុជាក៏ទទួលរងផលប៉ះពាល់ដែរ។
លោក គី សេរីវឌ្ឍន៍ ៖«តាមពិតបើយើងនិយាយពីប៉ះពាល់វាតែងតែមានហើយព្រោះជំនួយនេះ វាធ្វើឱ្យមានកំណើនសេដ្ឋកិច្ចច្រើនគួរសមដែរ ទី០១គឺជំនួយផ្ទាល់ធ្វើឱ្យកំណើនតាមរយៈការប្រើប្រាស់ជំនួយនេះបែងចែកទៅដល់ប្រជាជន បែងចែកទៅដល់អ្នកដែលរស់នៅក្នុងប្រទេស ទី០២ គឺជំនួយនេះផ្តល់មកវាបានធ្វើឱ្យផលិតផលក្នុងស្រុកយើងវាកើនទ្បើងព្រោះយើងបានធ្វើផ្លូវ ធ្វើអីស្អាតទៅ GDP យើងការដឹកជញ្ជូនយើងធ្វើឱ្យផលិតផលក្នុងស្រុកយើងវាមានកើនដោយសារយើង ចំណាយថ្លៃដើមវាទាបជាងមុន»។
ចំណែកអ្នកស្រាវជ្រាវពីការអភិវឌ្ឍសង្គម លោក បណ្ដិត មាស នី មានប្រសាសន៍ថាទោះបីជារាជរដ្ឋាភិបាលកម្ពុជាតែងតែលើកទ្បើងថា កម្ពុជាមិនស្ថិតនៅក្រោមឥទ្ធិពលពី បណ្តាប្រទេសណាក៏ដោយ ប៉ុន្តែលោកថាបច្ចុប្បន្ន ចិនកំពុងតែមានឥទ្ធិពលមកលើកម្ពុជាទាំងវិស័យសេដ្ឋកិច្ច នយោបាយ ព្រមទាំងវិស័យការទូតផងដែរ។
លោក មាស នី បន្ថែមថាការថ្លែងនូវចំណងមិត្តភាព ក៏ជាសញ្ញាមួយដែលស្តែងចេញក្រោយពីការគាំទ្ររបស់កម្ពុជាលើនយោបាយចិនទៅលើ សមុទ្រចិនខាងត្បូងដែលរឿងនេះកើតទ្បើងស្របពេលដែលសាធារណៈជន ទូទៅកំពុងតែមើលឃើញរាជរដ្ឋាភិបាលកម្ពុជាកំពុងតែមាន ទំនោរទៅខាងចិនកាន់តែច្រើនទ្បើងៗ។
លោក មាស នី យល់ឃើញថាបច្ចុប្បន្ននេះរាជរដ្ឋាភិបាលកម្ពុជាមមើលឃើញជំនួយចិនជាជំនួយដែលមាន សារៈសំខាន់ដែលកម្ពុជាកំពុងតែត្រូវការ។
លោក មាស នី ៖«អ្វីដែលជាទស្សនៈរបស់ខ្ញុំនេះយើងមើលទៅសព្វថ្ងៃនេះរដ្ឋាភិបាល ទីក្រុងភ្នំពេញ គឺមើលឃើញជំនួយចិន គឺជាជំនួយសំខាន់មួយដែលអាចជួយឱ្យរដ្ឋាភិបាល អាចឆ្លងផុតនៅក្នុងដំណាក់កាលនៃការតិះទៀនពីមតិអន្តរជាតិ ហើយនឹងការគំរាមនៅការកាត់ជំនួយអីខ្លះពី បច្ចឹមប្រទេស…»។
សូមជំរាបជូនថា នាពេលកន្លងមកនេះ ប្រទេសចិនបានផ្តល់ជំនួយមកប្រទេសកម្ពុជានូវទឹកប្រាក់ចំនួន ៦០០ លានដុលា្លរ សហរដ្ឋអាមេរិក។ នៅក្នុងនោះក៏បានផ្តល់ទៅដល់ដំណើរការបោះឆ្នោតនៅក្នុងប្រទេសកម្ពុជាផងដែរ។ តែបើតាមរបាយការណ៍មួយចំនួន កម្ពុជា ជំពាក់បំណុលចិនច្រើនជាងគេ មានជិត៥ពាន់លានដុល្លារតែ រដ្ឋាភិបាលកម្ពុជា បដិសេធ តួលេខនេះ៕
