ភ្នំពេញ៖ កាលពីព្រឹកថ្ងៃព្រហស្បតិ៍នេះ តុលាការរាជធានីភ្នំពេញ បានចេញដីកាហាម លោក កឹម សុខា ទៅក្រៅប្រទេស ដែលជាការដាក់កំហិតមួយ មិនឱ្យមេបក្សប្រឆាំងរូបនេះបានចេញទៅក្រៅប្រទេសឡើយ។
ភ្លាមៗបន្ទាប់ពីតុលាការបានចេញដីកាដូចនេះ គណបក្សសង្គ្រោះជាតិបានចេញសេចក្ដីថ្លែងការណ៍ដោយចាត់ទុក លិខិតរបស់តុលាការថា ជាចរឹកទុចច្ចរិតនយោបាយ និង ជាការរំលោភរដ្ឋធម្មនុញ្ញមាត្រា ៨០។ អ្នកវិភាគយល់ថា សេចក្ដីសម្រេចរបស់ តុលាការនេះគឺស្ថិតក្រោមឥទ្ធិពលរបស់អ្នកនយោបាយ ។ ប៉ុន្ដែគណបក្សកាន់អំណាចបក្សបដិសេធការយល់ឃើញនេះ។ លោក លៀ ស៊ីណា រាយការណ៍៖
នៅថ្ងៃនេះកងកម្លាំងសមត្ថកិច្ចបាននាំយកដីកាមួយច្បាប់ របស់តុលាការសាលាដំបូងរាជធានីភ្នំពេញទៅ បិទនៅជញ្ជាំង របងផ្ទះលោក កឹម សុខា ប្រធានស្តីទីគណបក្សសង្គ្រោះជាតិ នៅព្រឹកថ្ងៃទី១៤ ខែកក្កដា ឆ្នាំ២០១៦នេះ។
បើយោងតាមដីកានេះ គឹ ជនត្រូវចោទត្រូវបានដាក់ឲ្យស្ថិតនៅក្រោមការត្រួតពិនិត្យ តាមផ្លូវតុលាការ ដែលចេញ ដោយចៅក្រមស៊ើបសួរសាលាដំបូងរាជធានីភ្នំពេញ លោក ថាន់ ឡេង កាលពីថ្ងៃទី០៨ ខែកក្កដា ឆ្នាំ២០១៦។ តាមដីកានេះគឺ លោក កឹម សុខា ត្រូវបានហាម ធ្វើដំណើរចេញក្រៅព្រំដែនដីប្រទេស។
ចំពោះការចេញលិខិតនេះត្រូវបានគណបក្សសង្គ្រោះជាតិ ចេញសេចក្ដីថ្លែងការណ៍ឆ្លើយតបភ្លាមៗដោយចាត់ទុក ជាការរំលោភច្បាប់រដ្ឋធម្មនុញ្ញមាត្រា ៨០ ដែលបក្សប្រឆាំងនេះអះអាងថា លោក កឹម សុខា ជាអ្នកតំណាងរាស្ដ្រដែលមានអភ័យឯកសិទ្ធសភា។
បន្ថែមពីនេះសេចក្ដីថ្លែងការណ៍របស់គណបក្សសង្គ្រោះជាតិបានចោទ ទង្វើរបស់តុលាការមកលើលោក កឹម សុខា ថាអនុវត្តនីតិវិធីក្រោមឥទ្ធិពលនយោបាយ ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានឆ្លើយតបតាមសារអេឡីចត្រូនិចតេឡេក្រាមថា តុលាការបានអនុវត្តយ៉ាងត្រឹមត្រូវតាម វិធាននិងនីតិវីធី ដោយមានមូលដ្ឋានគតិយុត្តិគ្រប់គ្រាន់ នៅក្នុងចំណាត់ការ រឿងនេះ ។
តែបែបនេះក្ដី លោក សូ ចន្ថា សាស្ដ្រាចារ្យវិទ្យាសាស្ដ្រនយោបាយ មានប្រសាសន៍ឲ្យវិទ្យុស្ដ្រីដឹងថា វិធានការរបស់តុលាការគឺមិនត្រឹមត្រូវ ដោយមិនស្របទៅតាមច្បាប់រដ្ឋធម្មនុញ្ញដែលចែងពីការការពារអ្នកតំណាងរាស្ដ្រដែលមានអភ័យឯកសិទ្ធសភា។
សាស្ដ្រាចារ្យវិទ្យាសាស្ដ្រនយោបាយបន្ដថា ការអនុវត្ដន៍ច្បាប់ហាក់មានស្ដង់ដារពីរ ហើយអំណាចរបស់តុលាការបានបង្ហាញឲ្យឃើញថា ស្ថិតក្រោមឥទ្ធិពលនយោបាយច្រើនទើប ធ្វើឲ្យដំណើការនៃការដោះស្រាយបញ្ហាលើលោក កឹម សុខា ត្រូវបានសាធារណៈជនមើលឃើញថា មិនត្រឹមត្រូវ។
លោក សូ ចន្ថា«សម្រាប់ខ្ញុំ នៅតែគិតថា នយោបាយនៅកម្ពុជាគួរតែដោះស្រាយឲ្យបានឆាប់បំផុតរវាងខ្មែរនិងខ្មែរ បើសិនជាជម្លោះនៅតែមាន ហើយការសម្លាប់មនុស្សក្រៅប្រព័ន្ធនៅតែមានវានឹងនាំឲ្យជះឥទ្ធិពលខ្លាំងដល់ការបោះឆ្នោតពេលខាងមុខ»។
ប៉ុន្ដែអ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ ថ្លែងថាតុលាការគឺជាអំណាចឯករាជ្យហើយចំពោះការចេញលិខិតមិនអនុញាត្ដិឲ្យលោក កឹម សុខា ចាកចេញពីប្រទេសកម្ពុជាគឺជារឿងត្រឹមត្រូវព្រោះសំណុំរឿងរបស់លោក កឹម សុខា មិនទាន់បញ្ចាប់នៅឡើយទេ។
អ្នកនាំពាក្យបក្សកាន់អំណាចបន្ដថា ក្នុងសំណុំរឿងលើលោក កឹម សុខា នេះគឺជាចេតនារបស់បក្សប្រឆាំងដែលមានបំណងមិនចង់សហការជាមួយតុលាការ ទើបបង្កឲ្យមានរឿងរ៉ាវរហូតមកទល់ពេលនេះ ។ លោកបន្ថែមថា មេបក្សប្រឆាំងរូបនេះគួរតែចេញមុខមកទទួលខុសត្រូវចំពោះមុខច្បាប់ មិនគួរសំងំលាក់ខ្លួនហើយស្រែកចោទ ប្រកាន់បក្សប្រជាជនថា រំលោភច្បាប់នោះទេ ។
លោក សុខ ឥសាន្ដ បញ្ជាក់ថា មុនពេលចោទប្រកាន់តុលាការថា រំលោភរដ្ឋធម្មនុញ្ញ លោកស្នើឲ្យបក្សប្រឆាំង និង អ្នកគាំទ្រគណបក្សប្រឆាំងទាំងអស់ត្រូវតែពិនិត្យមើលច្បាប់រដ្ឋធម្មនុញ្ញជាថ្មីឲ្យបានច្បាស់ មុនពេលចោទប្រកាន់ទៅខាងណាមួយ ។
លោក សុខ ឥសាន្ដ« ខ្ញុំយល់ឃើញថា តុលាការគេមានឆន្ទានុសិទ្ធដើម្បីចេញសេចក្ដីសម្រេចនេះ ដើម្បីឲ្យស្របទៅតាមទៅតាមនិតិវិធីរបស់តុលាការ ដូច្នេះហើយបើសិនជាសមីខ្លួនមិននៅក្នុងប្រទេសវានឹងនាំឲ្យប៉ះពាល់ដល់ដំណើរការរបស់តុលាការ »។
លោក កឹម សុខា បានសំងំជ្រកកោនក្នុងស្នាក់ការគណបក្សសង្គ្រោះជាតិជាងមួយខែមកហើយ ដោយសារតែលោក មិនចូលខ្លួនទៅកាន់តុលាការចំនួន ប្រាំមួយលើក ទាក់ទិននឹងសំណុំរឿងជាមួយនាង ខុម ចាន់តារ៉ាទី ហៅ ស្រីមុំ និង កញ្ញា ធី សុវណ្ណថា ព្រមទាំងករណីដីការកោះហៅលោកដែលមិនចូលខ្លួនទៅកាន់តុលាការ ។ ទាំងអ្នកសង្កេតការណ៍ជាតិនិងអន្ដរជាតិមួយចំនួនបានហៅករណីរបស់លោក កឹម សុខា ថាជារឿងនយោបាយ ដោយពួកគេបានសម្ដែងការព្រួយបារម្ភភាពងាយគ្រោះថ្នាក់នៃសេរីភាពពហុបក្សនៅកម្ពុជានៅមុនការបោះឆ្នោត ៕
