ភ្នំពេញ៖ តំណាងរាស្ត្រគណបក្សសង្គ្រោះជាតិដែលកំពុងឃុំខ្លួនក្នុងសំនុំរឿងព្រំដែន បាននិយាយវាយប្រហារលើមេដឹកនាំរដ្ឋាភិបាលបក្សកាន់អំណាចថា ការចាប់ខ្លួនអ្នកស្នេហាជាតិគឺជាការតម្រូវចិត្តមេដឹកនាំវៀតណាម។
លោកបាននិយាយដូចនេះ ខណៈលោកត្រូវបាននាំខ្លួនជាថ្មីទៀត ចូលសាលាឧទ្ធរណ៍នៅព្រឹកថ្ងៃអង្គារទី១២ កក្កដានេះ។
ស្ថិតក្នុងសម្លៀកបំពាក់អាវពណ៌ស្លាទុំ ហើយដៃជាប់ខ្នោះលោក អ៊ុំ សំអាន ដែលគេដាក់រហស្សនាមថា ជាជនសកម្មរឿងព្រំដែនបាននិយាយថា ការចាប់ខ្លួនអ្នកស្នេហាជាតិកន្លងមក គឺធ្វើឡើងដើម្បីបំពេញចិត្ត វៀតណាម ហើយជាមួយគ្នានេះលោកបានទាមទារឱ្យបក្សកាន់អំណាច ពិចារណាករណីនេះឡើងវិញ។ លោក អ៊ុំ សំអាន៖«អ្នកការពារព្រំដែនបែបជាជាន់គុក ចំណែកឯអ្នកកាត់ដីឱ្យយួនបែរជារួចខ្លួននឹងក្លាយជាអ្នកស្នេហាជាតិទៅវិញ។ យើងដឹងហើយថាមេដឹកនាំយើងកាត់ដីឱ្យយួនដើម្បីតបស្នងសងគុណដែលបានលើកបន្តុបកាត់តាំងពីទសវត្សទី៨០»។
តែបែបនេះក្ដីអ្នកនាំពាក្យបក្សកាន់អំណាចបដិសេធ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត មានប្រសា សន៍ជាមួយវិទ្យុស្ត្រីថា អ្វីដែលលោក អ៊ុំ សំអាន បានចោទប្រកាន់នេះគឺជារឿងមិនពិត ។ លោកអះអាងថា បក្សកាន់អំណាចមានជំហរឯករាជ្យ មិនរណបប្រទេសណាមួយឡើយ។ លោក សុខ ឥសាន្ត៖«នេះជាគំនិតលោក អ៊ុំ សំអាន ដែលលោកមាន គំនិតកេងចំនេញខាងនយោបាយ ហើយថាគំនិតធ្វើខ្ញុំគេតាំងពីដើមមកអញ្ចឹង ហើយអួតឯងជាអ្នកឯករាជ្យ ជាអ្នកមិនចំណុះអ្នកណា អានឹងវាមិនត្រឹមត្រូវទេគ្រាន់តែស្ដាប់មតិគាត់យើងដឹងជាមនុស្សលាបពណ៌ ឆ្លៀតឱកាសកេងចំនេញនយោបាយឲ្យខ្លួនឯងជារឿងធម្មតាដែលគាត់នៅបក្សប្រឆាំង គាត់តែងនិយាយអញ្ចឹងគ្មានអីចំលែកទេ»។
លោក អ៊ុំ សំអាន ត្រូវបាននាំខ្លួនមកកាន់សាលាឧទ្ធរណ៍នៅព្រឹកថ្ងៃទី១២កក្តដានេះ ដើម្បីមកបើកសវនាការរឿងលោកសុំទុក ជាមោឃភាពនីតីវិធីនៃការឃុំខ្លួនដោយតុលាការរាជធានីភ្នំពេញ។
លោក អ៊ុំ សំអាន ជាអ្នកតំណាងរាស្ត្រគណបក្សសង្គ្រោះជាតិ ត្រូវបានចាប់ខ្លួននៅថ្ងៃទី១០ មេសា ឆ្នាំ២០១៦ គឺភ្លាមៗបន្ទាប់ពីលោកវិលត្រឡប់ពីអាមេរិក ហើយការចាប់ខ្លួនធ្វើឡើងទាំងកណ្ដាលយប់។
លោកត្រូវបានចោទពីករណីក្លែងផែនទី ទាក់ទិនការបោះបង្គោលព្រំដែនជាមួយប្រទេសវៀតណាម។ ករណីរបស់លោក អ៊ុំ សំអាន ត្រូវបានអ្នកសង្កេតការណ៍ថាជារឿងនយោបាយ៕
