ភ្នំពេញ៖ នៅក្នុងបទសម្ភាសន៍ជាមួយ វិទ្យុស្ត្រី នៅថ្ងៃនេះក្រុមអ្នកវិភាគល្បីៗឈ្មោះ ចំនួន ៣រូបមានទស្សនៈប្រហាក់ ប្រហែលគ្នា ចំពោះមរណភាពរបស់ លោកបណ្ឌិត កែម ឡី ដែលជាអ្នកវិភាគ ដ៏ល្បីល្បាញនៅកម្ពជា។
ទាំង លោក មាស នី លោក អែម សុវណ្ណរ៉ា និង លោក សូ ចន្ថា អ្នកវិភាគបញ្ហាសង្គម មើលឃើញថាមរណភាព របស់លោក កែម ឡី ដោយសារខ្មាន់កាំភ្លើង បាញ់សម្លាប់ទាំងកណ្ដាលថ្ងៃ កាលពីថ្ងៃអាទិត្យទី ១០ កក្កដា គឺ សញ្ញានៃការសោកសៅរិ៍ថ្មីទៀត ចំពោះប្រវត្តិសាស្ត្រកម្ពុជា។ ប៉ុន្តែពួកគាត់ បញ្ជាក់ថាការបាញ់សម្លាប់ អ្នកវិភាគរូបនេះ គឺហេតុការណ៍ពិតមួយព្រោះ តែកើតឡើងចំពេលស្ថានភាពនយោបាយ ឡើងកំដៅ។ ពួកគាត់ថាគ្មាន នរណាចំណេញជាងនរណាក្រៅពីការ ខាតបង់សម្រាប់ជាតិ បើទោះជា បក្សសង្គ្រោះជាតិ អាចទាញ ផលប្រយោជន៍ពីករណីនេះក្ដី ។
ពួកគាត់ថា ដើមចម គឺ ដោយសារលោក កែម ឡី និយាយចំសាច់រឿងពេក។ តែបែបនេះក្ដី អ្នកនាំបក្សកាន់អំណាច ចាត់ទុកការយល់ឃើញរបស់អ្នកវិភាគថា មិនមានភាពត្រឹមត្រូវ ព្រោះ គ្មានអ្វីដែល នយោបាយឡើងកំដៅនោះទេ។ លោកថាឡើងកំដៅ ឬកម្ពុជាប្រឈមមុខ បញ្ហាអ្វីគឺទង្វើរបស់ គណបក្សប្រឆាំង។ 
តទៅនេះ ជាការពន្យល់ របស់ លោកបណ្ឌិត មាស នី អ្នកវិភាគ បញ្ហាសង្គម ៖
ចំណែកលោក សូ ចន្ថា សាស្ដ្រាចារ្យវិទ្យាសាស្ដ្រនយោបាយ ក៏បានបញ្ចេញការយល់ឃើញរបស់លោកដូចនេះដែរ៖
រីឯលោក អែម សុវណ្ណរ៉ា អ្នកវិភាគមួយរូប និងជាសាស្ដ្រាចារ្យវិទ្យាសាស្ដ្រនយោបាយបានបកស្រាយដោយមានអំណះអំណាងដូចតទៅនេះដែរ៖
ទោះយ៉ាងណាក៏ដោយអ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ បានព្យាយាមធ្វើបទសំភាសន៍ជាមួយវិទ្យុស្ដ្រីដែរថា គ្មានស្ថានភាពនយោបាយឡើងកម្ដៅអ្វីទេ ។ អ្នកណាដែលថា ឡើងកម្ដៅគឺសុទ្ធសឹងជាក្រុមអ្នករិះគន់មិនមានការពិចារណានិងថ្លឹងថ្លែងឲ្យបានច្បាស់លាស់។ លោកថា មរណភាពរបស់លោក កែម ឡី ក៏មិនមែនកើតឡើងដោយសារតែការឡើងកម្ដៅនយោបាយនោះដែរ។
នៅរយៈពេលចុងក្រោយនេះ ស្ថានការណ៍នយោបាយនៅកម្ពុជាត្រូវបានសហគមន៍អន្ដរជាតិមើលឃើញថា ងាយធ្វើឲ្យលទ្ធិប្រជាធិបតេយ្យកម្ពុជា ងាយគ្រោះថ្នាក់ ខណៈដែលពួកគេ រិះគន់បក្សកាន់អំណាចថាកំពុងតែ ចាត់វិធានការតាមផ្លូវតុលាការ ដើម្បីបំបាត់សម្លេងក្រុមប្រឆាំង ដូចជាករណី លោក កឹម សុខា លោក សម រង្សី លោក អ៊ុំ សំអាន និង លោក សមាជិកព្រឹទ្ធសភារួមនឹងមន្ដ្រីអង្គការសិទ្ធិមនុស្ស សមាជគមន៍អាថហុក ជាដើម ៕
