ភ្នំពេញ៖ លោក យ៉ែម បុញ្ញាឬទ្ធិ អ្នកនាំពាក្យគណបក្សសង្គ្រោះជាតិ បានឱ្យដឹងថា គណបក្សសង្គ្រោះជាតិ ក៏ដូចជាប្រជាពលរដ្ឋទូទៅ និងចូលរួមដង្ហែរសពរបស់លោកបណ្ឌិត កែម ឡី យកទៅបញ្ចុះនៅក្នុងស្រុកកំណើតរបស់លោក នៅថ្ងៃទី ១៧ខែកក្កដា ឆ្នាំ២០១៦ ខាងមុខនេះក្នុងស្រុកត្រាំកក់ ខេត្តតាកែវ ខណៈគណបក្សប្រឆាំងចាត់ទុក អ្នកវិភាគបញ្ហាសង្គមរូបនេះថាបានបូជាជីវិតដើម្បីជាតិ។
លោក យ៉ែម បុញ្ញាឬទ្ធិបានថ្លែងដូចនេះ នៅក្នុងកម្មវិធីថ្លែងសុន្ទរកថាប្រចាំថ្ងៃរបស់បក្ស នៅថ្ងៃទី១៥កក្កដានេះ។
លោក យ៉ែម បុញ្ញាឬទ្ធិ ៖«យើងបានទទួលព័ត៌មាន ពីគណៈកម្មាការរៀបចំកម្មវិធីបុណ្យបញ្ចុះសព របស់លោកបណ្ឌិត កែម ឡី ថា នឹងមានការរៀបចំ និងដង្ហែរបញ្ចុះសព នៅថ្ងៃទី១៧ ខែកក្កដា ខាងមុខ។ ហើយយើងដែលជាសកម្មជន ដែលជាអ្នកគាំទ្រ គណបក្សសង្គ្រោះជាតិ ក៏ដូចជាប្រជាពលរដ្ឋទូទៅ ទូទាំងប្រទេសដែលមានសន្ដានចិត្ត ចំពោះសពបណ្ឌិត កែម ឡី យើងនឹងចូលរួម ចូលរួមក្នុងការគោរពវិញ្ញាណក្ខន្ធ ចូលរួមក្នុងការដង្ហែរសពយកទៅបញ្ចុះនៅស្រុកកំណើតរបស់បណ្ឌិត កែម ឡី នៅស្រុកត្រាំកក់ ខេត្តតាកែវ ថ្ងៃទី១៧ ខែកក្កដា ឆ្នាំ២០១៦»។
លោក យ៉ែម បុញ្ញាឬទ្ធិ បន្ដថាការបាត់បង់លោក បណ្ឌិត កែម ឡី គឺការសោកសង្រែងបំផុតរបស់ប្រទេសជាតិ។
«ថ្ងៃនេះទី ១៥កក្កដា២០១៦ ប្រាំថ្ងៃក្រោយពីការសម្លាប់លោកបណ្ឌិត កែម ឡី ដែលយើងបានដឹងបានលឺ ដែលគាត់ចូលរួមយ៉ាងសំខាន់ ក្នុងការផ្ដល់ទស្សនៈ គំនិត យោបល់ ដើម្បីការរៀបចំសង្គម ការរៀបចំប្រទេសជាតិហើយកិច្ចការនេះ យើងមានការសោកសង្រែង យ៉ាងខ្លាំងជាទីបំផុត»។
មរណភាពលោក កែម ឡី ក៏ត្រូវបានមេដឹកនាំគណបក្សប្រជាជនកម្ពុជាចូលរួម ចែករំលែក ការកាន់ទុក្ខ ដល់គ្រួសារសពផងដែរ។
សម្ដេចនាយករដ្ឋមន្ត្រីបានប្រកាសរឹតបន្តឹងសន្តិសុខ ដែលសម្ដេចថាមិនអត់ឱ្យនដល់ ជននៅពីក្រោយឡើយ។
សូមជំរាបថា លោកបណ្ឌិត កែម ឡី អ្នកវិភាគនយោបាយឯករាជ្យត្រូវបានឃាតករបាញ់សម្លាប់នៅក្នុង Star Mart ខណ្ឌចំការមន ក្បែរស្តុបបូកគោនៅវេលាម៉ោង ៨និង៤៥នាទីព្រឹក ដែលត្រូវនឹងថ្ងៃទី១០ខែកក្កដា ឆ្នាំ២០១៦៕
