ភ្នំពេញ៖ ស្ថាបនិកបណ្ដាញព្រះសង្ឃឯករាជ្យដែលជាសមាជិកគណៈកម្មការបុណ្យសពលោកបណ្ឌិត កែម ឡី មានថេរដីកាថា មានអ្នកផ្ដល់ដំណឹងដល់ព្រះអង្គថា សមត្ថកិច្ចចង់សហការគ្នាចាប់ព្រះកាយព្រះអង្គ ប៉ុន្ដែមិនដឹងក្នុងបំណងអ្វីពិតប្រាកដនោះទេ ។ ជុំវិញរឿងនេះសង្គមស៊ីវិលយល់ថា ប្រសិនជាមានកងកម្លាំងសមត្ថកិច្ចរបស់រាជរដ្ឋាភិបាល បង្ហាញសារចង់ឃាត់ព្រះកាយព្រះអង្គមែន នេះជាសញ្ញាបំបិទសិទ្ធិសេរីភាពសម្ដែងមតិយ៉ាងពិតប្រាកដ។
តែបែបនេះក្ដីនេះ ទាំងអ្នកនាំពាក្យក្រសួងមហាផ្ទៃ អ្នកនាំពាក្យអគ្គស្នងការនគរបាលជាតិ និងស្នងការនគរបាលរាជធានីភ្នំពេញ វិទ្យុស្ត្រីមិនអាចសុំការបំភ្លឺដោយសារមិនលើកទូរស័ព្ទ។
ព្រះតេជគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យបានថ្លែងឲ្យវិទ្យុស្ដ្រី FM102 ឱ្យដឹងនៅថ្ងៃអង្គារិ៍ ទី ២៦ កក្កដា នេះថា មានបុរសម្នាក់ដែលមានមុខងារជាសមត្ថកិច្ចបានដាសតឿនព្រះអង្គថា មានកងកម្លាំងសមត្ថកិច្ចកំពុងតែសហការគ្នាក្នុងបំណងដើម្បីតាមរកព្រះអង្គ តែមិនដឹងក្នុងគោលបំណងអ្វីពិតប្រាកដនោះទេ ។
ព្រះតេជគុណ ប៊ុត ប៊ុនតិញ បន្ដថា បុរសម្នាក់នោះប្រាប់ឲ្យព្រះអង្គភៀសព្រះកាយរកកន្លែងសុវត្ថិភាពសិន ព្រោះខ្លាចមានគ្រោះថ្នាក់ដល់ព្រះអង្គ ។
ស្ថាបនិកបណ្ដាញព្រះសង្ឃឯករាជ្យអង្គនេះបន្ដថា ក្រោយពីទទួលដំណឹងនេះ ព្រះអង្គមិនបានចាប់អារម្មណ៍អ្វីទេ ហើយថាមិនអាចមានការយាយីធ្វើឃាតរូបព្រះអង្គឡើយ ។ ប៉ុន្ដែព្រះអង្គយល់ថា នេះជាសារមួយដើម្បីធ្វើឲ្យព្រះអង្គតក់ស្លុតព្រះទ័យ និងបាក់ស្បាតស្មារតី ដែលព្រះអង្គបានបញ្ចេញមតិមិនសមរម្យណាមួយ ធ្វើឲ្យប៉ះពាល់ដល់ជនណាម្នាក់ ដើម្បីឲ្យក្រុមទាំងនោះទម្លាក់កំហុសចោទប្រកាន់លើព្រះអង្គ។
ព្រះអង្គប៊ុត ប៊ុនតិញ៖«កាលពីព្រឹកមិញមានប៉ូលីសនៅភ្នំពេញទួរស័ព្ទមកប្រាប់តាំងពីម៉ោង ៦ព្រឹកថា សុំឲ្យព្រះតេជគុណរកកន្លែងណាមានសុវត្ថិភាពទៅពីព្រោះ ឥឡូវនេះមានប៉ូលីសអីគេសហការគ្នាតាមរកព្រះអង្គហើយ តែមិនដឹងថារកក្នុងគោលបំណងអីទេ សូមតេជគុណរក្សាសុវត្ថិភាពផង ហើយក៏បិតទួរស័ព្ទទៅ»។
វិទ្យុស្ដ្រីមិនអាចទាក់ទញទៅកាន់អ្នកនាំពាក្យក្រសួងមហាផ្ទៃ និងស្ថាប័នពាក់ព័ន្ធផ្សេងទៀតដើម្បីសូមការបំភ្លឺជុំវិញការអះអាងរបស់ព្រះអង្គប៊ុត ប៊ុនតិញ បានទេនៅថ្ងៃនេះ។
ចំណែក អគ្គលេខាធិការនៃអង្គការសម្ព័ន្ធភាពការពារសិទ្ធិមនុស្សកម្ពុជា CHRAC លោក សួន ប៊ុនស័ក មានប្រសាសន៍ថា ប្រសិនជាអាជ្ញាធរបង្ហាញសារដូចការអះអាងរបស់ព្រះអង្គប៊ុត ប៊ុនតិញ ពិតមែន វាគឺជារឿងស្ដែងច្បាស់ណាស់ថា ជាសារគំរាមគោលការណ៍ប្រជាធិបតេយ្យ បំពានច្បាប់ ហើយក៏រំលោភទៅលើស្មារតីរដ្ឋធម្មនុញ្ញថែមទៀត។
លោក សួន ប៊ុនស័ក បញ្ជាក់ថា ព្រះអង្គ ប៊ុត ប៊ុនតិញ ជាសកម្មជនរបស់ក្រុមអង្គការសង្គមស៊ីវិល ប្រសិនជាអាជ្ញាធររដ្ឋគំរាមព្រះអង្គដូចនេះ គឺមិនមែនមានន័យថា គំរាមតែព្រះអង្គតែមួយប៉ុណ្ណោះទេ តែជាការគំរាមដល់ពលរដ្ឋគ្រប់រូបផងដែរ។ លោក សួន ប៊ុន ស័ក៖«ព្រះតេជគុណប៊ុតប៊ុនតិញជាសកម្មជនសង្គមស៊ីវិលយើង ទៅលើកិច្ចការសាធារណៈហើយបើរគំរៀមចង់រកចាប់ព្រះកាយរបស់លោក អានេះគឺជាការបញ្ជូនសារទៅកាន់សាធារណៈជន (ដើម្បីបំភ័យ) ហើយជារូបភាពនៃការគំរៀមគំហែងដែលមិនអាចប្រកែកបាន»។
ក្នុងឋានៈជាសមាជិកនៃគណៈកម្មការបុណ្យសពលោកបណ្ឌិត កែម ឡី ព្រះអង្គ ប៊ុត ប៊ុនតិញ មានថេរដីការធ្ងន់ៗ ករណីឃាតកម្មលើអ្នកវិភាគសង្គម ដែលខ្មាន់កាំភ្លើងបាញ់សម្លាប់កាលពីថ្ងៃទី១០កក្កដា ។
ហើយជាមួយគ្នានេះ ព្រះអង្គដែលជាស្ថាបនិកបណ្ដាញព្រះសង្ឃឯករាជ្យ ព្រះអង្គតែងតែចេញព្រះភ័ក្រសម្ដែងមតិនៅទីសាធារណៈស្ទើរតែគ្រប់ពេល មិនថាតែការសម្ដែងមតិជុំវិញបញ្ហាសង្គមប៉ុណ្ណោះទេ គឺ ព្រះអង្គតែងនិមន្តការពារព្រៃឈើនៅតំបន់ព្រៃឡង់ផងដែរ៕
