ភ្នំពេញ៖ ស្ថានទូតអាមេរិកប្រចាំនៅកម្ពុជា បានជូនដំណឹងដល់ប្រជាពលរដ្ឋអាមេរិកដែលរស់នៅក្នុងរាជធានីភ្នំពេញ ឲ្យបញ្ចៀសការធ្វើដំណើរនៅតាមផ្លូវត្រូវដង្ហែសពលោកបណ្ឌិត កែម ឡី ខណៈដែលសពលោកបណ្ឌិតនឹងដង្ហែចេញពីវត្តពោធិ៍យារាម ហៅវត្តចាស់ ឆ្ពោះទៅស្រុកតាំងកក់ ខេត្តតាកែវ នៅថ្ងៃអាទិត្យទី២៤ កក្ដដា ស្អែកនេះ។
ស្ថានទូតសហរដ្ឋអាមេរិកចេញសេចក្តីជូនដំណឹងដូចនេះ ធ្វើឡើងបន្ទាប់ពីសពលោកបណ្ឌិត កែម ឡី នឹងត្រូវដង្ហែ នៅថ្ងៃទី ២៤ ខែ កក្កដា វេលាម៉ោង ៧ ព្រឹកស្អែកនេះ ដោយត្រូវឆ្លងកាត់ស្ពានមិត្តភាព ជប៉ុន ឆ្ពោះទៅមហាវិថីព្រះមុនីវង្ស មហាវិថីសហព័ន្ធរុស្ស៊ី រហូតដល់រង្វង់មូលចោមចៅជិតព្រលានយន្តហោះអន្តរជាតិភ្នំពេញ ហើយត្រូវបន្តដំណើរទៅលើផ្លូវជាតិលេខ ៣ ឆ្ពោះខេត្តតាកែវ។ ការដង្ហែសពអ្នកវិភាគឯករាជ្យរូបនេះ គេរំពឹងថា នឹងមានអ្នកចូលរួមរាប់ម៉ឺននាក់។
យោងតាមហ្វេសប៊ុកផ្លូវការរបស់ស្ថានទូតសហរដ្ឋអាមេរិកប្រចាំនៅកម្ពុជា បានចុះផ្សាយនៅថ្ងៃទី ២៤ ខែ កក្កដា ដោយប្រាប់ពលរដ្ឋខ្លួនកុំឲ្យធ្វើដំណើរទៅតំបន់ផ្លូវ ហែរក្បួនសពលោកបណ្ឌិត កែម ឡី ព្រោះអាចនឹងកក់ស្ទះចរាចរណ៍ខ្លាំង។ ស្ថានទូតអាមេរិកបានអំពាវនាវឲ្យប្រជាពលរដ្ឋអាមេរិកទាំងអស់ត្រូវមានការប្រុងប្រយ័ត្នអំពីសុវត្ថិភាពផ្ទាល់ខ្លួនផងដែរ៕
