ឥណ្ឌា៖ ពួកមន្ដ្រីស្ថិតិ និងមន្ត្រីជំរឿននៃប្រទេសឥណ្ឌាបានឲ្យដឹងថា រយៈពេល ១០ឆ្នាំចុងក្រោយនេះ ប្រទេសឥណ្ឌាទទួលបានកំណើនប្រជាជនរបស់ខ្លួន ១៨១លាននាក់ទៀត គឺស្មើនិងប្រជាជននៃប្រទេសប្រេស៊ីលហើយចំនួននេះ នឹងដើរទាន់ប្រជាជនចិននៅឆ្នាំ ២០៣០។
ប្រទេសអាស៊ីខាងត្បូងមួយនេះ បច្ចុប្បន្នមានចំនួនប្រជាជនរបស់ខ្លួនឈរលំដាប់លេខ ២ លើពិភពលោកគឺមានជាង ១ពាន់ ២រយលាននាក់ ដែលចំនួននេះស្មើនិងការបូកបញ្ចូលគ្នានៃប្រជាជនអាមេរិក ឥណ្ឌូនេស៊ី ប្រេស៊ីល ជប៉ុន និងបង់ក្លាដេស។
គេហទំព័ររបស់ឥណ្ឌូនេស៊ីឈ្មោះថា ឥណ្ឌូនេស៊ីដេលីដែលស្រង់សំដីមន្ដ្រីស្ថិតិ និងជំរឿននៃប្រទេសឥណ្ឌាបាននិយាយថា កំណើនប្រជាជនឥណ្ឌាកើនយ៉ាងលឿននេះ គឺជាលើកដំបូងហើយក្នុងរយៈពេល៩០ឆ្នាំកន្លងមកនេះ។
តាមពួកមន្ដ្រីប្រទេសឥណ្ឌាឱ្យដឹងទៀតថា ចំនួនប្រជាជននឹងតាមទាន់ ឬអាចច្រើនជាងប្រជាជនចិនថែមទៀតនៅឆ្នាំ ២០៣០ ហើយបច្ចុប្បន្ននេះ ចំនួនប្រជាជនចិនមាន ១៣៤០លាននាក់៕
ប្រភពៈIndonesia Daily
