ភ្នំពេញ៖ សាលាដំបូងរាជធានីភ្នំពេញ បានចេញដីការកោះហៅប្រធាន និងសមាជិកព្រឹទ្ធសភាគណបក្សសង្គ្រោះជាតិ ជុំវិញបណ្តឹងមេធាវីរបស់រដ្ឋាភិបាលប្តឹងនៅថ្ងៃទី ០១ ខែសីហា ដែលថា សម្ដេច ហ៊ុន សែន នៅពីក្រោយឃាតកម្មលើលោកបណ្ឌិត កែម ឡី ។ មេធាវីលោក សម រង្ស៊ី និងលោកស្រី ថាក់ ឡានី សមាជិកព្រឹទ្ធសភា បក្សប្រឆាំង ថានឹងទៅកាន់ តុលាការដើម្បី ស្ដាប់ការចោទប្រកាន់ របស់ តុលាការ លើកូនក្ដីរបស់លោក។ លោក ធូ វីរៈ រាយការណ៍៖
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានឲ្យដឹងថា សាលាដំបូងរាជធានីភ្នំពេញបានចេញដីការបង្គាប់ឲ្យប្រធានគណបក្សសង្គ្រោះជាតិ លោក សម រង្ស៊ី ចូលឆ្លើយបំភ្លឺពាក់ព័ន្ធនឹងបណ្តឹងរបស់មេធាវីរដ្ឋាភិបាល គឺលោក គី តិច នៅថ្ងៃទី ១៩ខែសីហា នៅម៉ោង ៨:៣០ ព្រឹក។
លោក សម រង្ស៊ី ប្រធានគណបក្សសង្គ្រោះជាតិ ត្រូវបានលោកមេធាវីរបស់សម្តេច ហ៊ុន សែន គឺ លោក គី តិច បានប្តឹងនៅពេលមេបក្សប្រឆាំងរូបនេះ បានសរសេរលើហ្វេសប៊ុក កាលពីថ្ងៃទី ១០ កក្កដា ថា «ការបាញ់សម្លាប់ លោកបណ្ឌិត កែម ឡី គឺជាការរៀបចំដោយរដ្ឋអំណាច»។
លោក លី សុផាណា មានប្រសាសន៍នៅព្រឹកថ្ងៃពុធនេះថា តុលាការសាលាដំបូងរាជធានីភ្នំពេញក៏ បានចេញដីការកោះ បង្គាប់ឲ្យ លោកស្រី ថាក់ ឡានី សមាជិកព្រឹទ្ធសភាមកពីគណបក្សប្រឆាំងចូលខ្លួនបំភ្លឺនៅថ្ងៃទី ០៨ ខែសីហា វេលាម៉ោង ២ រសៀល ទាក់ទងនិងបណ្តឹងរបស់មេធាវីលោក គី តិច ដូចគ្នានេះ។
កាលពីថ្ងៃទី ២៩ខែកក្កដា ឆ្នាំ២០១៦ លោកស្រី ឡានី បានថ្លែង ទៅកាន់ប្រជាពលរដ្ឋ នៅក្នុងវេទិកាសាធារណៈមួយ នៅខេត្តរតនគិរី ថា សម្ដេចនាយករដ្ឋមន្ដ្រី ហ៊ុន សែន ជាអ្នកបាញ់សម្លាប់លើលោកបណ្ឌិត កែម ឡី។ ប៉ុន្តែលោកស្រីចាត់ទុកការបង្ហោះឃ្លិបនេះថាជាការកាត់ត។
មេធាវីការពារក្តីឲ្យលោក សម រង្ស៊ី គឺ លោក សំ សុគង់ មានប្រសាសន៍ថា លោកមិនច្បាស់ថាតើកូនក្តីរបស់លោកចូលខ្លួនទៅបំភ្លឺដោយផ្ទាល់ ឬក៏ឲ្យលោកចូលជំនួសថ្ងៃទី ១៩សីហា ព្រោះលោកមិនទាន់បានពិភាក្សាជាមួយកូនក្តីនៅឡើយ។ ទោះបីយ៉ាងណាលោកថា ក្នុងនាមជាមេធាវីត្រូវតែចូលស្តាប់ការបំភ្លឺនៅតុលាការ។
លោក សំ សុគង់៖«បើចំពោះមេធាវីមានភស្តុតាំង ទឡ្ហីករណ៍មួយចំនួនតែមិនទំលាយប្រាប់ឥឡូវទេទី១ ហើយទី២ មេធាវីនៅមិនបានទទួលឯកសារ សំណុំរឿង ពាក្យបណ្តឹងពីភាគីម្ខាងទៀតទេ អញ្ចឹងនៅពេល copy សំណុំរឿងហើយមេធាវិនិងសិក្សាពីសំណុំរឿង និងសិក្សាអំពីច្បាប់ ដើម្បីធ្វើការពារ ក៏ដូចលើកទឡ្ហីករណ៍នៅពេលតុលាការហៅទៅចូលបំភ្លឺហ្នឹង»។
លោក សំ សុគង់ បញ្ជាក់ថា ករណីដីការកោះហៅកូនក្តីរបស់លោកម្នាក់ទៀត គឺអ្នកស្រី ថាក់ ឡានី សមាជិកព្រឹទ្ធសភាគណបក្សសង្គ្រោះជាតិ លោកកំពុងសិក្សាទៅលើពាក្យបណ្តឹង ភស្តុតាំងផ្សេងៗ ដើម្បីដោះបន្ទុកឲ្យកូនក្តីរបស់លោក។ ប៉ុន្តែលោកក៏មិនទាន់អាចបញ្ជាក់បាននៅឡើយទេ ថាតើកូនក្តីរបស់លោកនឹងចូលខ្លួនទៅបំភ្លឺដោយផ្ទាល់ ឬឲ្យលោកជំនួស។
លោក សំ សុគង់៖«អ្វីដែលគាត់និយាយនិងយើងជាមេធាវីជឿគាត់ហើយ សំខាន់យើងនៅរកឯកសារ ភស្តុតាំង ដើម្បីដោះបន្ទុកការប្តឹងចោទប្រកាន់ ឬការប្តឹងចោទប្រកាន់ទៅលើកូនក្តីនិង។ លិខិតអញ្ជើញទើបមកព្រឹកមិញ ហើយកូនក្តីតាមពិតមិនទាន់ទទួលនៅឡើយ អញ្ចឹងយើងមិនទាន់បានពិភាក្សាជាមួយគាត់នៅឡើយទេ។ យើងរងចាំការពិភាក្សាជាមួយគាត់ជាផ្លូវការសិន បានយើងសម្រេចឲ្យគាត់ចូល ឬឲ្យមេធាវី ចូល»។
ទោះបីយ៉ាងលោកថា ករណីបណ្តឹងហាក់បីដូចជាលឿនពេក ស្ទើរលោករៀបចំខ្លួនសឹងមិនទាន់ ដោយខុសពីបណ្តឹងមុនៗ។
ពាក្យបណ្ដឹងរបស់លោក គី តិច ប្ដឹងលោក សម រង្ស៊ី និងពាក្យបណ្ដឹង លើលោកស្រី ថាក់ ឡានី សមាជិកព្រឹទ្ធសភា មកពីគណបក្សសង្គ្រោះជាតិ មានខ្លឹមសារប្រហាក់ប្រហែលគ្នា គឺជាការចោទប្រកាន់ មួលបង្កាច់ និងទម្លាក់កំហុសយ៉ាងងងិតងងុល ប៉ះពាល់ទៅដល់កិត្តិយស និងសេចក្ដីថ្លៃថ្នូររបស់សម្ដេច ហ៊ុន សែន និងមានចរិតញុះញ៉ុង ដល់មហាជន ដែលអាចបង្កឲ្យមានចលាចលក្នុងសង្គម និងប៉ះពាល់ដល់ដំណើរការនីតិវិធី របស់តុលាការ។
លោកមេធាវី គី តិច បានស្នើសុំឲ្យតុលាការសាលាដំបូងរាជធានីភ្នំពេញ ផ្ដន្ទាទោសទាំងលោក សម រង្ស៊ី និងលោកស្រី ថាក់ ឡានី ទៅតាមផ្លូវច្បាប់ និងទាមទារសំណង ជម្ងឺចិត្ត ចំនួនទឹកប្រាក់ ១០០រៀល។
បើតាមអ្នកនាំពាក្យសាលាដំបូងរាជធានីភ្នំពេញ បញ្ជាក់ថា ជុំវិញពាក្យប្តឹងរបស់មេធាវីលោក គី តិច តុលាការសាលាដំបូង មិនទាន់ចោទប្រកាន់ពីបទអ្វីនៅឡើយ ដោយកំពុងដំណើរការស៊ើបអង្កេតទៅលើពាក្យបណ្តឹង ភស្តុតាង សាក្ស៊ី និងឯកសារពាក់ព័ន្ធ។
អ្នកនាំពាក្យរូបនេះ បន្ថែមថា រីឯមេធាវីលោក គី តិច នឹងចូលខ្លួនទៅឆ្លើយបំភ្លឺនៅសាលាដំបូងរាជធានីភ្នំពេញ នៅថ្ងៃទី ០៥ ខែសីហា ជុំវិញពាក្យបណ្តឹងរបស់ខ្លួន។
កាលពីអង្គារទី២សីហា ក្នុងពិធីមួយនៅខេត្តកំពង់ស្ពឺ សម្ដេចនាយករដ្ឋមន្ត្រី ថា លោកបានអត់ឱន និង លើកលែងទោស ដល់អ្នកនយោបាយនោះច្រើនហើយតែមិន រៀងចាល់សោះ ដែលសម្ដេចត្រូវប្ដឹងទៅតុលាការ ព្រោះប្រទេសមានច្បាប់។
តែបែបនេះក្ដីលោក សូ ចន្ថា សាស្ត្រាវិទ្យាសាស្ត្រនយោបាយគិតថា មិនមែនជារឿងល្អទេ ដែលអ្នកនយោបាយ មិនបានគិតរឿងជាតិ ហើយគិតរឿងសងសឹកគ្នា។ លោកថា ករណីគ្មានចំណេញដល់ជាតិហើយធ្វើឱ្យប្រទេសជិតខាងមើលងាយ ជាតិខ្មែរ។
លោក សូ ចន្ថា៖ «ការដែលយករឿងបុគ្គលចោទប្រកាន់គ្នានេះ គឺមិនបានផលចំណេញអីដល់ជាតិឡើយ ប៉ុន្ដែផ្ទុយទៅវិញគឺខាតបង់ជាតិធ្ងន់ធ្ងរមែនទែន ខាតទីមួយយើងឃើញថា ការបែកបាក់ជាតិ បានន័យថាអ្នកនយោបាយមិនអាចរកចំណុចរួមមួយដើម្បីកសាងជាតិបានទេ ហ្នឹងហើយការបែកបាក់ដែលធ្វើឲ្យពលរដ្ឋកម្ពុជាអស់សង្ឃឹមទៅលើអ្នកនយោបាយ ទីពីរយើងឃើញថាស្ថេរភាបពនយោបាយ បើសិនជាអ្នកនយោបាយឡើងកម្ដៅដាក់គ្នាប្ដឹងផ្ដល់គ្នា ហ្នឹងស្ថេរភាពនយោបាយគ្មានទេ ពលរដ្ឋរស់នៅដោយការភ័យខ្លាចគ្មានទំនុកចិត្ដ ហើយចំណុចទីបីយើងថា ពេលខ្មែរបែកបាក់គ្នាគឺបរទេសគឺមានឱកាស់ចូលជ្រៀតជ្រែកកិច្ចការផ្ទៃក្នុងរបស់កម្ពុជា»។
យ៉ាងណា ក៏ដោយ លោក សម រង្ស៊ី ដែលជាប់រឿងក្ដីនៅតុលាការ ចំនួន ៤រឿងមកហើយនេះ បាន បង្ហោះសាររបស់លោកជាថ្មីម្ដងទៀតនៅថ្ងៃនេះដោយបានអះអាងថា គ្មានអ្វីដែលអាថ៌កំបាំងទេ ករណីឃាតកម្មលើ លោក បណ្ឌិត កែម ឡី។ លោកថា ជាឃាតកម្ម រៀបចំដោយ រដ្ឋអំណាច របស់រដ្ឋាភិបាល ៕
