ភ្នំពេញ៖ អ្នកនាំពាក្យគណៈកម្មធិការជាតិរៀបចំការបោះឆ្នោត(គ.ជ.ប) លោក ហង្ស ពុទ្ធា មានប្រសាសន៍ថា គ.ជ.ប កំពុងតែពិចារ ណាពីការជួយសម្រួលរបស់ក្រសួងការងារ ទៅដល់ពលករខ្មែរ ដែលបម្រើការងារនៅក្នុងប្រទេសថៃឱ្យបានចុះឈ្មោះបោះឆ្នោត ។ តែអង្គការសង្គមស៊ីវិលថា គ.ជ.ប ត្រូវរួសរាន់ពីការពិចារណានេះ។ ការលើកទ្បើងរបស់មន្ត្រី គ.ជ.ប ដូចនេះបន្ទាប់ពី គ.ជ.ប ទទួលបានព័ត៌មានថា ក្រសួងការងារចង់ជួយសម្រួលដល់ការចុះឈ្មោះបោះឆ្នោតដល់ពលករខ្មែរដែលទៅធ្វើការនៅប្រទេសថៃ។
ខណៈការចុះឈ្មោះបោះឆ្នោតកាន់តែខិតជិតមកដល់ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានថ្លែងប្រាប់អ្នកសារព័ត៌មានថា ក្រសួងការងារនឹងជួយដល់ គ.ជ.ប ក្នុងការចុះឈ្មោះបោះឆ្នោតដល់ពលរខ្មែរដែលទៅធ្វើការនៅប្រទេសថៃ ប្រសិនបើខាង គ.ជ.ប ដាក់សំណើរមកក្រសួងការងារនោះ។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានថ្លែងប្រាប់អ្នកសារព័ត៌មានបន្ទាប់ពីបានពិភាក្សាការងារជាមួយឯកអគ្គរដ្ឋទូតអូស្ត្រាលីថា ក្រសួងការងារ នឹងជួយសម្រួលឱ្យពលករខ្មែរដែលធ្វើការនៅប្រទេសថៃអាចចូលរួមចុះឈ្មោះបោះឆ្នោតបាន ប្រសិនបើខាង ស្ថាប័ន គ.ជ.ប ដាក់សំណើរមកក្រសួងការងារឱ្យជួយសម្រួលនោះ។ នេះបើយោងតាមអង្គភាព FRESH NEWS។
ឆ្លើយតបនឹងការលើកទ្បើងនេះដែរ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា គ.ជ.ប នឹងធ្វើការពិចារណាចំពោះការលើកទ្បើងរបស់រដ្ឋមន្ត្រីក្រសួងការងារ ប៉ុន្តែលោក ហង្ស ពុទ្ធា បញ្ជាក់ថាការចូលរួមសហការ ពីភាគីពាក់ព័ន្ធគឺជារឿងសំខាន់ជាពិសេសការរួបរួមសាមគ្គីគ្នាដើម្បីឱ្យការចុះឈ្មោះបោះឆ្នោតអាចជឿទុកចិត្តបាន។ លោក ហង្ស ពុទ្ធា៖ «បាទទទួលបានព័ត៌មាននេះ គ.ជ.ប នឹងធ្វើការពិចារណា ខ្ញុំទើបតែទទួលបានព័ត៌មាននេះតាមរយៈព័ត៌មានអញ្ចឹងខ្ញុំមិនទាន់បានដឹងថាគ.ជ.ប ប្រជុំសម្រេចបែបណានោះទេក្នុងករណីហ្នឹងប៉ុន្តែខ្ញុំអាចនិយាយបានចេះថាបើតាមស្មារតីមួយដែលចង់ឱ្យប្រជាពលរដ្ឋគ្រប់រូបមាន ឱកាសចុះឈ្មោះបោះឆ្នោតដើម្បីបានបោះឆ្នោតគឺជាឆន្ទះល្អគឺជាគោលបំណងល្អហើយដែលកម្ពុជាត្រូវរួមគ្នាដើម្បីធ្វើឱ្យមានការបោះឆ្នោតមួយដែលលទ្ធផលទទួលយកបានពីគ្រប់ភាគីពាក់ព័ន្ធ »។
ចំណែកនាយកប្រតិបត្តិគណកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរីនឹងត្រឹមត្រូវនៅកម្ពុជា ហៅកាត់ថា NICFEC លោក សំ គន្ធាមី មានប្រសាសន៍ថា គ.ជ.ប ត្រូវពិចារណាឱ្យបានរួសរាន់។ លោកថា ពេលវេលានៃការចុះឈ្មោះបោះឆ្នោតខិតជិតមកដល់ហើយដែល គ.ជ.ប ត្រូវតែពន្លឿនការពិចារណាធ្វើយ៉ាង អាចឱ្យក្រសួងការងារចូលរួមជួយសម្រួលពីការចុះឈ្មោះបោះឆ្នោតរបស់ពលករខ្មែរនៅប្រទេសថៃ។
លោក សំ គន្ធាមី បន្តថា ក្រសួងការងារជួយសម្រួលដូចនេះ គឺការចុះឈ្មោះបោះឆ្នោតដល់ពលករខ្មែរនៅប្រទេសថៃពិតជាការល្អប្រសើរណាស់ ពីព្រោះក្រសួងការងារអាចទំនាក់ទំនងទៅដៃគូររោងចក្រនៅប្រទេសថៃឱ្យជួយសម្រួលពីបញ្ហានេះ។ លោក សំ គន្ធាមី ៖ «គ.ជ.ប គួរតែពិចារណាឱ្យបានរួសរាន់ទៅដើម្បីឱ្យខាងក្រសួងគេសហការទៅហើយពលករយើងបានចុះឈ្មោះគ្រប់ៗគ្នាផងនេះជាសញ្ញាមួយល្អដែលមានសហការអញ្ចឹងហា ព្រោះយើងចង់ឱ្យប្រជាពលរដ្ឋទាំងអស់គាត់ប្រើប្រាស់សិទ្ធិរបស់គាត់ក្នុងការចុះឈ្នោះបោះឆ្នោតបានគ្រប់ៗគ្នា…»។
ជុំវិញនៃការលើកទ្បើងនេះដែរ នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ខមហ្វ្រែល (COMFREL) លោក គល់ បញ្ញា មានប្រសាសន៍ថា លោកសាទរដែលក្រសួងការងារមានបំណងចង់ជួយសម្រួលដល់ពលករខ្មែរដែលបម្រើការងារនៅប្រទេសថៃអាចចូលរួមចុះឈ្មោះបោះឆ្នោតបានតាមរយៈសំណើររបស់ គ.ជ.ប។
លោក គល់ បញ្ញា បានទទូចឱ្យ គ.ជ.ប ពិចារណាឱ្យបានលឿនផងដែរជុំវិញការលើកទ្បើងរបស់រដ្ឋមន្ត្រីក្រសួងការងារ ។បន្ថែមពីនេះទៀតនោះ លោកក៏ចង់ឱ្យក្រសួង និងរាជរដ្ឋាភិបាលធ្វើវិសោធកម្មច្បាប់បោះឆ្នោតដើម្បីជួយសម្រួលទៅដល់ គ.ជ.ប អាចយកសម្ភារៈបោះឆ្នោតទៅដល់ប្រទេសថៃដើម្បីជួយសម្រួលទៅដល់ពលករខ្មែរដែលមិនមានលទ្ធភាពត្រលប់មកស្រុកខ្មែរ។
ទន្ទឹមនឹងការស្នើខាងលើនោះដែរ លោក គល់ បញ្ញា សម្តែងការព្រួយបារម្ភថាការចុះឈ្មោះបោះឆ្នោតរបស់ពលករខ្មែរដែលចំណាកស្រុកអាចនឹងមានការយឺតយ៉ាវដោយសារតែការចុះឈ្មោះបោះឆ្នោតកាន់តែខិតជិតមកដល់។ លោក គល់ បញ្ញា៖ «ឥលូវយើងនេះពិបាកប៉ាន់ប្រមាណនេះជាការព្រួយបារម្ភរបស់ខ្ញុំ ហើយយើងក៏ដឹងអង្គការសង្គមស៊ីវិលដូចជាគ្មាន មធ្យោបាយអីច្បាស់លាស់ ឬក៏ប្រាកដជាថាអាចធ្វើឱ្យប្រជា ពលរដ្ឋខ្មែរយើងឬកម្មករចំណាកស្រុករស់នៅក្រៅប្រទេសអាចត្រលប់មកចុះឈ្មោះ…»។
គួរបញ្ចាក់ដែរថាកាលពីថ្ងៃទី ៣១ ខែកក្កដា ឆ្នាំ២០១៦នេះ តំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង លើកទ្បើងថា គណបក្សសង្គ្រោះជាតិបានស្នើទៅ ទៅ គ.ជ.ប ដើម្បីស្នើសុំជួយសម្រួលការចុះឈ្មោះបោះឆ្នោតដល់ កម្មករ-កម្មការិនី ហើយក្រុមសមាជិកសភាគណ បក្សសង្គ្រោះជាតិ ក៏នឹងធ្វើលិខិតទៅរដ្ឋមន្ត្រីក្រសួងការងារដើម្បីជួយសម្រួលការចុះឈ្មោះបោះឆ្នោតណដល់ពលករក្នុងស្រុក និងពលករចំណាកស្រុក។
សូមជំរាបជូនថាពលរករខ្មែរដែលកំពុងបម្រើការងារនៅប្រទេសថៃមានប្រមាណជា៦០ ម៉ឺននាក់៕
