ចិន៖ អ្នកនាំពាក្យក្រសួងការបរទេសចិនលោក លូ កាំង បានប្រការពីជំហររបស់ចិនជាថ្មីទៀតថា សេចក្តីសម្រេចមជ្ឈឹត្តការតុលា ការអន្តរជាតិក្រុងឡាអេ លើបញ្ហាសមុទ្រចិនខាងត្បូងគឺមិនស្របច្បាប់នោះទេ។
តាមបណ្ដាញផ្សាយព័ត៌មាន CNTV លោក លូ ធ្វើការកត់សម្គាល់ដូច្នេះ គឺបន្ទាប់ពីមានរបាយការណ៍មួយពីប្រទេសជប៉ុន ដែលនិយាយថាប្រទេសចិនគួរតែគោរពតាមច្បាប់អន្តរជាតិមួយនេះ និងត្រូវទទួលយកលទ្ធផលដែលតុលាការបានសម្រេច។ លោក លូ និយាយថា៖«បណ្តាប្រទេសជាង ៨០ រួមមានទាំងអន្ដរជាតិ និងក្រុមប្រទេសក្នុងតំបន់ផង ក៏បានគាំទ្រជំហររបស់ប្រទេសចិនផងដែរ។ មានតែប្រទេសពីរ ទៅបី ប៉ុណ្ណោះថា សេចក្តីសម្រេចនេះគឺត្រឹមត្រូវស្របច្បាប់ និងដោយអនុលោមតាមច្បាប់អន្តរជាតិ។ ខ្ញុំសង្ឃឹមថា បណ្តាប្រទេសមួយចំនួនគួរតែអនុវត្តតាមជំហរមតិភាគច្រើននៃសហគមន៍អន្តរជាតិ»។
លោក Lu បានឱ្យដឹងទៀតថា ភាគច្រើននៃប្រទេសទាំងនោះ ក៏យល់ថាសេចក្តីសម្រេចតុលាការអន្តរជាតិគឺខុសនិងតួនាទីខ្លួនផងដែរ។
លោក Lu Kang បានថ្លែងថា សេចក្តីសម្រេចអន្តរជាតិនេះ គឺមិនមានតំលៃអ្វីនោះទេ ហើយចិនចាត់ទុកការសម្រេចនេះជាមោឃៈតាំងពីដំបូងមកម្ល៉េះ ចំណែករបាយការណ៍ពីជប៉ុនក៏ផ្ទុយនិងភាពត្រឹមត្រូវផងដែរ។
អ្នកនាំពាក្យរូបនេះ បានលើកឡើងទៀតថា ភាគច្រើននៃបណ្តាប្រទេសអាស៊ាន បានព្រមព្រៀងគ្នាដោះស្រាយជម្លោះនេះ តាមរយៈការចរចាដោយផ្ទាល់រវាងប្រទេសពាក់ព័ន្ធ៕
ប្រភព៖ CNTV
