ភ្នំពេញ៖ គណៈកម្មាធិការអចិន្ត្រៃយ៍រដ្ឋសភានៅថ្ងៃទី ១៨ កក្ដដានេះ បានសម្រេចលើសំណើរបស់តុលាការរាជធានីភ្នំពេញ ដែលស្នើសុំលើកអភ័យឯកសិទ្ធិអ្នកតំណាងរាស្ត្រគណបក្សប្រឆាំងគឺលោក តុ វ៉ាន់ចាន់ និងលោក ពិន រតនា ដោយប្រគល់សំណើនេះទៅឱ្យគណកម្មការទី ៦ នៃរដ្ឋសភាធ្វើការសិក្សាឡើងវិញ។
ការសម្រេចនេះនាំឱ្យអ្នកច្បាប់ និងអ្នកវិភាគនយោបាយ យល់ឃើញថា រដ្ឋសភាមកពីបក្សកាន់អំណាចហាក់បានគោរពច្បាប់ឡើងវិញ ហើយក៏បង្ហាញពីតុល្យាភាពអំណាចរបស់គណបក្សកាន់អំណាច និងបក្សប្រឆាំងនៅក្នុងរដ្ឋសភាផងដែរ។
ការសម្រេចមិនទាន់ដកអភ័យឯកសិទ្ធិអ្នកតំណាងរាស្ត្រទាំងរូបនេះ ក៏ព្រោះតែគណៈកម្មាធិការអចិន្ត្រៃយ៍ សំអាងហេតុថា សភាកំពុងស្ថិតក្នុងវិស្សមកាល។ តែយ៉ាងណាគណៈកម្មាធិការអចិន្ត្រៃយ៍នឹងបញ្ចូនសំណើនេះ ទៅកាន់គណកម្មការទី ៦ ដើម្បីពិនិត្យនិងសិក្សាឡើងវិញ។ នេះបើតាមលោក ឡេង ប៉េងឡុង អ្នកនាំពាក្យរដ្ឋសភា ដែលបានអះអាងដូចនេះ នៅក្នុងសន្និសីទសារព័ត៌មានបន្ទាប់គណៈកម្មាធិការអចិន្ត្រៃយ៍ រដ្ឋសភាបិទកិច្ចប្រជុំ។
លោក ឡេង ប៉េងឡុង បញ្ជាក់បន្ថែមថា របៀបវារៈរបស់អ្នកតំណាងរាស្ត្រ២រូប អាចនឹងត្រូវដឹងថាត្រូវសម្រេចដូចម្ដេច គឺត្រូវរង់ចាំ គណកម្មការទី៦ជាមុនសិន។
នៅក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភានៅព្រឹកមិញនេះដែរ ក៏មានរបៀបវារៈសំខាន់ៗមួយចំនួនទៀតផងដែរ រួមមាន ការពិនិត្យលើសំណើស្នើសុំរដ្ឋសភាបំភ្លឺបញ្ជាក់ អំពីករណីលោក សម រង្ស៊ី ដែលត្រូវបានរដ្ឋសភាប្រកាសសុពលភាពនៃអាណត្តិជាសមាជិករដ្ឋសភា នីតិកាលទី ៥ ហើយដកសុព លភាពវិញ។
របៀបវារៈមួយទៀត គឺការពិនិត្យលើសំណើស្នើសុំរដ្ឋភាពបញ្ជាក់អំពីនីតិវិធី ឬច្បាប់ ឬមាត្រាណាមួយដែលរដ្ឋសភាអនុញ្ញាតឱ្យតុលាការបន្តនីតិវិធីចំពោះតំណាងរាស្ត្រ ដែលមានអភ័យឯកសិទ្ធិសភា រួមទាំងរបៀបវារៈមួយចំនួនទៀត។
ចំពោះរបៀបវារៈទី ២ ស្តីពីការដកហូតសុពលភាពនៃអាណត្តិជាសមាជិករដ្ឋសភា នីតិកាលទី ៥ និងរបៀបវារៈទី ៣ ស្តីពីការបញ្ជាក់នីតិវិធី ឬច្បាប់ ឬមាត្រា ដើម្បីរដ្ឋសភាអនុញ្ញាតឱ្យតុលាការបន្តនីតិវិធីចំពោះតំណាងរាស្ត្រមានអភ័យឯកសិទ្ធិសភានេះ គឺមិនទាន់មានការឯកភាពគ្នានៅឡើយនោះទេ ហើយគណកម្មាធិការអចិន្ត្រៃយ៍រដ្ឋសភា និងលើកយករបៀបវារៈនេះទៅពិភាក្សានៅលើកក្រោយទៀត។
ជុំវិញការសម្រេចមិនព្យួរអភ័យឯកសិទ្ធិអ្នកតំណាងរាស្ត្រទាំងពីររូបនេះ លោក អំ សំអាត មន្ត្រីស៊ើបអង្កេតផ្នែកច្បាប់នៃអង្គ ការលីកាដូ និយាយថា នេះជាបង្ហាញពីការយកចិត្តទុកដាក់ និងភាពរឹងមាំដាច់ចេញពីសម្ពាធអ្នកនយោបាយ។ មួយវិញទៀតលោក អំ សំអាត ថា ជំហររបស់គណៈកម្មាធិការអចិន្ត្រៃយ៍នៅពេលនេះ អាចទំនងដោយសារមានសម្ពាធពីអន្តរជាតិ ដែលមួយរយៈចុងក្រោយនេះ រដ្ឋាភិបាលក្រុងភ្នំពេញបានទទួលការរិះគន់ជាច្រើន ចំពោះការឃុំខ្លួនមន្ត្រីអង្គការក្រៅរដ្ឋាភិបាល និង ការយាយីមន្ត្រីគណបក្សប្រឆាំង ដែលប្រការនេះអាចឱ្យរដ្ឋាភិបាលគិតពិចារណាឡើងវិញផងដែរ។ លោក អំ សំអាត៖ «បាទ!ខ្ញុំគិតថា ក្នុងស្ថានភាពនយោបាយរបៀបនេះ គឺធ្វើឱ្យគណបក្សកាន់អំណាចហ្នឹង ធ្វើអីក៏ត្រូវគិតគូរពិចារណាដែរ អញ្ចឹងក៏មានការគិតគូរវែងឆ្ងាយដែល ហើយប្រសិនបើជាធ្វើអីហើយមិនស្របតាមផ្លូវច្បាប់អាហ្នឹងនាំឱ្យមានការរិះគុនទៅបក្សកាន់អំណាច។ អញ្ចឹងខ្ញុំឃើញថា ស្ថានភាពរបៀបនេះបានជាមានការបន្ទន់ខ្លះ ហើយណាមួយការដកឬព្យួរអភ័យឯកសិទ្ធិនេះ ក៏វាមិនងាយដែល ទ័លតែមានមតិ ២ភាគ៣នោះ»។
ប្រទេសមហាអំណាចគឺសហរដ្ឋអាមេរិក សហភាពអ៊ឺរ៉ុបដែលជាម្ចាស់ជំនួយធំជាងគេសម្រាប់កម្ពុជា និងអង្គការសហប្រជា ជាតិ បានចេញសេចក្តីថ្លែងការណ៍ជាបន្តបន្ទាប់ ដោយថ្កោលទោសទង្វើរបស់រដ្ឋាភិបាលកម្ពុជា ដែលបានចាប់ចង់មន្ត្រីអង្គ ការសង្គមស៊ីវិលទាំង ៥រូប និងការតាមយាយីមន្ត្រីគណបក្សប្រឆាំងជារឿយៗនោះ។ តាមព្រឹត្តិការណ៍នយោបាយនាពេលកន្លងមក នៅពេលមានការស្នើព្យួរអភ័យឯកសិទ្ធិអ្នកតំណាងរាស្ត្រគណបក្សប្រឆាំងលើកណា គឺគណៈកម្មាធិការអចិន្ត្រៃយ៍រដ្ឋសភា និងរដ្ឋសភាបក្សកាន់អំណាចមិនដែលគិតពិចារណាយូរនោះទេ ពោលគឺតែងតែសម្រេចតាមការស្នើនោះ។ តែជំហរទន់ភ្លន់លើកនេះ ធ្វើឱ្យអ្នកវិភាគនិងអ្នកច្បាប់យល់ថា ទំនងមកពីសម្ពាធពីបរទេស។
សូមរំលឹកថា លោក តុ វ៉ាន់ចាន់ និងលោក ពិន រតនា ត្រូវបានតុលាការរាជធានីភ្នំពេញ កោះហៅឱ្យចូលខ្លួនទៅបំភ្លឺក្នុងតុលាការ ក្រោមបទចោទអំពើពេស្យា ក្នុងសំណុំរឿងនាង ខុម ចាន់តារ៉ាទី ហៅស្រីមុំ។
យ៉ាណាក៏ដោយអ្នកតំណាងរាស្ត្រមកពីគណបក្សប្រឆាំងទាំងពីនាក់នេះ បានបដិសេធមិនចូលខ្លួនតាមការបង្គាប់របស់តុលាការនោះទេ ព្រោះលោកទាំងពីសំអាងលើអភ័យឯកសិទ្ធិអ្នកតំណាងរាស្ត្រ៕
