ភ្នំពេញ៖ លោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា ថ្លែងថានៅក្នុងឆ្នាំ២០១៦នេះ និស្សិតកម្ពុជាចំនួន៥២នាក់បានទទួលអាហារូបករណ៍១០០% ទៅសិក្សានៅទ្វីបអឺរ៉ុប។ តាមលោកលោក George Edgar ការផ្ដល់អាហាររូបករណ៍ ដើម្បីអោយវិស័យអប់រំនៅកម្ពុជា កាន់តែល្អប្រសើរបន្ថែមទៀត។ លោក ហង់ ជួនណារ៉ុន រដ្ឋមន្ដ្រីក្រសួងអប់រំ បានថ្លែងសាទរ ដោយចាត់ទុកសហភាពអឺរ៉ុបជាដៃគូដ៏ល្អសម្រាប់វិស័យអប់រំនៅកម្ពុជា។ កញ្ញា ជុំ ជោកជាតា ជូនព័ត៌មានលម្អិត៖
នៅក្នុងសន្និសីទការសែតស្ដីពីអាហាររូបករណ៍ Erasmus+ កាលពីថ្ងៃអង្គារ ទី១៩កក្កដាឆ្នាំ ២០១៦ ដែលធ្វើឡើងនៅឯស្ថានទូតសហភាពអឺរ៉ុបប្រចាំកម្ពុជា លោក George Edgar បានប្រកាសថានៅក្នុងឆ្នាំ២០១៦នេះ និស្សិតកម្ពុជាប្រមាណជា៥២នាក់ បានទទួលអាហារូបករណ៍១០០% ទៅសិក្សានៅទ្វីបអឺរ៉ុប ក្នុងរយៈពេល៦ខែទៅ២៤ខែ និងគ្រូឧទ្ទេសទៅធ្វើទស្សនកិច្ចសិក្សានៅអឺរ៉ុបរយៈពេលពី ៥ថៃ្ងទៅ៦០ថ្ងៃផងដែរ។
ជាងនេះ លោក George Edgar ក៏បានបញ្ជាក់ថាអាហារូបករណ៍ដែលបានផ្ដល់ជូននេះ គឺនិស្សិតកម្ពុជានឹងទទួលបានក្នុងកម្រិតមួយដោយមានមុខវិជ្ជាផ្សេងៗគ្នា ដូចជាអាហារូបករណ៍ សម្រាប់ថ្នាក់បរិញ្ញាបត្រ បរិញ្ញាបត្រជាន់ខ្ពស់ ថ្នាក់បណ្ឌិត និងថ្នាក់ក្រោយបណ្ឌិត លើមុខវិជ្ជា កសិកម្ម វិទ្យាសាស្ដ្រសត្វនិងអាហារ គីមី ទំនាក់ទំនង អប់រំធុរៈកិច្ច សេដ្ឋកិច្ច បរិស្ថាន វិស្វកម្ម ជលផល ព្រៃឈើ ព័ត៌មានវិទ្យា គ្រប់គ្រង រដ្ឋបាលសាធារណៈ និងអភិវឌ្ឍជនបទ។
លោក George Edgar បានបញ្ជាក់ប្រាប់តាមរយៈអ្នកបកប្រែទៀតថា៖ «បាទ៎ហើយនៅក្នុងនោះគឺ មាននិស្សិតក៏ដូចជាបុគ្គលិកសិក្សាធិការផ្សេងៗ ដែលគាត់ទទួលអាហារូបករណ៍ហ្នឹង គឺ នៅក្នុងកម្រិតអាហារូបករណ៍ផ្សេងៗគ្នា ថ្នាក់បរិញ្ញាបត្រ បរិញ្ញាបត្រជាន់ខ្ពស់ ថ្នាក់បណ្ឌិត និងថ្នាក់ក្រោយបណ្ឌិតផ្សេងៗជាដើមហ្នឹង ទៅសិក្សានៅតាមបណ្ដាសកលវិទ្យាល័យប្រមាណជា២៤ នៅតាមបណ្ដាប្រទេសប្រមាណ១៤ប្រទេសនៅសហភាពអឺរ៉ុប »។
ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជារូបនេះ ក៏បានបន្ថែមដែរថាក្ដីរំពឹង ក្នុងការផ្ដល់អាហាររូបករណ៍ដល់និស្សិតកម្ពុជា នឹងនាំឱ្យធនធានមនុស្ស កម្ពុជា កាន់តែច្រើន និងមានគុណភាព។
លោក George Edgar បានបញ្ជាក់តាមរយៈអ្នកបកប្រែលើចំនុចនេះទៀតថា៖ « បាទ៎ យើងផ្ដោត យ៉ាងសំខាន់ទៅលើវិស័យអប់រំ ព្រោះថាយើងជឿជាក់ថាវិស័យអប់រំហ្នឹង គឺជាវិស័យអាទិភាពចំប្បងបំផុត នៅក្នុងប្រទេសកម្ពុជាក៏ដូចជា បណ្ដាប្រទេសផ្សេងៗផងដែរ ព្រោះថា វិស័យអប់រំហ្នឹង គឺជាមូលដ្ឋានគ្រឹះដ៏សំខាន់ជាងគេនៅក្នុងការជួយ អោយមានការអភិវឌ្ឍន៍ នាពេលអនាគតនៅក្នុងប្រទេសនីមួយៗ…»។
បើតាមសេចក្ដីប្រកាសព័ត៌មានរបស់សហភាពអឺរ៉ុប ការផ្ដល់អាហារូបករណ៍របស់សហភាពអឺរ៉ុបសម្រាប់និស្សិតកម្ពុជា នៅពេលនេះគឺ មិនមែនជាលើកទីមួយទេ ដោយសារនៅចន្លោះឆ្នាំ២០០៥ ដល់ ឆ្នាំ២០១៥ កម្មវិធីអាហារូបករណ៍ Erasmus+ និង Erasmus Mundus ដែលឧបត្ថម្ភមូលនិធិដោយសហភាពអឺរ៉ុប បានផ្ដល់អាហារូបករណ៍ដល់និស្សិត និងបុគ្គលិកសិក្សាកម្ពុជា ប្រមាណជាង៥០០នាក់បានទៅសិក្សា និងបង្រៀននៅបណ្ដាប្រទេសនានាក្នុងទ្វីបអឺរ៉ុប រួចហើយដែរ។
សេចក្ដីប្រកាសព័ត៌មាននេះ ដែរក្រៅពីអាហារូបករណ៍ គឺកម្មវិធី Erasmus+ ក៏បានផ្ដល់ហិរញ្ញប្បទានដល់ការកសាងសមត្ថភាពអប់រំថ្នាក់ឧត្ដមសិក្សា (CBHE) ក្នុងគម្រោងចំនួន៦ នៅឆ្នាំ២០១៥ ហើយកម្មវិធីនេះ ក៏បានជួយដល់គ្រឹះស្ថានឧត្ដមសិក្សាកម្ពុជា ចំនួន៨ផ្សេងគ្នា រួមមាន សាកលវិទ្យាល័យ ជា ស៊ីម កំចាយមារ នាយករដ្ឋានឧត្ដមសិក្សានៃក្រសួងអប់រំយុវជន និងកីឡា វិទ្យាស្ថានបច្ចេកវិទ្យាកម្ពុជា សាកលវិទ្យាល័យមានជ័យ សាកលវិទ្យាល័យភូមិន្ទកសិកម្ម សាកលវិទ្យាល័យភូមិន្ទភ្នំពេញ សាកលវិទ្យាល័យស្វាយរៀង និងសាកលវិទ្យាល័យបាត់ដំបង ដើម្បីធ្វើជាដៃគូនៅក្នុងការអនុវត្តគម្រោងនេះ។
នៅក្នុងកម្មវិធីនេះដែរ លោក ហង់ ជួនណារ៉ុន រដ្ឋមន្ដ្រីក្រសួងអប់រំយុវជននិងកីឡា បានលើកឡើងថា ការផ្ដល់ឱកាសដល់និស្សិតកម្ពុជា ឱ្យទៅសិក្សានៅបណ្ដាប្រទេសក្នុងចំណោមរដ្ឋ សមាជិកសហភាពអឺរ៉ុបទាំងនោះ គឺជាចំនុចវិជ្ជមានមួយសំរាប់វិស័យអប់រំនៅកម្ពុជា។
លោក ហង់ ជួនណារ៉ុន ៖ «បាទ៎ គឺការផ្ដល់អាហារូបករណ៍នេះជួយពង្រឹង សាកលវិទ្យាល័យយើង ព្រោះសាកលវិទ្យាល័យ មានគ្រូបង្រៀន ចឹងមែនត្រឹមតែអាហារូបករណ៍ឲ្យនិស្សិតទេ ប៉ុន្ដែអាហារូបករណ៍នេះ អោយសាស្ដ្រចារ្យផងដែរ ដែលគាត់មកវិញអាចជួយបង្រៀន»។
ជាមួយគ្នានេះដែរ និស្សិតដែលទទួលបានអាហារូបករណ៍ទៅសិក្សានៅទ្វីបអឺរ៉ុប គឺ កញ្ញា សុខ សៀកហ្គិច ក៏បានប្រាប់ដែរថាកញ្ញា កំពុងត្រៀមទៅសិក្សានៅប្រទេសប៉ូឡូញ នៅថ្ងៃទី១៩ខែកញ្ញា ខាងមុខលើមុខវិជ្ជា កសិកម្ម។ សុខ សៀកហ្គិច នាងបានប្រាប់ទៀតថានៅពេលដែលត្រឡប់ ពីប្រទេសប៉ូឡូញវិញ នាងនឹងចែករំលែកបទពិសោធ រួមទាំងចំនេះដឹង ទៅដល់មិត្តភក្រ និង ពលរដ្ឋខ្មែរ មួយចំនួន។
កញ្ញា សុខ សៀកហ្គិច ៖«និយាយទៅ ខ្ញុំចង់សិក្សា នៅប្រទេសអឺរ៉ុបហ្នឹង ព្រោះប្រទេសគេខាងណោះ គឺជាប្រទេសរីកចំរើនខ្លាំង ខ្ញុំចង់សិក្សាអំពីវប្បធម៌គេ ពីការរីកចំរើនរបស់ប្រទេសគេ ហើយចង់សិក្សាអំពីវិទ្យាសាស្ដ្រកសិកម្មហ្នឹង ហើយបន្ទាប់មកពីខ្ញុំមកវិញ ខ្ញុំអាចមានបទពិសោធទាំងអស់នោះ ហើយចែករំលែកដល់មិត្តភក្រខ្ញុំ ដល់ប្រជាជនខ្ញុំ ព្រោះប្រទេសកម្ពុជា ពឹងផ្អែកលើវិស័យកសិកម្មខ្លាំង»។
Erasmus+ គឺជាកម្មវិធីថ្មីមួយរបស់សហភាពអឺរ៉ុបសម្រាប់ការអប់រំ បណ្តុះបណ្តាល យុវជន និងកីទ្បា ដែលចាប់ផ្តើមកាលពីខែមករា ឆ្នាំ២០១៤។ ជាមួយនឹងថវិការ ១៦, ៤ ពាន់លានអឺរ៉ូ (កើនទ្បើង ៤០ ភាគរយបើធៀបនឹងកម្មវិធីមុន) កម្មវិធីនេះនឹងផ្តល់អាហារូបករណ៍ដល់មនុស្ស ៤ លាននាក់ នៅទូទាំងពិភពលោក ក្នុងនោះរួមទាំងនិស្សិតថ្នាក់ឧត្តមសិក្សា ចំនួន ២ លាននាក់ និងបុគ្គលិកចំនួន ៣ សែន នាក់ សម្រាប់រយៈពេល ៧ឆ្នាំ (២០១៤- ២០២០)។
អាហារូបករណ៍សហភាពអឺរ៉ុប គឺជាជំនួយបំពេញបន្ថែមទៅលើការគាំទ្រដ៏ចម្បង ដល់វិស័យអប់រំនៅកម្ពុជា ដែលសហភាពអឺរ៉ុប និងក្រសួងអប់រំកម្ពុជា គឺជាដៃគូ ដ៏យូរអង្វែងមកហើយ៕
